Қапшағай қалалық кітапханасының ұйымдастыруымен ҚР Жазушылар одағының мүшесі, Қапшағай қаласының Құрметті азаматы, «Үздік өлкетанушы», оннан астам кітаптың авторы Жұмахан Қожамқұлдың 60 жас мерейтойына арналған «Тарихқа қалам тербеген» атты бенефис кеші өтті.
Бар ғұмырын бабалар тарихына арнап, кейінгі жас ұрпақты сүбелі шығармаларымен сусындатып, тарихтың қойнауында қалып қалған алтын, жақұттарымызды жарыққа шығарып, оқырманның ыстық ықыласына бөленіп жүрген Жұмахан Нұрлыбайұлы нағыз еңбекқор азамат. Жазушының еңбектері елді елең еткізбей қоймайтыны анық. Мұрағаттардың шаңын қағып, іздегенін табу жолында аянбай тер төгетін талант иесі. Әрбір шығармасы бүгінгі күннің жата-жастана оқитын оқулығына айналды. Бабалар тарихын жаңғыртуда істеген еңбектері ұшан- теңіз. Нақты, дәлелді, оқиғалы болып келетін кітаптары қалың оқырманның санасына ой салатын құндылыққа айналғанын біз жақсы білеміз. Тарихқа терең бойлап, мұхит түбінен маржан сүзген ағамызды Қапшағай халқы жақсы біледі. Алпыстың асқарына шыққан Жұмахан Нұрлыбайұлымен қалалық кітапханада болған кездесу келген қонақтарға ой салғаны сөзсіз. Кеш қонақтары өз естеліктерін айтып, жазушының әр шығармасына талдау жасап, ерен еңбегіне жоғары баға беріп отырды.
Кеш барысында қалалық кітапхана директоры Назым Кенжебекова Қапшағай қаласының әкімі Нұрлан Құматаевтың құттықтау хатын табыс етіп, иығына шапан жапты.
Әсерлі кеште жазушының өмірі мен шығармашылығы туралы «Қаламгер өнегесі» атты бейнефильм көрсетілді. Бенефистің негізгі бөлімі сұрақ-жауап ретінде өтті. Жұмахан Нұрлыбайұлы шығармашылығы, Қытайға және басқа елдерге барған іссапарлары, тарихи тұлғалар туралы туындылары жайлы және бастан өткізген қызықты сәттерінен сыр шертті.
Бенефис кештің арнайы қонақтары Қараша Қараман Жұмахан Нұрлыбайұлымен таныстығын айтса, Ғабит Ақтайұлы шежірелі Шеңгелді өңірінің мектебіне Қадырғали Жалайырдың есімін беру мен сол мектептен мұражайдың және «Бөлек би» қорының ашылуына қосқан үлесін тілге тиек етті. Шеңгелді ауылдық округінің әкімі Серік Ченкебаев та өзінің ыстық ықыласын жеткізіп, Алғыс хат табыс етті.
Туған жерінің тарихын түлеткен жазушыға ауылдастарының құрметі ерекше. Барлығымен бірлесе жүріп, келелі істің бастаушысы да, қоштаушысы да бола білген Жұмахан Қожамқұл ағамыздың жалпыға ортақ екенін осы кеште байқағандаймыз. Шеңгелді ауылдық аналар кеңесінің төрайымдары, қалалық, Шеңгелді және Қосқұдық ауылының ақсақалдар кеңесінің төрағалары мен Ауған соғысы ардагерлер қоғамының төрағасы Жұмахан ағаға құрметін көрсетіп, қошеметке бөледі. Сонымен қатар, ақын, Қазақстан Жазушылар мен Журналистер одағының мүшесі, Қапшағай қаласының Құрметті азаматы Алтыншаш Жақиянова Жұмахан Нұрлыбайұлына арнауын оқып, кештің шырайын одан ары асырды.
Кеш барысында Арна ауылдық клубының әншісі Бұқас Амалият халық әндері «Жанерке» және «Еркемайды» орындап, кездесуді желпінтіп, келген қонақтар мен жазушының мерейін үстем етті.
Бенефис соңында қаламгер кеш қонақтарына алғысын білдіріп, өзінің туындыларын тарих пәнінің мұғалімдеріне және кеш қонақтарына қолтаңбасымен тарту етті. Кеш соңы Қапшағай қалалық кітапханасы жанынан құрылған «Масат» клубының мүшесі Әлімжан Айғанымның «Жалайыр» әнімен аяқталды.
Аида Иманбаева,
кітапхананың оқырмандарға қызмет көрсету бөлімінің меңгерушісі
Қапшағай қаласы
