Талдықорған қаласы №17 орта мектептің 1 «Ә» сыныбында ерекше әрі қуанышты мереке – «Әліппемен қоштасу» тәрбие сағаты ұйымдастырылды. Бұл күні кішкентай бүлдіршіндер үшін маңызды оқиға болды, өйткені олар алғаш мектеп табалдырығын аттап, «Әліппе» оқулығын аяқтап, білім жолының алғашқы кезеңінен өтті.
Қыркүйек айында алғаш рет мектепке келген кезде, балалардың қолдарына тұңғыш ұстаған кітаптары «Әліппе» болған еді. Ал, желтоқсанның 23-і күні, осы оқулықпен қоштасып, өздерінің алғашқы білім белесіне жетті. Әліппе – балалардың білім әлеміне алғаш қадам басатын, ана тілінің ғажайып әрі терең әлемін ашатын маңызды құрал.
Мереке барысында 1 «Ә» сыныбының оқушылары өз білімдерін, өнерлерін көрсете отырып, осы жетістіктерімен бөлісті. Олар қызықты сахналық қойылымдар мен шығармашылық жұмыстарын ұсынды. Балалардың қуанышты жүздерінен олардың осы кезеңді қалай сезінгені айқын көрінді.
Мерекенің соңында сыныбының жетекшісі, ұлағатты ұстаз Даулеткелдинова Салтанат Жинактиевна бүлдіршіндерді шын жүректен құттықтап, алдағы өмірлеріне сәттілік тіледі. Ол балаларға «Әліппені» сәтті аяқтағаны үшін құттықтау қағазын табыс етті. Бұл қуанышты сәт – олардың мектептегі алғашқы жетістігі, білім әлеміне жасаған алғашқы үлкен қадамдары.
«Әліппе» бітіру – балалар үшін тек білім алудың бастамасы ғана емес, алдағы уақытта көптеген жетістіктерге жететін маңызды кезеңдердің бірі. Осы сәтті шараны ұйымдастырып, балаларға үлкен қуаныш сыйлаған ата-аналарға да алғыс айтылды. Өйткені, олардың қолдауы мен ынта-жігері арқасында бүлдіршіндер өздеріне осындай жетістіктерді бағындыра алды.
Мұндай мерекелер оқушылардың білімге деген қызығушылығын арттырып, оларды әрі қарайғы оқу жолында шабыттандырады.
№17 орта мектептің ұжымы бүлдіршіндерге сәттілік тілей отырып, білім жолындағы жетістіктерінің көп болуын тілейді.
Айгүл БАЙБОСЫНОВА
