Әке – ұлы есім. Бір кішкентай отбасынан бастап, үлкен бір мемлекетті басқарып қана қоймай, оны қорғап көзінің қарашығындай сақтау әкенің міндеті әрі борышы. Әкені асқар тауға теңейтін дана халқымыз, оның ұлылығымен қадір-қасиетін ұрпақтан-ұрпаққа ұғындырып келеді.
Асыл анам бала күнімнен «Әкең ұрысады», «әкеңе айтам» деген сөздері арқылы әке беделінасқақтатты. Отбасында үш баламыз. Әкем жеке шаруалықтың иесі, анам әлеуметтік қызметкер. Осындай толыққанды отбасында ержетіп, ата-анамның бар мейірім мен махаббатына бөленіп өскен менде арман жоқ. Отбасында қатып қалған қағида, қыз баланың тәрбиесіне анасы, ұл баланың тәрбиесіне әкесі жауапты. Сол себепті менің тәрбием тікелей әкеме байланысты болды. Кенжетай болғандықтан еркелікпен көп қателіктерге бой алдырғаным рас. Бірақ, әкем сол қателіктерім арқылы өмірден сабақ алуды үйретті.
Асқар тау әкем «Балаларым қатарынан қалмасын. Жоқшылықты сезінбесін» деп қолынан келгенше бізге жақсы өмір сүруге жағдай жасады. «Әкенің малы, балаға мал болмайды» дейді ғой. Соны маған әкем жақсы түсіндірді. Сол себепті, мен өмірде кездесетін сынақтарды қасқайып қарсы алуды үйрендім. Бұл әке тәрбиесінің бастауы. «Әкем мені құтқарады», «әкем бар», «әкеме айтам» деген сөздерді ешқашан да айтып көрген емеспін.
Жігітке тән барлық қарым-қабілетті әкем бойыма дарытты. Қатал тәрбие, талапшылдық, жауапкершілік арқылы ержеттік. Әкем екеуіміз бірге бір жаққа шыққан кезде ол кісі маған өзінің жеткен жетістіктерін емес, өзінің жіберген қателіктерін жиі айтады. Сол кезде әкенің жүзінен қателіктері қалай жанын жегенін, сондай қателіктер жасамау керектігін терең түсінемін. Әкемнің бар байлығы, жеткен жетістігі – ұлықты ұлы, қылықты қызы.
Әкенің мықты мектебінен тәлім алып, үлкен өмірге аяқ басып, шаңырақ көтердім. Отбасымда көрген тәлімді, тәрбиені, сыйластықты шағын отаныма сіңірудемін. Зайыбым кішкентай қызыма әкеге деген құрметті үйретіп қойған. Небәрі 1 жастан асқан кішкентай Мединамның әкеге деген махаббаты, көңілі тым бөлек. Мен осы сәттен бастап әке болудың қаншалықты жауапты екенін түсіндім. Әке берген тәрбиені мың мектеп те бере алмайтынын ұқтым.
Әкенің мейірімі,басыңнан сипап күле қарағаны жаныңа жаз самалындай әсер етеді.Құшағына еніп көрші,ол құшақтан босағың келмейді.Әкенің жылы жүрегінен еркелетіп айтқан әр сөзді жүрегіңнің бір бөлігіне барып мәңгілік өнеге болып құйылып жатқандай.Осындай мейірімді,жылы жанды адам мені мына өмірдің кейбір қиыншылығынан қорғап,асқар белдерінен демеп асырып,сылдырап аққан бұлағынан нәр беріп,алып бәйтерегімен өмірдің аптабынан қорғап тұрған асқар тау сияқты көрінеді. Әке – әркімге де асқар тау, ана – өмір сыйлап,нәр берер бұлақ, бала – жағасындағы балауса құрақ.Әр әке арманы – құрақтың өсіп қатаюы, шыбықтың шыңдағы шынар болуы,балапанын өз елінің аспанында қалықтар қыранға айналуы деп білемін. Ендеше, әкелер арманы орындалсын деп тілеймін.
Қуаныш МҮСЛІМҰЛЫ,
«Koksu jastary» филиалының жетекшісі
Көксу ауданы
