Ішкі істер министрлігі азаматтарды әлеуметтік желілер мен мессенджерлер арқылы жасалатын алаяқтықтың жаңа түрінен сақ болуға шақырды.
Ведомствоның мәліметінше, соңғы уақытта алаяқтар күштік құрылымдар мен құқық қорғау органдары басшыларының аты-жөні мен фотосуреттерін пайдаланып, жалған аккаунттар ашып жатыр.
Қаскөйлер өздерін лауазымды тұлға, бұрынғы әріптес немесе таныс адам ретінде таныстырып, түрлі себептермен шұғыл түрде ақша аударуды немесе қарыз беруді сұрайды.
Осыған байланысты ІІМ азаматтарға күмәнді хабарламаларға сенбеуді, SMS-кодтарды, банк карталарының деректерін, құпиясөздер мен өзге де жеке ақпаратты ешкімге бермеуді ескертеді. Сондай-ақ белгісіз сілтемелерге өтпеу және күмәнді қосымшаларды орнатпау қажет.
– Егер ақша аудару туралы өтініш түссе, тіпті ол таныс адамның атынан жіберілсе де, ақпараттың шынайылығын өзіңіз білетін байланыс нөмірі немесе ресми арналар арқылы міндетті түрде тексеріңіз, – деп ескертті ІІМ.
