Қаратал ауданына қарасты Кәлпе ауылының түлегі, сексен жастағы ақсақал Ринат Идрисовты өңіріміздің спортшылары, сала ардагерлері мен жанкүйерлері жақсы таниды. Тәлімгерді ел жоғары бағалайды, мақтаныш етеді. Ел алдында мәртебеге жету, сый-құрметке бөлену оңай емес. Ол – отты жүрек, құрыш білек және қажымас еңбек арқылы ғана келетін бақыт. Атамыз қазақ: «Бақыт кілті – еңбекте» дегенді бекер айтпаған. Ендеше, әйгілі спортшы, мықты жаттықтырушы, отбасының қорғаны Ринат Идрисовтың абыройға жету жолы жайлы ой толғайық.
Ол 1958 жылы Үштөбе қаласындағы жұмысшы жастар мектебін тамамдап, аудан орталығындағы киіз үй жасау фабрикасына спорт ісі жөніндегі нұсқаушы қызметіне қабылданады. Көп балалы отбасында тәрбиеленіп, оңы мен солын ерте таныған алғыр жігіт ауданның спорт саласындағы абыройын биіктетеді.
Ринат 1968 жылы Қазақ мемлекеттік дене тәрбиесі және спорт институтының сырттай бөліміне оқуға түседі. Жұлдызы жанған азамат Талдықорған қаласындағы «Еңбек» ерікті спорт қоғамына жұмысқа шақырылады. Сол жылы қайтадан құрылған облыс үшін спорт саласына жігер-күші мығым, тепсе темір үзетін мамандар ауадай қажет еді. Ринат осы ортадан өзінің тыңғылықтығын, кәсібіне адалдығын танытады. Волейбол спортына жете машықтанған, осы бағытта елеулі табыстарға қол жеткізген Ринат Идрисов 1974 жылы Талдықорған қаласындағы зоотехникалық-малдәрігерлік техникумына қызметке ауысады. Әуелде қатардағы пән оқытушысы, бірер жылдан соң дене тәрбиесі кабинетінің меңгерушісі қызметіне көтеріледі. Осынау білім ордасында 12 жыл бойы еңбек еткен жаттықтырушы-ұстаз білім ордасында тамаша спортшыларды тәрбиелеп, баптап, өзінің де, жас өрендердің де болашағына жарқын жол көрсетеді. Қызметтік жолы өседі. Бұлай дейтін себебіміз,1986 жылы Ринат Идрисов облыстық волейболшылар құрама командасының жаттықтырушысы қызметін қолға алады. Ал оқу орнындағы спортшы жастар өздерінің жаттықтырушысы қалыптастырған спорттық жеңісті дәстүрді жалғастырды.
– Мен зоотехникалық-малдәрігерлік техникумында қызмет атқарған жылдарда білім мекемесінің директоры Мұрат Қалықтың спортқа жанашырлығына тәнті болдым. Спорттың дамуы үшін алдымен қаржы, содан соң материалдық база қажет. Осылар болмаса ілгері жылжу, табысқа жету мүмкін емес. Ал біздің директор мұны жанымен сезінді, – дейді ақсақал.
Оқу орнында бірер жылда екі спортзалы мен стадион салынып, нәтижесі игі істерге жетеледі. Облыстың волейболшы жастар құрама командасын 1986-1990 жылдар аралығында басқарып, жаттықтырған Ринат Идрисов іскерлік қабілетін, білімі мен тәжірибесін әр қырынан жарқырата көрсетті. Әсірелеп айтқанымыз емес, шындықты бүкпесіз жайып салғанымыз бұл. Осы сөзіміздің дәлелі, 1989 жылы Талдықорған облысының волейболшы жігіттері республика чемпионы атағын жеңіп алды. Бұл облыс спортындағы ірі табыс, тың жетістік еді. Содан бері 30 жылға жуық уақыт өтсе де мерейді өсірген жеңістер жайлы әңгіме әлі де айтылып жүр. Ел волейболшылары арасындағы дүбірлі жарыстардың өрісі кеңейіп, ойыншылар Ресейде бірнеше дүркін жарысқа қатысты. Осынау жекпе-жектерде Талдықорған облысының жігіттеріне төтеп берер мықтылар табылмады. Ресейлік волейболшылардың өзі бізге қарсылық таныта алмай, екінші, үшінші орындарға ығыстырылды. Сөйтіп, спортта жұлдызы жарқыраған Ринат және оның командасының ойыншыларына «КСРО Спорт шебері» мәртебесі берілді. Бұл қатарда Асқар Шалқыбеков, Райым Идрисов, Василий Фисиков, Валерий Прибытков, Андрей Красовскийлер бар. Спортта аты шыққан бұл азаматтар бүгінгі күні де жұмыстарын жемісті жалғастырып, волейболды дамытуға еңбек сіңіріп жүр. Олар қазір де бұрынғы жаттықтырушылары Р. Идрисовтың ақыл-кеңестерін тыңдап, спорттық жарыстарда бірігіп отырады.
Волейболшы жастардың көрнекті жаттықтырушысы Ринат Идрисов 1990 жылы елуден асқан шағында өзі ұзақ жыл қызмет істеген білім ордасы – Талдықорған зоотехникалық-малдәрігерлік техникумына қайта оралып, сол жерден зейнетке шықты. Бірақ бұрынғы еңбек ұжымы, қала мен облыстағы спорттық мекемелер оны құрметтеп, спорттық шараларға шақырып тұрады. Мұндайда ол әдемі киініп, медальдарын тағып, көпшілікпен бірге жүреді.
Өмірінің жарты ғасырдан астамын волейбол ойынын дамытуға, жастарды тәрбиелеуге арнаған спорт ардагері өзінің ежелгі дос-жарандары Виктор Еремкин, Владимир Очеретияный, Садық Сқақбаев, Анатолий Боковой, Мырзахан Мәсімов, тағы басқа волейболшылармен сағына қауышып, амандық-саулық білісіп, хабарласып тұрады.
Өзінен үлкенге іні, жасы кішіге аға спорт ардагері Ринат ақсақалдың сүйікті жары Гүлхан ханым екеуінің (суретте) заңды некелеріне, яғни, көтерген шаңырақтарына 56 жыл толыпты. Балаларынан 9 немере, 9 шөбере сүйіп, әр таңды қуана қарсы алып, шаттана шығарып салуда. Екеуінің тілейтіні – заманның тыныштығы, елдің амандығы. Оларға тілегіңіз қабыл болып, қосағыңызбен қоса ағарыңыздар демекпіз.
Болат БИСҰЛТАНҰЛЫ,
Қазақ журналистика- сының қайраткері
