Ұлттық кітап күні мерекесіне орай Талдықорған қаласының орталық Арбатында ерекше форматтағы «Kitap style» атты мерекелік фестиваль өтті.
Аталған іс-шара кітапсүйер қауымды, шығармашылық адамдары мен қала тұрғындарын біріктіріп, руханиятқа, білімге, әдебиетке деген құрметті тағы бір мәрте паш етті.
Фестиваль шымылдығын «Талдықорған қаласының орталықтандырылған кітапханалар жүйесі» КММ директоры Күлпан Кәлкенқызы ашып, кітаптың қоғамдағы орны мен маңызы туралы әсерлі ой қорытып, оқырмандарды кітап оқуға үндеді.
Балалар әдебиетінің жанашыры, жазушы Жұмабала Балақаранова өз шығармашылығы жайлы әңгімелеп, жас оқырмандарға ақ тілегін жаудырды.
Шараның қадірлі қонағы ретінде Семей полигоны мүгедектері және ардагерлер ұйымының төрағасы Толыбек Данабеков арнайы қатысып, көпшілікке әсерлі сөз сөйледі. Ол кітаптың өткен тарихты ұмыттырмай, жас ұрпаққа елдің ауыр тағдырын жеткізетін маңызды құрал екенін атап өтіп:
– Біз бастан кешкен заманның ауыртпалығын бүгінгі ұрпақ кітап арқылы ғана толық сезіне алады. Кітап шындықты жеткізетін мәңгілік мұра, – деп жас буынды білім мен руханиятқа үндеді.
Фестиваль аясында кітап көрмелері, еркін микрофон алаңы, шығармашылық кездесулер және түрлі мәдени-танымдық шаралар ұйымдастырылды. Қатысушылар кітап туралы ой бөлісіп, авторлармен жүздесті.
«Kitap style» фестивалі мерекелік шара ғана емес, рухани серпіліс, кітапқа деген сүйіспеншіліктің жарқын көрінісі.
Санжар СҰЛТАНҒАЗЫ
