Түркістанда орын алған жаға ұстатар жай әйелді ұрлау бойынша резонанс тудырған істі Түркістан қаласының ауданаралық соты қарады, – деп хабарлайды 7-su.kz ақпараттық порталы.
Іс материалдарына сүйенсек, айыпталушылар – жәбірленушінің заңды некедегі жұбайы және оның екі танысы.
Оқиға қарсаңында ерлі-зайыптылар арасында тұрмыстық жанжал туындаған. Тергеу деректеріне сәйкес, осыдан кейін күйеуі достарымен бірігіп, әйелінен «қалай құтылудың» жолын қарастырған. Алдын ала келісімге келген олар жәбірленушінің қол-аяғын скотчпен байлап, еркінен тыс Шымкент қаласына алып кеткен. Кейін күйеуі қажетті медициналық құжаттарға қол қойып, әйелін заңсыз түрде облыстық психикалық денсаулық орталығына орналастырған.
Сонымен қатар тергеу барысында ер адамның тұрғылықты мекенжайынан атыс қаруына арналған 16 дана жауынгерлік оқ-дәрі табылып, заңсыз сақталғаны анықталған.
– Сотта айыпталушылардың кінәсі жәбірленушінің айғақтарымен, сараптамалық қорытындылармен, куәлардың жауаптарымен, аудио-бейнежазбалармен және қылмыстық іс материалдарындағы өзге де дәлелдермен толық расталды. Сот жеңілдетуші мән-жай ретінде сотталушылардың кәмелетке толмаған балаларының бар екенін ескерген. Ал ауырлататын жағдайлар тіркелмеген, – деп хабарлады соттың баспасөз қызметі.
Нәтижесінде жәбірленушінің жұбайы адамдар тобымен алдын ала сөз байласу арқылы адам ұрлау (ҚК 125-бабы 2-бөлігі 1-тармағы), психиатриялық стационарға заңсыз жатқызу (ҚК 127-бабы 1-бөлігі) және оқ-дәрілерді заңсыз сақтау (ҚК 287-бабы 3-бөлігі) баптары бойынша кінәлі деп танылды.
Сот үкімімен күйеуі 9 жыл мерзімге бас бостандығынан айырылды. Ал оның екі сыбайласы 8 жылдан сотталды. Сонымен қатар сот шешімі бойынша күйеуі жәбірленушіге келтірілген моральдық зиян үшін 5 миллион теңге өтеуге міндеттелді. Қалған екі сотталушының әрқайсысы 3 миллион теңгеден өтемақы төлеуі тиіс.
Үкім әзірге заңды күшіне енген жоқ.
Айта кетейік, бұған дейін Тараз қаласында 13 жастағы қызды аялдама маңынан ұрлап кетуге әрекет жасалғаны жөнінде хабарланған болатын.
