Бейсен Құранбек атындағы Журналистер үйінде Жетісу облысындағы есірткі қылмыстарына қарсы іс-қимыл мәселелеріне арналған брифинг өтті.
Жетісу облысы полиция департаментінің мәліметінше, 2026 жылдың алғашқы 4 айында өңірде есірткінің заңсыз айналымына қатысты 72 құқық бұзушылық анықталған. Оның 35-і есірткі қылмысына жатады.
Жедел іс-шаралар барысында заңсыз айналымнан 101 келіден астам есірткі заттары тәркіленді. Оның басым бөлігі – марихуана. Сондай-ақ гашиш пен синтетикалық есірткі түрлері анықталған.
Полицейлер жүргізген жұмыстар нәтижесінде 43 адам ұсталып, есірткі қылмыстарына қатысты 51 қылмыстық іс сотқа жолданған.
Сонымен қатар есірткі таратуға қатысты интернет-ресурстар бұғатталып, күдікті қаржылық операциялар мен шоттардың қозғалысына шектеу қойылған. Криптовалюта әмияндары мен шетелдік шоттарға қатысты да бұғаттау шаралары жүргізілуде.
Талдықорғанда екі бірдей есірткі зертханасы жойылып, олардың бірінде синтетикалық есірткі өндірілгені анықталған.
Өңірде профилактикалық жұмыстар да тұрақты жүргізілуде.
«Қазіргі таңда өңірде есірткі қылмысының алдын алу бағытындағы жұмыстар тұрақты жүргізілуде. Бұл ретте мектептерде, оқу орындарында және жастар көп жиналатын орындарда түсіндіру шаралары ұйымдастырылады. Сонымен қатар есірткінің зияны мен заң алдындағы жауапкершілік туралы ақпарат беріледі. Есірткі қылмыстарына қарсы іс-қимылда «Антифрод», «Кибербақылау» жүйелері, бейнебақылау камералары мен дрондар секілді цифрлық технологиялар қолданылып отыр. Жасанды интеллект негізіндегі талдау құралдары да енгізілген. Азаматтар 102 жедел желісі арқылы күмәнді жағдайлар туралы анонимді түрде хабарлай алады. Хабар берушінің деректері құпия сақталады», – деді Жетісу облысы Полиция департаменті Есірткі қылмыстарына қарсы іс-қимыл басқармасы бастығының орынбасары Ерасыл Узаков.
Облыстық денсаулық сақтау басқармасының мәліметіне сәйкес, өңірде 232 адам есірткіге тәуелді ретінде есепте тұр. Оның ішінде жастар да бар.
Аяулым Шынгаева
