«Ауылым – алтын бесігім» атты Мәдениет үйлері мен клубтары арасындағы облыстық байқау Еңбекшіқазақ ауданында жалауын желбіретті. Байқауға Бәйдібек би және Шелек ауылдық Мәдениет үйлері қатысты. Аталмыш шара салтанатына аудан әкімі Бинәлі Ысқақ, облыстық мәдениет, архивтер және құжаттама басқармасының бөлім басшысы, байқаудың қазылар алқасының төрағасы Төлеужан Ғұмаров келді.
Айтулы аламанның әлқиссасы аудан өнерпазы Қайрат Бектұрсынның келген қонақтарға арнау айтып, әжелердің тәттіден шашу шашуымен басталды. Мәдениет үйінің алдына татулықты ту еткен әр ұлттың өкілдері көрме ұйымдастырды. Сонымен бірге, түрік ұлтының келін түсіру салт-дәстүрі көрермен назарына ұсынылып, арнайы концерт қойылды. Қазылар алқасы Мәдениет үйіндегі құжаттар мен өткізілетін үйірмелерді көріп, ғимараттың материалдық-техникалық базасымен танысты.
Облыстық байқау күн ауа Шелек ауылында жалғасын тапты. Әр ұлт өкілдерінің көрмелері қойылып ұлттық құндылықтары таныстырылды. Концерттің шымылдығын ұлт-аспаптар оркестрі ашып, мың бұралған қозғалысқа толы билер, әуелетіп шырқалған әсем әндер мен күмбірлеген күйлер өнерсүйер қауымның назарына ұсынылды.
Ай бойы ауылдарды аралап келе жатқан әділқазылар атынан шара соңында сөз алған Төлеужан Ғұмаров аудандағы мәдениет саласы қызметкерлеріне алғысын жеткізе отырып, байқаудың маңызына тоқталып өтті.
– «Ауылым – алтын бесігім» байқауы тек концертпен шектелмейді. Негізгі мақсатымыз – бес саусақтай жұмылып, тату-тәтті жарасқан елдің тыныс-тіршілігімен танысу. Мәдениет үйіндегі үйірмелердің жұмыс атқаруы мен қызметкерлердің жергілікті тұрғындармен қарым-қатынасын бақылау. «Рухы мықты елдің тәжі басында, бағы қасында», – деген Жүсіп Баласағұн. Яғни, рух болмаған жерде ұлт та болмайды. Ал сол рухты көтеретіндердің бірі – мәдениет қызметкерлері, – деді Т. Нүсіпжанұлы.
Концерттік бағдарламаның соңы жергілікті сазгер Серік Абайдың «Еңбекшіқазақ ауданым» атты әнімен аяқталды.
Қайнар ЖҰМАҚОЖА
Еңбекшіқазақ ауданы
