Атамекен ауылының тумасы, менің шәкіртім Берік Өмірбеков мектепте оқып жүрген кезінен-ақ тәртіп сақшысы болуды армандайтын. Беріктің бала күніндегі арманы орындалып, бүгінде полиция майоры дәрежесіне көтерілді. Жұмысына жауапкершілікпен қарайтын қызметкерді бүкіл ауыл мақтан тұтады.
Беріктің әкесі марқұм Рахымбай ата «Калинин» (бұрынғы) ұжымшарының қойшысы болды. Анасы Ұлжалғас апамыз екеуі 6 бала тәрбиелеп, ұлын ұяға, қызын қияға қондырды. Ауылға үлгілі отбасы болды. Ата-анасының жолын қуған Берік жары Жадыра екеуі бала тәрбиелеп отырған бақытты отбасы.
Берік мектепті өте жақсы бітіріп, алғашқы еңбек жолын Жаркент қаласындағы ішкі істер бөлімінен бастады. Өзінің еңбекқорлығымен қала, ауыл тұрғындарының алғысына бөленді. Бүгінде «Шығыс қақпа» Қытай шегара аймағында еңбек етуде. Абыройлы еңбегінің арқасында талай жетістіктерге жетті. Облыс, ауданның Алғыс хаттарымен марапатталды.
Полиция қызметі адалдық пен әділдікті талап ететін, шыдамдылық пен төзімділікті қажет ететін абыройлы мамандықтардың бірі. Күндіз-түні тыным таппай, ел тыныштығын күзетіп, халықтың қауіпсіздігін күзететін де полиция қызметкерлері. Полиция қызметкерлері өз ісіне адал әрі адамгершілігі мол, қарапайым болуы керек. Осындай қиындығы мен қызығы мол мамандықты таңдап, абыроймен атқарып жүрген Берік Рахымбайұлының отбасына амандық, еңбегіне табыс тілеймін.
Тоқтаргүл КИГІЗБАЕВА,
ардагер ұстаз
