Жаркент қаласында аудандық мәдениет, тілдерді дамыту және спорт бөлімі мен өңірдегі еңбек ардагерлері ұйымының ұйымдастыруымен «Батагөй» атты байқау өткізілді. Ұлтымыздың ұрпағын ақ ниет, жүрекжарды тілегімен тәрбиелеуді мирас еткен дәстүрін жастарға насихаттауды мақсат еткен шараға аудандағы барлық округтерден алдын ала іріктелген 10 батагөй қария қатысты.
Аудандық ардагерлер ұйымының төрағасы Тоқтарбай Керімқұлов сөз сөйлеп, байқау тек жарыс, жүлде үшін емес, өңірдегі мектептерден арнайы шақырылған жоғары сынып оқушыларына ата салтымыз бен дәстүрімізді танытуға, тек қазақ халқында бар кез келген жақсы істі үлкеннің батасымен бастайтын әдет-ғұрпымызды сақтап қалу мен дамытуға бағытталғанын айтып өтті.
Байқауда қатысушыларға өзі дайындап келген және тосын тақырыпта бата беру шарты қойылды. Сонымен бірге әділқазылар алқасы батагөйлердің сахнада ұстау мәдениетін, тақырыпты аша білу шеберлігін, бата сөздерінің жатықтығын, ұйқасын, ұлағатын сараптады. Нәтижеде Жаркент қаласынан қатысқан Қабиден Жайшыбеков қария байқаудың барлық шарттарын үздік орындап бірінші орынға ие болды. Шолақай ауылының батагөйі Бердіқожа Жанаманов пен Бағдәулет Әшкеев екінші, Көкталдан келген Сайлау Солтанқұлов, Басқұншы ауылдық округінің батагөйі Нөкен Туғанбаев және талдылық Әбдірахман Көпесов үшінші орынды місе тұтты. Жалпы бата додасына қатысқандар байқаудан құралақан қайтқан жоқ.
Мырзағали НҰРСЕЙІТ
Панфилов ауданы.
