Жетісу жерінде шығармашылық иелеріне қолдау ерекше. Сонау 2006 жылдан бері жергілікті ақын-жазушылар мен суретшілердің, композиторлардың жайнақ туындыларын кітап етіп шығару, оны оқырманға ақжолтайлау жүйелі жолға қойылған. Содан бері желісі үзілмей келе жатқан игілікті іс биыл да жалғасын тауып, Жетісу облысы әкімінің қолдауымен 11 автордың тарихи, әдеби, ғылыми кітабы жарық көрді.
Тіл сарайында өткен тұсаукесер салтанатын жүргізіп отырған облыстық мәдениет, архивтер және құжаттама басқармасының басшысы Қуаныш Сүлейменов кітап ұлттық руханияттың ең мәнді, мазмұнды қазынасы екенін айшықтады.
Алғашқы болып сөз алған облыс әкімінің орынбасары Диас Есдәулетов руханиятқа олжа салған қаламгерлерді төл туындыларының жарық көруімен құттықтады.
Өз кезегінде Диас Рахметұлы, халықаралық «Алаш» әдеби сыйлығының иегері, айбоз ақын Әміре Әрін, облыстық ардагерлер кеңесінің төрағасы Ермек Келемсейіт және «Шаңырақ иесі», «Жетім жүрек» кітаптарының авторы, белгілі қаламгер Әли Ысқабай облыс әкімінің қолдауымен жарық көрген кітаптардың ленасын қиды.
Қазақ әдебиеті өркениетке жол салған алып мемлекеттердің әдебиетінен ешқашан төмен тұрмайды. Өйткені қазақ о бастан кеудесіне қазына жиған, білімді жұрт. Кіл классиктердің өзін тізіп өтсек, талай жерге көш шалдыратынымыз анық. Бұл тұрғыда бүгінге дейін әдебиеттің әр жанрында қалам тартқан, 20-дан астам кітап жазған Әли Ысқабайдың «Шаңырақ иесі» прзалық кітабы мен өлеңдері топтастырылған «Жетім жүрек» туындысы жинақ болып басылды. Рухани шарада сөз алған Әли Әпекұлы алдымен қаламгерлерге тынбай жазу керек екенін айтып, ақын-жазушы, өнер адамдарын қолдап келе жатқан облыс басшылығына алғысын білдірді. Өз кезегінде сөз алған рухани шара меймандары мен Қазақ журналистикасының қара нары болған Нұртілеу Иманғали ұлының жары, «Бау-қуатты болайық!» кітабының құрастырушысы Қарлығаш Табулдинова, «Таң самалы» жинағының авторы Гүлнар Демеуова, Әбілхан Қастеевтың 120 жылдығына орай жарық көрген «Өмір мектебі» кітабының авторы Сабит Молдаханов сөз алып, шығармашылығы туралы сөз қозғап, лебіз білдірді.
С. Сейфуллин атындағы орталық кітапханасының ұйымдастыруымен «Жақұт мекен – Жетісу»кітап көрмесі көрермен назарына ұсынылған, тың туындылардың тұсауы кесілген шара барысында кітап авторларының сөзіне жазылған ән де әуеледі.
Маржан Байғалиева,
Облыстық С. Сейфуллин атындағы орталық кітапханасы оқырмандарға қызмет көрсету бөлімінің меңгерушісі
