Қазақстанның Ішкі істер министрлігі Threads әлеуметтік желісінде белең алған қауіпті жазбаларға байланысты азаматтарға үндеу жолдады. Соңғы уақытта виртуалды әлемде танысу арқылы жасалатын айла-шарғылар жиілеп кеткен, – деп хабарлайды 7-su.kz ақпараттық порталы.
Threads платформасында «әйел іздеймін», «күйеу іздеймін» немесе «байсалды қарым-қатынас құрғым келеді» деген мазмұндағы хабарландырулар көбейген. Мұндай жазбалардың артында шынайы ниеті бар жандар ғана емес, кәсіби алаяқтар да тұруы мүмкін. Қаскөйлер көбіне интернеттен алынған тартымды ерлер мен әйелдердің суреттерін қолданып, сенімге кіру арқылы эмоционалды байланыс орнатады.
Киберқылмысқа қарсы іс-қимыл департаментінің мамандары бұл процестің бірнеше кезеңнен тұратынын анықтады. Алдымен жағымды сөйлесу арқылы жәбірленушінің сеніміне ие болып, соңынан өздерінің «қиын жағдайын» алға тартады. Мәселен, кенеттен ауырып қалғанын, шұғыл шығындар шыққанын айтады немесе «өте тиімді инвестиция» салуды ұсынады. Осыдан кейін ақша аудару туралы өтініш жасалады. Қаржы көбіне шетелдік шоттарға, криптоәмияндарға немесе үшінші тұлғалар арқылы сұралады. Ақшаны алған бойда алаяқ байланысты үзіп, қолданушыны бұғаттап тастайды.
Тәртіп сақшылары интернет арқылы танысқан адам мынадай әрекеттер жасаса, сақ болуды ескертеді:
-
Түрлі сылтаумен ақша сұрау;
-
Бейнеқоңыраудан немесе бетпе-бет кездесуден бас тарту;
-
Басқа адамдардың суретін пайдалану (оны сурет арқылы іздеу жүйелерінен тексеруге болады).
Мамандар бейтаныс жандарға жеке деректер мен ақша жібермеуге, күдікті сілтемелерге өтпеуге кеңес береді. Егер сөйлесу барысында күмән туса, қарым-қатынасты дереу тоқтатқан абзал. Қазіргі таңда киберкеңістіктегі қауіпсіздік – әрбір қолданушының цифрлық сауаттылығына тікелей байланысты.
Ішкі істер министрлігі алаяқтық фактілеріне тап болған жағдайда бірден полицияға хабарласу қажеттігін еске салады.
