Қазіргі уақытта еліміздегі эпидемиологиялық ахуалға байланысты білім беру қашықтан оқыту технологиясы арқылы жүзеге асырылуда. Осыған орай, ұстаздарымыз да өз тәжірибелерімен бөлісіп, жаңашыл әдіс-тәсілдерді тиімді қолдану үшін түрлі вебинар, онлайн-конференцияға қатысып, қашықтан оқытудың қыр-сырын меңгеруге аса жауапкершілік танытуда.
Қашықтан оқыту – оқушының өздігінен білім алуға және ақпарат алуға деген қызығушылығын оятып, дағды қалыптастырып, білімін, дағдысын, еңбектенуін арттыруға мүмкіндік берді. Қазіргі заманда ұстаздар қауымының алдында үлкен мақсат тұр. Ол – өмірдің барлық саласындағы белсенді, шығармашылық іс-әрекетіне қабілетті, еркін және жан-жақты жетілген тұлға тәрбиелеу.
Шығармашыл адамның бойында батылдық, еркіндік, ұшқырлық, сезімталдық сияқты қасиеттермен қатар, ерекше ой қызметі, қайшылықтарды түсіну, заңдылықтарды анықтау, шығармашылыққа деген құштарлық болу керек. Осыған орай, мектебімізде қазіргі қоғамның сұранысына, заманның талабына сай оқушылардың қазақ тілі мен әдебиеті пәніне деген қызығушылықтарын және шығармашылығын арттыру мақсатында оқушылармен әртүрлі жұмыс жүргізілуде. Бұл жұмыс оқушылардың іскерлігі мен дағдыларын қалыптастыра отырып, шығармашылық жұмысқа баулып, ой-өрісінің дамуына мол мүмкіндік тудырады.
Биыл — екі ғасырдың куәсі, жыршы, айтыскер ақын, «Халық поэзиясының алыбы» атанған Жамбыл Жабаевтың туғанына 175 жыл. Жыр алыбының мерейлі туған жылына орай, мектебіміздің тәрбие ісі жөніндегі орынбасары А.Байқадамова мен қазақ тілі мен әдебиеті пән бірлестігінің ұйымдастыруымен және оқушылардың қатысуымен қашықтан «Жүз жыл жырлаған жүрек» атты онлайн тәрбие сағаты өтті. Тәрбие сағатының мақсаты – Жамбыл Жабаевтың ақындық талантын шәкірт жүрегіне ұялату, оқушылардың сөйлеу мәдениетін дамыту, сөз өнерін қадірлеп, қастерлей білуге дағдыландыру, ақын өлеңдерін талдап, терең түсінуге үйрету.
Қазақтың қара өлеңін кие тұтқан, жүрегінің түбінен қайнап шыққан асыл жырларымен қалың жұртшылықтың махаббатына бөленген Жамбыл Жабаевтың шығармаларын оқушылар үлкен ыждағаттылықпен орындады.
Жамбыл Жабаев жалынды жырымен, нақыл сөздерімен бізбен бірге мәңгі жасайтыны анық.
Д.АҚШОЛАҚОВА,
Н.ҚАРЖАУ,
«Н.Островский атындағы №8 орта мектеп» КММ қазақ тілі мен әдебиеті пәні мұғалімдері
Талдықорған қаласы
Алматы облысы
Сурет — ғаламтордан
