Талдықорғандағы Салтанат сарайында Жетісу облыстық мәдениет, архивтер және құжаттама басқармасы өткен жылы атқарылған жұмыстарының қорытындысы және 2025 жылдың міндеттері туралы алқа мәжілісін өткізді.
Облыс әкімінің орынбасары Диас Есдәулетов төрағалық еткен алқа отырысына аталған салаға жауапты аудан, қала әкімдерінің әлеуметтік салаға жетекшілік ететін орынбасарлары, басқармаға қарасты облыстық мекемелердің басшылары, аудандық, қалалық ішкі саясат, мәдениет, тілдерді дамыту және спорт бөлімдерінің басшылары, өңірдегі мемлекеттік архив филиалдарының, аудандық, қалалық Мәдениет үйлерінің, кітапханалардың, музейлердің директорлары қатысы.
Облыстық мәдениет, архивтер және құжаттама басқармасының басшысы Қуаныш Сүлейменов былтыр мәдениет саласы жақсы нәтиже көрсеткенін атап өтті. Көптеген мерейтойлық мерекелер республикалық деңгейде ұйымдастырылғанын, соның ішінде Ілияс Жансүгіровтің, Әбілхан Қастеевтің мерейтойы мен «Biken» екінші халықаралық фестивалі негізгі шаралардың бірі болғанын жеткізді.
– Биыл 2 халықаралық, 3 республикалық фестиваль мен байқаулар, Шоқан Уәлихановтың 190 жылдығына орай республикалық ғылыми-тәжірибелік конференция, Бақтыбай Жолбарысұлының 190 жылдығына республикалық ақындар айтысын өткізу және «Жұмысшы мамандықтар жылы» аясында мәдени шараларды ұйымдастыру жоспарланып отыр. 10 Мәдениет нысанының жаңа құрылысына 4 млрд. 791 млн. теңге бөлінді. Оның ішінде Ақсу ауданындағы Матай, Есеболатов, Арасан, Көксу ауданындағы Жарлыөзек, Алакөл ауданындағы Көлбай, Екпінді, Балапанов, Талдықорған қаласындағы Еркін ауылының мәдениет үйі, Кербұлақ аудандық кітапханасы және Алакөл ауданындағы Қазақстан ауылдық блокты-модульдік клубы бар. Сондай-ақ, биылғы жылға Панфилов ауданы Тұрпан ауылдық және Қаратал ауданы Көкпекті ауылдық Мәдениет үйлерінің күрделі жөндеу жұмыстарына жергілікті бюджеттен 321 млн. 699 мың теңге және 17 блокты-модульдік клубтардың жаңа құрылысының жобалау-сметалық құжаттамасын (ЖСҚ) дайындау үшін 145 млн. теңге қарастырылды, – деді ол.
Бүгінде құжаттар мен кітапхана қорларын цифрландыруға үлкен мән беріліп отырғанын басқарма басшысы атап өтті. Бұл мәселеде жеке кітапханалардың жұмысында кемшіліктер бар екенін, оларды жақын арада жою керектігін де сөз етті.
Әрі қарай Диас Рахметұлы облыстың барлық аудандары мен екі қаласы әкімдерінің атқарған жұмыстары туралы қысқаша есептерді тыңдады. Әр баяндамашы мұқият тыңдалып, оларға сұрақтар қойылды.
Жиында Панфилов ауданына шетелдік туристерді тарту мәселесі көтерілді. Сонымен қатар «Тасбақа» тауының тағдырына байланысты сұрақ қойылды, онда ерте темір дәуірінің және басқа дәуірлердің көптеген петроглифтері табылғаны туралы сөз қозғалды. Қызылтастағы тауда алдағы уақытта еріктілер мен жастар ұйымдарын тарта отырып, көптеген іс-шаралар өткізу жоспарланатыны айтылды.
Кездесу соңында Диас Есдәулетов кеңестің барлық қатысушыларына сәттілік тілеп, Жетісу өлкесінің мәдениеті мен өнерінің өркендеуі үшін жемісті жұмыс істеуге шақырды.
Медет ЖҰМАБАЙ
