Астана қаласында Есіл өзенінің жағалауында орналасқан Кенесары ханның ескерткіші қалпына келтіріліп, бұрынғы орнына қайта қойылды. Бұл туралы Қазақстан Республикасының Мемлекеттік кеңесшісі Ерлан Қарин өзінің Instagram парақшасында хабарлады.
«Астанадағы Кенесары ханның ескерткіші жөндеу жұмыстарынан өтіп, қайта орнатылды! Қазір ескерткіш айналасында абаттандыру жұмыстары жүргізілуде», — деп жазды Ерлан Қарин.
Айта кетейік, ескерткішті уақытша алып тастау жөндеу және қалпына келтіру мақсатында жүргізілген болатын. Жоба аясында монументтің құрылымына, тұғырына және сыртқы бетіне техникалық сараптама жасалып, заманауи әдістермен қайта өңделді.
Қазір ескерткіш тұрған аумақта көгалдандыру, жарықтандыру және қоғамдық кеңістік элементтерімен толықтыру жұмыстары жалғасуда. Бұл өзгерістер елорданың көркіне көрік қосып, тарихи тұлғалардың мұрасын ұлықтауға бағытталған.
Кенесары хан — қазақ халқының тәуелсіздігі жолында күрескен көрнекті мемлекет қайраткері. Оның ескерткіші елорданың тарихи-мәдени келбетінің маңызды нышандарының бірі болып саналады.
