Тәуелсіздік атауының астарында үлкен мән мен мағына жатыр емес пе? Сан мыңдаған жыл ата-бабаларымыз аңсап жеткен Тәуелсіздігімізден қымбат не бар? Шындығында біз бақытты ұрпақ екенімізді мақтан тұтуымыз керек. Ата-бабамыз қуғын-сүргін көріп, азат ел болу үшін басынан не өткізбеді? Елі мен жері үшін қаншама ерлік істерге барды!
«Елім-ай» деп жоңғар шапқыншылығына ұшырап, орыс империясының қарауында бодандықта болып, Қазан төңкерісін және ұлт-азаттық көтерілістерін бастан кешіріп, ашаршылықта аштан қалып, қазақтың беткеұстар азаматтары қуғын-сүргінге ұшырады. Соғыста асылдарымыздан айырып, тың игереміз деп қазақтың жері тілімдетілді. Бар байлығымызды өздеріне алып, біздің ұлт болып өркендеуімізге талай мәрте кедергі жасалды. Алайда, қазақ өзінің текті ұлт екендігін дәлелдеп, тағдырдың тар жол, тайғақ кешуіне шыдап, ел болып еңсесін көтеріп, ұлтты жеңіске жетеледі.
Халқымыз өтпелі кезеңдегі көптеген қиындықтарға қарамай алға ұмтыла білді. Мұның өзі қазақ елін биік белестерге бастады. Елбасы Нұрсұлтан Назарбаевтың салиқалы саясатының нәтижесінде ел болып еңсе тіктедік. Мемлекет болып қалыптасу үшін қаншама ұйқысыз түндер, мазасыз күндер өтті. Айналамыздағы мемлекеттермен шегарамызды шегендедік. Барлық мемлекеттермен дипломатиялық қатынастар орнаттық. Мемлекетіміздің символы болып табылатын төл теңгемізді айналымға ендіріп, Мемлекеттік рәміздерімізді әлемге паш еттік. Ата Заңымызды қабылдап, зайырлы-құқықтық мемлекетке айналдық. Әлемде теңдесі жоқ елордамызды Ақмолаға көшіріп, қазіргі Нұр-Сұлтан қаласы өмірге келді. Осындай жоқтан бар жасаған тәуелсіз мемлекеттің негізін салушы Нұрсұлтан Әбішұлының еңбегін тек қазақстандықтар ғана емес, бүкіл әлем мойындады.
Биыл Тәуелсіздігіміздің 30 жылдығын атап өтпекпіз. Осы орайда Елбасының «Тәуелсіздік – біздің маңдайға басқан бағымыз» деген пікірі ойға оралады. Шындығында тәуелсіздік бізге жанымыздан да қымбат болуға тиіс. Біз бақытты ұрпақ екенімізді ешқашан ұмытпауымыз керек. Мемлекет басшысы Қасым-Жомарт Тоқаев «Тәуелсіздік бәрінен қымбат» атты мақаласында: «Тәуелсіз ел болу оны жариялаумен немесе мемлекеттің іргетасын қалаумен шектелмейді. Тәуелсіздік үшін нағыз күрес күнделікті еңбекпен, үздіксіз әрі дәйекті елдік саясатпен мәңгі жалғасады. Біз қуатты тәуелсіз мемлекетімізбен ғана ұлт ретінде жер бетінде сақталамыз. Осы айнымас ақиқатты берік ұстануымыз қажет. «Тәуелсіздік бәрінен қымбат!» деген бірауыз сөз мәңгі ұранымыз болуға тиіс», – деп атап көрсетті. Ендігі басты мәселе осы отыз жылдағы атқарылған игі істерімізді насихаттап, одан әрбір қазақстандық тағылым алуға тиіс.
Нұрмаман ОҚАС,
Кеген аудандық мәслихатының депутаты,
аудандық Мәдениет үйінің директоры
