Жетісу облысында жалған мемлекеттік нөмір таққан жүргізуші анықталды, – деп хабарлайды 7-su.kz ақпараттық порталы.
Өңірде жол қауіпсіздігін қамтамасыз ету және құқық бұзушылықтардың алдын алу бағытында полиция қызметкерлері жүйелі жұмыстар жүргізіп келеді. Кезекті оқиға тәртіп сақшыларының қырағылығы мен заманауи технологиялардың тиімділігін көрсетті.
Патрульдеу кезінде күдік тудырған Mazda автокөлігі тоқтатылған. Көлікті шамамен 30 жастағы ер адам басқарған. Жүргізушінің әрекеті күмәнді болғандықтан, көлік толық тексеруге алынған.
«Қорғау» қосымшасы арқылы жүргізілген тексеру барысында автокөлікке орнатылған мемлекеттік тіркеу нөмірлерінің бұл көлікке тиесілі емес екені анықталды. Дерекқор мәліметіне сәйкес, аталған нөмірлер басқа Mitsubishi автокөлігіне тіркелген.
Осылайша жүргізушінің жалған мемлекеттік нөмір таққаны белгілі болды. Көлік арнайы айып тұрағына қойылды.
Полиция мәліметінше, жыл басынан бері Жетісу облысында жалған мемлекеттік тіркеу нөмірлерін пайдалану бойынша 8 дерек тіркелген. Барлық фактілер бойынша заңнамаға сәйкес тиісті шаралар қабылданған.
Мамандардың айтуынша, мұндай құқық бұзушылықтар жол қозғалысы қауіпсіздігіне елеулі қауіп төндіреді. Себебі жалған нөмірлер көбіне басқа да заңсыз әрекеттерді жасыру мақсатында қолданылады.
«Бірде-бір құқық бұзушылық назардан тыс қалмайды. Заманауи цифрлық құралдар сәйкессіздіктерді жедел анықтауға мүмкіндік береді. Заң бәріне ортақ, оны айналып өту әрекеттері міндетті түрде жауапкершілікке әкеледі», – деп атап өтті полиция өкілдері.
Тәртіп сақшылары азаматтарды заң талаптарын қатаң сақтауға шақырады. Жол қозғалысы қауіпсіздігін қамтамасыз ету – әрбір қатысушының ортақ міндеті.
