Желі қолданушысы 50 көлікке айыппұл салып, 4 жүргізушіні куәлігінен айырған.
Бұл туралы 7-su.kz желілік басылымы SMARTNEWS.KZ сайтына сілтеме жасап хабарлайды.
Threads әлеуметтік желісінде Руслан есімді желі қолданушысы қалада көлік жүргізген кезде жол ережесін бұзған жүргізушілер туралы полицияға жеткізетінін айтты.
Ол eOtinish платформасы арқылы видео жүктеп, тиісті арыз жолдаған. Бір айдың ішінде оның өтініштері бойынша 50 көлікке айыппұл салынып, 4 жүргізуші жүргізуші куәлігінен айырылғанын Руслан Threads желісіндегі жазбасында бөлісті. Оның желідегі жазбасын 200 мыңнан астам адам көрген.
«Мені «тоқылдақ» деп атасаңыздар болады, маған бәрібір. Мен бір айдың ішінде eOtinish арқылы 50 көлікке айыппұл салғызып, 4 жүргізушіні қарсы бағытқа шығып кеткені үшін жүргізуші куәлігінен айырттым. Бұл тек жұмыс пен үйдің арасындағы шағын маршрут, күнделікті өмір. Бар болғаны күніне 2-3 айыппұл. Иә, маған ұнады, әрі жаным жеңілдеп қалды. Егер жалқауланбағанымда, бұл көліктердің саны 300-ге жететін еді, одан кем емес. Тек барлығын бірдей жіберуге уақыт болмады. Иә, маған қоңырау шалып, мәселені шешуді, арызды қайтарып алуды сұрағандар болды. Бірақ мен оларға сотта кездесуді ұсындым. Бірақ олар бас тартып, үнсіз қалды», — деп жазды Руслан.
Руслан eOtinish арқылы полицияға арыз беру процесін қалай жүзеге асыратынын егжей-тегжейлі түсіндіріп берді.
Көліктегі бейнетіркегішке жазылған видеоларды Wi-Fi арқылы смартфоныма жүктеймін. Кейін видеоны YouTube-ке жариялап, eGov қосымшасындағы eOtinish айдары арқылы Полиция департаментіне арыз жолдаймын. Қала мен аудан сияқты қажетті деректерді таңдаймын, содан кейін видео сілтемесін арызға тіркеймін. Толық сипаттамасын жазамын да, хаттаманы күтемін. Фото жеткілікті ме, білмеймін, бірақ мен видео жіберемін. Видеоның уақыты анық көрінуі керек. Менің видеорегистраторым қарапайым әрі арзан – Xiaomi маркалы. Бастысы, оны телефонға қосуға мүмкіндік болғаны жөн. Уақыт белгісі үшін тіркегіштің өзіндегі уақыт пен timestamp Camera қосымшасын пайдалануға болады. ЭЦҚ арқылы телефонда авторизация жасап, арыз беремін. Бүкіл процесс шамамен 5 минуттай уақыт алады, – деп бөлісті ол.
Фото: qaz-media.kz
