Елімізде заң талаптарын білмегендіктен өз құқығын қорғай алмай жүрген азаматтар көп. Осыған орай әділет департаменті, ҚР Сыбайлас жемқорлыққа қарсы іс-қимыл агенттігі, zakon.kz желілік басылымы, «Параграф» ақпараттық жүйесі, мемлекеттік билік органдары және Қазақстанның үздік заңгерлері мен адвокаттары бірлесіп, Қазақстанның барлық ірі қаласында «Халық заңгері» атты акция өткізді.
Аталмыш шара Талдықорғанда да ұйымдастырылды. Кәсіпкерлер палатасында өткен жиынға білікті заңгерлер, облыс әкімінің орынбасары Марлен Көлбаев, қала әкімі Ернат Бәзіл қатысып, тұрғындардың көкейінде жүрген сауалдарға жауап берді. «Тұрғын үй, жер мәселесі бойынша заң көмегіне жүгінгендер көп», – дейді мамандар.
– Жылда дәстүрлі түрде өтетін шара болғандықтан тұрғындарға алдын ала хабар беріп, тегін кеңес алуға шақырдық. Жиналған халықтың басым көпшілігі білікті мамандарға жер, үй, берешекті қалай өтеу керек деген сұрақтармен жүгінді, – дейді облыстық әділет департаменті басшысының орынбасары Ерлан Ахметбек.
Облыс бойынша 600-ге жуық азамат акция аясында тегін заңгерлік кеңес алды.
Тұрғындар маманмен сөйлескеннен кейін әрі қарай не істеу керектігін сұрап, мәселесінің тез шешілу жолдарын да біліп, осындай игі шара жиі ұйымдастырылып тұрса деген тілектерін білдірді.
– Осындай акция жиі өткізілсе жақсы болар еді. Өйткені, әркімнің кеңес алу үшін адвокатқа жүгінуге немесе бірден бірнеше мемлекеттік билік органдарының өкілдерімен бір алаң аясында кеңес алуға қаржылық мүмкіндігі жоқ. Білікті мамандарға жүгініп, мәселемнің шешімін таптым, – дейді қала тұрғыны Нұртай Шыңғожанова.
Айта кетейік, 2016 жылдан бері ұйымдастырылып келе жатқан акцияда 8000-нан астам маманнан 165 000-нан астам адам заңгерлік көмек алған.
Айдар ҚАЛИЕВ
