Жетісу облысының полиция департаменті былтырғы нәтиже бойынша республикада үздік бестікті түйіндеді. Қылмыс азайып, тәртіп бұзушылар қатары сиреген. Бұл жөнінде облыстық полиция департаментінің басшысы Сарқытбай Құсайынов ел алдындағы есебінде айтты.
Тәртіпті сақтау, құқық бұзудың алдын алу бойынша бірқатар іс жүргізген департамент өткен жылы қылмыс санын азайтқан (2023 жылы 3 639 қылмыс тіркелсе, былтыр 3 119 қылмыс тіркелді). Бұл тек полицияның ғана емес, оған жәрдемдескен кез келген азаматтың, ақыл қосқан ақсақалдардың, әр елді мекенде бірлікті сақтауға тырысқан ел ағаларының еңбегі екенін баяндамашы айрықша атап өтті.
ҚР Ішкі істер министрлігі биылғы жылды «Құқықбұзушылықтың алдын алу жылы» деп бекітті. Осы тұрғыда полиция «Заң мен тәртіп» қағидатын ұстанып, қылмысты ашып қана қоймай оның алдын алу жұмыстарын жүргізумен белсене айналысады. Аталған қағидат бойынша биыл өңірімізде «Мигрант», «Тасымалдаушы», «Анти Фрауд», «Есептегі тұлға» сияқты 15 жедел алдын алу іс-шарасы өткен.
Наурызда Талдықорған қаласында 15 жастағы жігіт мопедпен жол-көлік апатына ұшырап, оқиға орнында көз жұмды. Бұл жөнінде Сарқытбай Зәкірұлы: «Жыл басынан бері жалпы 187 жол-көлік апаты орын алды. 25 адам қайтыс болып, 256 адам жарақат алды. Жолдағы қозғалыс кезінде мопедтер ерекше орын алады. Былтыр облысымызда мопедтердің қатысуымен 32 жол апаты болды. Енді сәуірдің бесінен бастап мопедтер ресми түрде тіркелу қажет, оларды жүргізетіндер «А», «А1» немесе «В» санаты бойынша куәлік алу керек», – деді.
Облысымызда орын алған кейінгі оқиғаларға тоқталып, әр істің себебі мен оның әрекетін жан-жақты саралаған департамент басшысы наурыздың басында Ескелді ауданында ішімдікке сылқия тойған ер-азамат алты баласы бар әйелді ұрып-соғып өлтіргенін де баяндамасында айтты. «Қылмыстардың негізгі себептері – ішімдіктің тәулік бойы сатылуы. Өткен жылы алкогольдік өнімдерді сату талаптарын бұзған 66 адам (2023 жылы 43 адам) әкімшілік жауапкершілікке тартылды»,– деді департамент басшысы. Осыдан 5 жыл бұрын облысымызда тек бір ауылда (Алакөл ауданындағы Жыланды ауылы) ғана ішімдік сатылмайтын болса, бүгінде Панфилов ауданындағы Керімағаш ауылы, Көксу ауданындағы Бозтоған, Мұқаншы, Жарлыөзек ауылдарында алкогольдік өнімдер саудаланбайды. Нәтижесінде аталған ауылдарда тәртіп бұзушылар азайып, аса ауыр қылмыс тіркелмеген.
Ел алдында есеп берген департамент басшысы интернет алаяқтықтың өршіп тұрғандығын, бөтен нөмірден ақша сұрап қоңырау шалса тұтқаны қоюды, мал ұрлығы бойынша ірі қара өрістен көп жоғалатындығы және енді әр адам қараусыз мал үшін жауап беретіндігін қадап айтты.
Тағы бір өзекті мәселе – есірткінің тарауы (әсіресе «синтетикалық» түрі). Былтыр дәл осы санат бойынша 149 құқықбұзу тіркелді (оның 76-ы Талдықорғанда тіркелді), облыс бойынша 700 келіге жуық есірткі заттары тәркіленді (оның ішінде 67 келісі «синтетика»). «Үш есірткі зертханасының жолы кесілді (оның екеуі Ескелді ауданында), ұсталғандар шет елдің азаматтары. Қандайда бір күдікті әрекет байқасаңыз бізге қоңырау шалып, мән-жайды түсіндірсеңіздер болады», – деді Сарқытбай Құсайынов.
Артынша департамент басшысы жиналғандардың сауалына жауап беріп, еркін диалог құрды.
Серік ҚАНТАЙ
