Талдықорған әкімдігінде қала әкімінің орынбасары Қуаныш Сейтінбетовтің төрағалығымен төтенше жағдайлардың алдын алу және тұрғын үй қорын инвентаризациялау мәселелері бойынша жиын өтті. Басты назарда – қаланың сейсмикалық қауіпсіздігі және 1960–1970 жылдары салынған ескі мерзімді үйлердің техникалық жағдайы.
Жиын барысында азаматтық қорғау күштері төтенше жағдай кезінде жедел әрекет ету, құтқару жұмыстарын ұйымдастыру, халықты қабылдау пункттерін дайындау және зардап шеккендерге медициналық көмек көрсету әзірлігі пысықталды. Жауапты қызметтердің өзара іс-қимылын үйлестіріп, қатердің алдын-алу шараларын күшейту қажеттігін атап өтті.
Сонымен қатар биыл жұмыстар жалғасып, өткен ғасырдың 60-70 жылдары салынған ескі тұрғын үйлерді түгендеу, олардың нақты техникалық жай-күйін зерделеу және мәліметтерді жүйелеу бағыты жүзеге асырылуда. Жиын қорытындысы бойынша Қуаныш Сейтінбетов жауапты мекемелерге азаматтық қорғау дайындығын тұрақты бақылауда ұстауды, төтенше жағдайдағы іс-қимылды пысықтауды және ескі тұрғын үйлерді түгендеуді жүйелі түрде жүргізуді тапсырды.
«Жетісу-Ақпарат».
