Апат айтып келмейді. Тосыннан келген төтенше жағдай әп-сәтте әбігерге түсіріп, артын қайғылы оқиғаға әкеп соқтыруы ықтимал. Осы сәтте не істеу керек, қалай әрекет жасаған дұрыс? Ол әрбір азаматтың қаперінде болғаны абзал.
Дәл осындай төтенше жағдайға кезіккен Елдардың ерлігін ерекше атап өткен жөн. Ол өртке оранған үйден қос бірдей бүлдіршінді аман алып шыққан. Бұл жайында толық ақпаратты облыстық төтенше жағдайлар департаменті берді.
Үшарал қаласының 101 телефонына 16 сағат 13 минутта Теректі ауылы, Т. Рысқұлов көшесі, № 69 мекенжайында орналасқан тұрғын үй өртеніп жатқандығы туралы хабар түсті. 16 сағат 14 минутта Қабанбай ауылының №36 өрт сөндіру бөлімінің басшысы, азаматтық қорғау капитаны С. Толқыновтың бастауымен 5 өрт сөндіруші оқиға орнына аттанды.
16 сағат 20 минутта жалын шарпыған үйдің түгелдей өртеніп жатқанын көрген олар шұғыл түрде өз қызметтеріне кіріседі. Бір айта кетерлігі, өрт сөндіру қарауылдары келгенше Қ. Баянбай көшесі, № 72 үйдің тұрғыны, он жеті жастағы Теректі орта мектебінің 11-сынып оқушысы Елдар Абдиев өртеніп жатқан үйдің ішінен төсек астына тығылып, іште қалған Артем Крутиголов (03. 06. 2009) және Ангелина Крутиголованы (15. 06. 2012) сыртқа алып шыққан. Сөйтіп, екі адамның өмірін құтқарып, ерлік жасады.
Балалардың әке-шешесі – көрші Қабанбай ауылының тұрғындары. Олар әжесі Любовь Крутиголовамен бірге тұрып жатқан. Өрттен жарақат алғандар жоқ.
Міне, қаршадай баланың ерлігі көпке үлгі. Басын қатерге тігіп, екі баланың өміріне араша түскен Елдар нағыз батырға лайық іс тындырды.
Алакөл аудандық ТЖБ
