Орталық атқарушы органдар басшыларының халықпен кездесулерін өткізу туралы Қазақстан Республикасы Президентінің 2022 жылғы 7 сәуірдегі №863 Жарлығына сәйкес, Алматы облысына іссапармен келген ҚР Ақпарат және қоғамдық даму министрі Асқар ОМАРОВ Талғар ауданының тұрғындарымен кездесті. Бұл туралы «Жетісу» газетінің Талғар ауданындағы меншікті тілшісі хабарлады.
Аудандық Мәдениет үйінде өткен кездесу барысында ақпарат саласын дамыту, азаматтық қоғам, жастар және отбасы саясаты, дін, этносаралық қатынастар, қоғамдық сананы жаңғырту мәселелері талқыланды. Кездесуге Алматы облысы әкімінің орынбасары Б.Байжұманов, Талғар ауданының әкімі Қ.Әбдіханов, қоғамдық кеңес мүшелері, үкіметтік емес ұйымдар мен этно-мәдени бірлестіктердің жетекшілері, аудан тұрғындары мен жастары қатысты.
«Халық үніне құлақ асатын мемлекет» тұжырымдамасының жүзеге асқандығы болар, ауданға атбасын бұрған Ақпарат және қоғамдық даму министрі елмен емен-жарқын диалог өткізді.
— Ең алдымен, Қасиетті Рамазан айымен барлықтарыңызды құттықтаймын! Ұстаған оразаларыңыз қабыл болсын, – деп сөз бастаған ҚР Ақпарат және қоғамдық даму министрі Асқар Қуанышұлы өзінің баяндамасында министрліктің негізгі жұмыстарына тоқталды. – Біріншіден, біз азаматтық қоғам институттарын дамыту бойынша үлкен жұмыстарды жүргіземіз. Бүгінгі таңда республика бойынша әлеуметтік маңызды жұмыстармен айналысатын 22 мың үкіметтік емес ұйым бар. Мемлекет тарапынан барлық үкіметтік емес ұйымдарға қолдау көрсетілуде.
Былтыр Алматы облысында мемлекеттік әлеуметтік тапсырыс бойынша 92 жобаға 199 млн.теңге бөлінген. Биыл бұл сома 495 млн.теңгені құраған. Бұған 112 жоба қатысатын болады. Өткен жылмен салыстырғанда 2,5 есеге өсім бары байқалады. Бұл шаралар азаматтық қоғамды дамытуға бағытталады. Өйткені, азаматтық қоғам – мемлекеттің дамуында айтарлықтай маңызға ие. Сондықтан да, министр облыстық әкімдіктің азаматтық қоғамды дамытуға ерекше назар аударуы қажеттігін атап айтты.
— Қазіргі уақытта қоғамдық кеңестер құрамын нығайту бойынша жұмыстар жүргізілуде. Кейбір өңірлер бойынша министрлік тарапынан сын бар. Бірақ Алматы облысы бойынша кемшілік жоқ, – деген министр еріктілер қозғалысына да ерекше мән беріліп жатқандығын сөз етті. Әсіресе, асар жасау ықылым заманнан жалғасып келе жатқан ата дәстүр екендігін, сондықтан, еріктілер тобының пандемия мен қаралы қаңтарда көп қолғабыс жасағандарына ризашылығын білдірді.
Министр Президент Жарлығымен «Еріктілер жылы» аталып, «Жыл еріктісі» халықаралық сыйлықтың тағайындалуы еріктілер жұмысын ширата түсетіндігі туралы ойын ортаға салды.
Министрліктің маңызды бағыты – бұқаралық ақпарат құралдарын дамыту. Мемлекет басшысының халыққа Жолдауын жақында бәріміз тыңдадық. Сол Жолдауда БАҚ-тың бәсекеге қабілеттілігі мен жауапкершілігін арттыруда ақпарат саласындағы заңнама қажеттігін атап өткен.
— Біз қазір сол БАҚ туралы Заңды қайта әзірлеу жұмыстарын жүргізіп жатырмыз. Жақында «Рухани жаңғыру» Қазақстандық қоғамдық даму институты» алаңында Қазақстанның Бас редакторлар клубының мүшелерімен кездесуде БАҚ-қа қатысты бірталай мәселелер көтеріліп, ұсыныстар айтылды. Қазіргі уақытта БАҚ саласындағы заңнаманы жетілдіру үшін жұмыс тобы құрылып, жұмысын бастады, – деген министр Асқар Қуанышұлы БАҚ-ты дамытуға баса назар аударылып отырғандығын баяндады.
Бүгінгі күні Алматы облысында 218 БАҚ жұмыс істейтіндігін атап өткен ол сөз кезегінде мемлекеттік ақпараттық тапсырысты уақытылы өткізуді қамтамасыз ету қажеттігін де құлағдар етті.
Аталған министрліктің тағы бір бағыты – жастармен жұмыс істеу. Жастар саясатын жүзеге асыру. Қазақстанда 3,7 млн.жас тұрса, оның 40 пайызы ауыл жастары. Талғар ауданында ресми статистика бойынша 49 мың жас азамат бар. Қазір жастарды қолдау бойынша көптеген механизмдер мен жаңа жобалар жүзеге асуда. Айталық, «Алғашқы жұмыс орны» және «Zhas Project» жобалары, «Тәуелсіздік ұрпақтары» гранттарымен қаржыландыру шеңберінде тиісті шаралар жүзеге аспақ. Осы жобалар бойынша еңбекке араласып, кәсібін ашудың мүмкіндіктері мол екендігі де егжей-тегжейлі тарқатылды.
Министрмен кездесуге келген тұрғындарға сөз кезегі тиісімен ащы да болса ақиқатын іздеген маңызды мәселелердің тиегі ағытылды. Ол, әрине, алдымен көпбалалы аналардың баспанаға қол жеткізе алмауы, үй алу кезегінің жылжымауы сынды жанайқайы болса, енді бірі ауыл жастарының жұмыссыз жүргендігін, кәсібін ашуға қолдау таппайтындығын тілге тиек етті. Сондай-ақ, қоғамдық кеңестің мүшелерін қайта сайлау, ауылдағы ҮЕҰ-ның мәселелері, аккредитация, тіпті, жол мен ауызсудың проблемалары да еш кедергісіз министр назарына ұсынылды.
Келелі кездесуде ауданның ардақтылары, танымал қаламгерлер Мұса Жанәділов, Қорғанбек Аманжолов, Бексұлтан Көлбаев, Тұрсынбек Жалғасбаев, Камнұр Тәлімұлы, кәсіпкер-ұстаз Найля Үмбетовалар дін мен тіл, аудандық газетке қатысты өткір де өзекті мәселерді көлденең тартты.
Уақыттың шектеулі болуына қарамастан тұрғындардың мұң-мұқтажын мұқият тыңдаған Ақпарат және қоғамдық даму министрі Асқар Қуанышұлы олардың әрбіріне тұщымды жауап қайтарды. Және жергілікті атқарушы органдарға тиісті тапсырмалар берді.
Кездесуден кейін БАҚ өкілдерімен брифинг өткізіп, журналистерді толғантқан сауалдарына нақтылы жауаптар қайырған Асқар Омаров артынша азаматтарды жеке қабылдады.
Алматы облысына арнайы атбасын бұрған министр сапар соңында Талғар қаласындағы саябаққа барып, жастармен кездесіп, пікір алмасты.
Ұлбосын ИСАБЕК
Фото — Жұмабай МҰСАБЕК
Талғар ауданы
Алматы облысы
