Биыл 2024 жылдың 1 маусымы бойынша облыста сауда және тұтынушылар құқығын қорағау департаментіне 333 өтініш түскен. Бұл 2022 жылмен салыстырғанда 5,8 есеге көп. Тең қоғам қолдау орталығында Жетісу облысының сауда және тұтынушылар құқықтарын қорғау департаментінің бас мамандары Ғазиз Аманжолұлы мен Гүлмира Абдрасилова «Тұтынушы құқығыңды біл» тақырыбында қала тұрғындарымен кездесу өткізді.
Басқосуда тұрғындар қолма-қол және онлайн сатып алған тауарларды қайтару жолдары, сапасыз қызмет көрсеткен уақытта құқықты қорғай білу және жосықсыз кәсіпкерге қатысты шағым жазу жолдары мен әлеуметтік маңызы бар тауарлардың шекті сомадан асыру фактілерінде әрекет ету және өзге де сұрақтар бойынша жауап алды.
Жалпы, облыста тұтынушылардың құқықтарын қорғау саласындағы өтініштер артып келеді. Айта кетсек, жоғарыдағы 333 өтініштің 131-і оңды шешіліп, тұтынушыларға жалпы сомасы 5 578 000 теңге кайтарылған. Сонымен қатар, 161 өтініш бойынша түсіндірілу жұмыстары жүргізілсе, 37-сі қайта бағытталып, 4 өтініш кері қайтарылды.
Осы тұрғыда мамандар тұтынушылардың құқықтық сауаттылығын арттыру мақсатында тікелей эфир, лекция, семинарлар, Ашық есік күнін өткізіп, халық көп шоғырланған орындарда кеңес беру жұмыстарын ұйымдастыруда.
Тұтынушылардың шағымдары бойынша көшбасшылықтың алдыңғы қатарында бөлшек сауда саласы, тұрмыстық қызмет, одан кейін электронды сауда тұрғанын айтып өткен жөн.
Айғаным АЙТМҰХАН
