Ел үшін тер төгіп, атқа мінген абзал азаматтардың аты өшпеуі керек. Олардың істеген істерін дәріптеу арқылы кейінгі буын тәрбиеленбек. Талдықорған төрінде «Жетісу қыраны» Еңбекке жоғары қабілеттілік пен ісіне деген адалдық: Болат Тәкеновтың жолы» атты шара өтті.
Мемлекеттік қызметке, құрылыс саласына еңбегі сіңген Болат Тәкеновтың өмірден өткеніне биыл 2 жыл. Тұғырлы азаматты қызметтес әріптестері, Сенат депутаттары, мемлекеттік қызметтің ардагерлері, шәкірттері, құрылыс саласында еңбек ететін мемлекеттік қызметшілер мен ауылдық округ әкімдері ұлықтап, үлгі тұтатын тұлға ретінде еске алды. Аталған шара Болат Долдаұлының жұбайы Райхан Маратқызының, ҚР Мемлекеттік қызмет істер агенттігінің Жетісу облыстық департаментінің және ҚР Президенті жанындағы Мемлекеттік басқару академиясының мұрындық болуымен ұйымдастырылды.
Мұндағы басты мақсат – ерен ердің ғұмырындағы мемлекеттік қызмет, құрылыс саласындағы тынымды істерін кейінгіге жеткізу. Ардақты азаматтың жетістіктерін тізбелеп, кәсіби қызметіндегі атқарған еңбектерін еске алу.
– Болат мемлекеттік қызметтегі адал азаматтардың бірі болды. Ол кезде күні-түні жұмыс істеуші едік. Кей күндері күндіз тамақ ішуге қолымыз тимейтін. Кешке сағат 8-9-да үйге шаршап келіп, мұршамыз болмай ұйықтап қалатынбыз. Түрлі қиындықты басынан өткерген адамдарды құрметтеп, басқаларға үлгі ретінде көрсету керек. Мен соған қуанып жатырмын. Менің досым барлық қошеметке лайық жан еді, – дейді Алматы облысының бұрынғы әкімі Амандық Баталов.
Жиынға қатысушылар еліміздің әлеуметтік-экономикалық дамуында өзіндік қолтаңбасын қалдырған, еселі еңбегімен елге қызмет еткен азаматтардың бірегейі – Болат Долдаұлының өмір жолы, кәсіби қызметі туралы естеліктерімен бөлісті. Шара соңында ауылдық округ әкімдерінің арасында өз ауылын дамытуға бағытталған «Үздік жоба» сайысының жеңімпаздары марапатталды.
Медет ЖҰМАБАЙ