Ақсу ауылында Ілияс Жансүгіровтің атында этноауыл бой көтерді. Игілікті шараны ауыл тұрғындары мен осы ауылда орналасқан Ілияс Жансүгіров атындағы тарихи-өлкетану музейі ұйымдастырды. Шараға кәсіпкер азаматтар да қолдау көрсетті.
Шара аталған музейде басталды. Жиналған көпшілік алдымен Ілияс ақынның көзі тірісінде қолданған құнды жәдігерлерін тамашалады.
– Қазір музейде мыңнан астам жәдігер бар. Оның елуден астамы құнды мұралар. Сол қатарда Ілияс атамыз жолсапарларда тастамай алып жүрген чемоданы, ақын Қуат Терібаев сыйлаған домбыра, 1936 жылы Орал баспасында шыққан «Қолжазба» атты кітабы және Фатима Ғабитованың көзі тірісінде қолданған бұйымдары осы музейде сақтаулы. Қазір мұнда 6 адам жұмыс істейді. 2009 – 2011 жылдары музейге күрделі жөндеу жұмысы жүргізіліп, экспозициясы жаңартылды. Өткен жылы музейге 2 мыңға жуық адам келсе, биылғы келушілердің қатары одан да көп болады деп ойлаймыз, – дейді музей директоры Ардақ Құмарова.
Музейде өткен ашылу салтанатында Ақсу ауданы әкімінің орынбасары Ғазиз Есжанов, Ақсу ауданы ардагерлер кеңесінің төрағасы Амангелді Айтбайұлы, өлкетанушы Жемісбек Толымбеков, ақынның ұрпағы Орал Шүкетова, тағы да басқа қонақтар сөз сөйлеп, игілікті шараның ілгері басуына сәттілік тіледі. Осыдан кейін көпшілік «Ағынды менің Ақсуым» деп Ілияс жырға қосқан Ақсу өзенінің бойында орын тепкен этноауылға жол тартты. Бұл маңға қатар-қатар ақшаңқан үй тігіліпті. Үйлердің айналасында алтыбақан теуіп, мәре-сәре болған жастар, өреге құртын жайып, жүнін түтіп, тайқазанға етін асып, қонақжайлығын көрсетіп жүрген ақжаулықты аналар мен ибалы келіндер шараның сән-салтанатын асыра түсті.
Көпшілік этноауылға жақындағанда ауыл ақсақалдары алдынан шығып, өнерпаздар жырдан шашу шашып, құрметпен қарсы алды. Олар жас спортшылардың өнерін тамашалап, ауыл жастары ұйымдастырған көкпар тарту ойынын көріп, ақшаңқан үйге жайылған дастарқаннан дәм татты.
Этноауылдың дастарқаны жыл бойы жайылып тұрады. Түрлі ұлттық ойын да күн сайын жаңаланып, келушілерді жалықтырмайтын шаралар қолға алынбақ.
Қажет АНДАС
Ақсу ауданы
