Жетісу облысында 11 мемлекеттік архив жұмыс істейді. Оның ішінде 1-уі облыстық, қалған 10-ы аудандық филиал. Жалпы мұрағатта Талдықорған қаласы аумағындағы мекемелер мен ұйымдардың құжаттары сақталған. Ондағы қызметкерлер «Құжаттардың бірыңғай электрондық архиві» бағдарламасы аясында қыруар шаруа тындыруда.
Архив саласындағы цифрландыру – бұл құжаттарды сандық форматқа көшіру және заманауи технологияларды қолдана отырып, оларды сақтау. Сандық көшірмелер олардың ұзақ уақыт сақталуын қамтамасыз етеді. Қазіргі уақытта 13 792 іс, яғни, 691 742 парақ сканерден өткізіліпті. Сала мамандары күніне 500-800 парақты сканерлейтіндерін айтады.
– Біз көне құжаттармен жұмыс істегендіктен барынша мұқият болуға тырысамыз. Әуелі сканерлейтін құжаттың форматын табамыз. Сканерлегеннен кейін флешкаға, содан барып серверге саламыз. Мұндай көшірмемен жұмыс істеу адам денсаулығына зиян. Сондықтан 2 адам алма-кезек ауысып жұмыс істейміз, – дейді архив қызметкері Бауыржан Қалқаманов.
Облыстың архив қоймаларында 2 855 қор 722 808 сақтау бірлігі бар. 470 679 басқару құжаттамасы, 2275 жеке текті құжаттар, 1412 ғылыми-техникалық құжаттама, 4135 фотоқұжаттар, 111 аудиовизуалды құжаттама және 244 196 жеке құрам бойынша құжаттар сақтауда тұр.
– Мемлекеттік «Құжаттардың бірыңғай электрондық архиві» бағдарламасы аясында, архив қорындағы құжаттарды сандық форматқа көшіру ақпараттық жүйесін енгізу жұмыстары басталды. Бұл күні Жетісу облысының мемлекеттік архиві және оның филиалдары толық заманауи планетарлық сканермен қамтамасыз етіліп отыр. 2019 жылдан бастап 2024 жылдың 11 айына дейін 68 қор, 56 721 іс, 4 миллионға жуық парақ сканерден өткізілді. Аталған жұмыс алдағы уақытта да жалғасын табады, – дейді Жетісу облысының мемлекеттік архивінің бөлім басшысы Кенже Қанапиянова.
Медет ЖҰМАБАЙ
