Өскемен төрінде волейболдан әйелдер командалары арасында өтіп жатқан Қазақстан кубогының топтық кезеңі мәресіне жетті. Талдықорғандық «Жетісу» волейбол клубы «А» тобындағы барлық қарсыластарын айқын басымдықпен жеңіп, келесі кезеңге бірінші орынмен жолдама алды, – деп хабарлайды 7-su.kz ақпараттық порталы.
Марко Гршич бастаған жерлестеріміз турнир барысында керемет ойын өрнегін көрсетіп, қарсыластарына бірде-бір сет берген жоқ. Енді ширек финалда талдықорғандық арулар «Б» тобынан шыққан «Алматы» ұжымымен күш сынасады. «Алматы» бұған дейін «Берел», «Қуаныш» және «Ақтөбе» командаларымен бәсекеге түскен болатын.
Топтық кезеңнің үш ойынында «Жетісу» ойыншылары техникалық шеберлік пен командалық ұйымшылдықтың жоғары деңгейін байқатты. Статистикалық мәліметтерге сүйенсек, команданың басты басымдығы – доп беру (эйс) мен тосқауыл қоюда болып тұр.
- Эйс шеберлері: Үш ойында жетісулықтар барлығы 25 эйс жасады. Дарья Шаргородская 5 рет қарсыласты қапы қалдырса, Елизавета Мейстер мен Перизат Нұрбергенова 4 ұпайдан еншіледі. Кристина Аниконова мен Татьяна Никитина 3 эйстен иеленді.
- Сәтті тосқауыл: Тор алдындағы қорғаныста «Жетісу» 30 рет нәтижелі әрекет жасады. Валерия Якутина 6, Наталья Борисенко 5 ұпай әкелсе, Перизат Нұрбергенова, Кристина Аниконова, Татьяна Никитина 4 ұпайдан жинады.
Ойындардың үздік ойыншылары:
- «Қайсарға» (Қызылорда) қарсы: Татьяна Никитина – 14 ұпай (3 эйс, 8 шабуыл, 3 тосқауыл).
- «Тұранға» (Түркістан) қарсы: Перизат Нұрбергенова – 16 ұпай (4 эйс, 8 шабуыл, 4 тосқауыл).
- «Қарағандыға» қарсы: Кристина Белова – 10 ұпай (10 шабуыл).
Бүгін турнир кестесіне сәйкес волейболшылар тынығады. Ал ертеңнен бастап шешуші ширек финалдық бәсекелер бастау алады. Жерлестерімізге сәттілік тілеп, жеңіс биігінен көрінуіне тілектеспіз!
