Қарадала өңірінің еңбеккерлері үстіміздегі жылды айтарлықтай табысты нәтижемен аяқтап келеді. Ауылшаруашылық өндірісінің барлық саласында өткен жылдың осы мерзімімен салыстырғанда өнім көлемінің көбейгені байқалады. Өңір тұрғындарының егіншілік саласында өндірген өнімі 13 миллиард 632 миллион теңгені құрап, өткен жылмен салыстырғанда ол 935,2 миллион теңгеге ұлғайды. Жыл соңына дейін бұл көрсеткіш көлемінің тағы көбейе түсері анық.
Егіншіліктегі табысты тасқындатқан жүгерішілер «дала аруын» жинау науқанын белгіленген уақытта аяқтапты. Бұдан басқа майлы дақылдар, бақша және көкөніс, картоп өнімдері сақтайтын орындарға жеткізілген. Ал қазір егіс алқаптарында күздік бидай егу жұмыстары қарқынды жүргізілуде. Тасқарасу ауылының элиталық дақылдар тұқымын дайындайтын қожалықтары келер жылдың көктемгі егін науқанына дайындықты қолға алып, 20 тонна сұрыпты бидай тұқымын жинап, 60 тонна элиталық жүгері тұқымын әзірлеп қоюдың қамына кіріскен.
Тұқым өсіретін шаруашылықтарға мемлекет тарапынан берілетін қолдауқаржы егіншілердің еңбегіне демеу болып келеді. Биыл 87,9 тонна жүгері тұқымын сатып алған өңірдегі 139 қожалық Үкіметтен жалпы 32 миллион 591 мың теңге демеуқаржы алды. Сол сияқты жеміс бағын өсіретін жеті шаруашылыққа 16012 жеміс ағашының көшетін сатып алғаны үшін 5 миллион теңге қолдауқаржы төленді.
Осы ретте Шарын өңіріндегі егін шаруашылықтарына 134 миллион 628 мың теңге бөлінгенін айта отырғанымыз артық болмас. Жас бақ еккен бағбандарға, көпжылдық жүзім көшетін, көне жеміс бақтарын жаңартқандарға да Үкімет тарапынан қаржылай қолдау көрсетілді.
Минералды, органикалық тыңайтқыштарды егістік алқаптарына қолдану егіншілерге арзанға түспейді. Бұл бағытта да мемлекет егіншілерге қаржылай қолдау жасап отыр. Айталық, биыл 155,1 тонна минералды тыңайтқыш пайдаланған 32 шаруа қожалығына мемлекет 7 млн. 484 мың теңге демеуқаржы бөліпті. Сонымен қатар, өсімдіктерді зиянды жәндіктер мен әртүрлі аурулардан қорғау үшін гербицидтер қолданған 11 шаруашылыққа 3 миллион 744 мың теңге қолдауқаржы берілді.
Ауылшаруашылығы өндірісінің материалдық-техникалық базасын нығайтуға да мемлекет мән беріп келеді. Әсіресе, ауылшаруашылық техникаларын жаңартудың маңызы үлкен. Есепті уақыт аралығында өңірдегі қожалықтар 9 «Беларус» тракторын, екі трактор тіркемесін, бір экскаватор, 21 басқа да ауылшаруашылық техникаларын 133 миллион 825 мың теңгеге сатып алды.
Аудандағы мал шаруашылығының да өнім өндіру көлемі артыпты. Үстіміздегі жылдың тоғыз айында шаруалар 6588 тонна ет, 17858 тонна сүт, 564 тонна жүн, 6 миллион 137 мың дана жұмыртқа өндіріп сатыпты. Бүгінгі таңда Шарын өңірінде 75591 ірі қара, 272305 қой-ешкі, 17053 жылқы, 21433 құс қыстатылмақ.Өңірдегі төрт түлікті қыстан қоңды шығару үшін фермерлер 116600 тонна шөп дайындап алыпты. Ауданда мемлекеттік «Сыбаға», «Алтын асық», «Құлан» бағдарламаларының көмегімен мал сапасын жақсарту бағытында да қарымды қарекет жасалуда.
Өңір тұрғындарының ауылшаруашылық өндірісін өрлете бастаған қарымды қарекеттерін осындай нақты көрсеткіштер салмақтайды. «Елде болса ерінге тиеді» демекші, отандастарымыздың байлық-берекесінің еселеп артуына аудан тұрғындары да өз үлестерін нәтижелі істерімен қосуда.
Мырзағали НҰРСЕЙІТ.
Ұйғыр ауданы.
