Сарқан ауданына қарасты Алмалы ауылында 8-сынып оқушысы Муслим Біржанұлы пышақ жарақатынан көз жұмды. Қайғылы оқиға 6 қазанда болған. Марқұмның анасы Самал Мұхамадиева ұлынан айырылғанын, оқиға туралы Sputnik.kz тілшісіне марқұм оқушының анасы айтты, – деп хабарлайды 7-su.kz ақпараттық порталы.
Қайғылы оқиға қалай болған?
Самал Мұхамадиеваның айтуынша, оқиға сабақ уақытында болған. Бірнеше оқушы мектептен төмен қарай түсіп, сол жерде жанжалдасқан. Анасының сөзінше, ұлына пышақ жарақаты салынған сәт телефонға түсірілген. Алайда телефонды полиция қызметкерлері алып кеткендіктен, видеоны көре алмаған.
«Сабақ уақытында оқушылар мектептен бір көше төмен түсіп барып, жанжалдасқан. Менің ұлыма пышақ салғанын да телефонның камерасына түсіріп тұрыпты. Видеоны менің баламның телефонына түсірген. Маған көрсетпеді телефонды, полиция алып кетті», – дейді Самал Мұхамадиева.
Марқұм бокспен айналысқан. Ал күдікті ретінде қарастырылып отырған сыныптасы күреспен шұғылданған. Муслим 29 қыркүйекте ғана 14 жасқа толған.
«Балам мектептен аман қайтпады»
Ананың айтуынша, ұлы сол күні мектепке аман-есен кеткен. Ол баласын күн сайын күтіп алуға дағдыланғанын, енді оны ешқашан көре алмайтынын айтып, қайғысын жеткізді.
«Баламды дін аман сабаққа жіберген ем. Таңертең шығарып салып, күн сайын алдынан шығып күтіп алушы ем, енді жоқ. Қара жерді құшақтап қалдым. Жарысқа кетем деп дайындалып жүргенде келмеске кетті. Бір жері ауырмаған мықты балам мектептен аман қайтпады», – дейді ол.
Самал Мұхамадиеваның сөзінше, пышақ жарақаты ұлының жүрек тұсына тиген. Жараланған жасөспірім көмек сұрағанымен, жанындағылардың не істегенін нақты білмейтінін айтады. Кейін өтіп бара жатқан көлік жүргізушісі баланы ауруханаға жеткізген. Алайда Муслим сол жерде көз жұмған.
«Баламды пышақтап, сол жерге тастап кеткен. Жан дауысы шығып, “103 шақырыңдаршы” деген. Ал ана оқушылар қашып кеткен бе, білмеймін, балам жалғыз қалған жолда. Өтіп бара жатқан көлік тоқтап, баламды сала салып, ауруханаға барған. Муслимым сол жерде жан тапсырды», – дейді анасы.
Анасы әділдік талап етеді
Самал Мұхамадиеваның айтуынша, балалар арасындағы жанжалға өзге оқушылардың да қатысы болуы мүмкін. Оның сөзінше, ұлы мен күдікті бесінші сыныптан бері бір сыныпта оқыған.
«Балалардың бірі шағыстырып, бірін біріне айдақтаған. Екеуі бесінші сыныптан бастап бір сыныпта оқыған. Қасында бес бала болған, нақтысын білмеймін. Күдікті бала қамалған жоқ. Оның анасы баласын тірідей көріп жүр, ал менің балам топыраққа көміліп, суық жерде жатыр. Мен ешқашан көрмеймін ғой баламды», – дейді ол.
Марқұмның анасы ұлының қазасына кінәлілер заң алдында жауап беруі керек екенін айтып, ешкімге кешірім бермейтінін жеткізді. Сондай-ақ Білім бөлімінің басшысы келгенде, өзіне сұхбат бермеуді өтінгенін айтты.
«Баламнан айырылып отырып, неге үндемеуім керек. Кешірім бермеймін, сотталсын. Айналдырған үш-ақ балам бар еді, бірінен айырылып қалдым», – дейді Самал Мұхамадиева.
Ол ұлының қайтыс болғанын ауруханада естіген. Анасының айтуынша, дәрігерлерге баланың денесін тексеруге рұқсат берген. Сондай-ақ пышақ жарақаты екі рет салынғанын кейін естігенін айтады.
Қайғылы оқиғадан бір күн бұрын қорқынышты түс көріп, шошып оянғанын да жеткізді.
Полиция қылмыстық іс қозғады
Жетісу облыстық полиция департаментінің мәліметінше, кәмелетке толмаған баланы өлтіру дерегі бойынша қылмыстық іс қозғалған.
«Алдын ала мәліметтерге сәйкес, сабақтан кейін сыныптастар арасында жанжал туындап, оның барысында жасөспірімдердің бірі дене жарақатын алып, кейіннен көз жұмған. Күдікті ұсталып, заңды өкілдерімен бірге полиция бөліміне жеткізілді», – деп хабарлады полиция департаменті.
Сонымен қатар балалардың өмірі мен денсаулығының қауіпсіздігін қамтамасыз ету жөніндегі міндеттерін тиісінше орындамау дерегі бойынша білім беру ұйымының қызметкерлеріне қатысты да қылмыстық іс қозғалған.
Полиция департаментінің мәліметінше, тергеу барысы ведомство басшылығының ерекше бақылауында.
