Оқи отырыңыз
Қазақстан Республикасының Президенті Нұрсұлтан Назарбаев «Төртінші өнеркәсіптік революция жағдайындағы дамудың жаңа мүмкіндіктері» атты Жолдауында әлем Төртінші өнеркәсіптік революция дәуіріне, технологиялық, экономикалық және әлеуметтік салалардағы терең және қарқынды өзгерістер кезеңіне қадам жасағандығын атап көрсетті. Инновациялық технологияның тиімділігі жөнінде кеңінен сөз етті. Қолданыстағы технологияны жаңарту – экономикалық дамуға даңғыл жол ашатыны рас. Заманауи технологиясыз кәсіпорындарды елестету мүмкін емес. Өнеркәсіптік революция отандық технологияның қарыштап дамуына оң серпін береді. Елбасының бұл бастамасы барша жұртшылықтың ойынан шықты
Бастама Жетісу өңірінде де қарқынды жүзеге асырылуда. Оған облысымыздың орталығы Талдықорған қаласының көз ілеспес жылдамдықпен көркейіп, дамып келе жатқаны дәлел. Жалпы халықтың игілігіне жасалып жатқан қамқорлықты әрқайсымыз сезінудеміз. Атап айтқанда, жаңа ғимараттардың бой көтеруі, халыққа қызмет көрсету орталықтарының қолданысқа берілуі, демалыс алаңдарының ашылуы, тұрғын үйлердің көптеп салынуы өңіріміздің өрісті дамығандығының белгісі.
Аумақтың көз ілеспес жылдамдықпен алға жылжуы елдің еңсесін тіктеуде. Облыстар арасындағы бәсекелестікті арттыруда. Осы өңірде тұрамын, еңбек етемін, отбасын құрамын деген жастардың ертеңгі күніне деген сенімін ұштауда. Әлеуметтік жағдай жасай отырып, жас ұрпақтың бойына терең білім мен рухани құндылықтарды сіңіруге күш салынуда. Жолдауда айтылғандай жастарды ғылыми-зерттеу саласына және инновациялық өндірістік технологиялық ортаға бейімдеу қолға алынуда.
Заманауи технологияларды меңгеру үшін тіл білу керек. Ол үшін жас ұрпақ үш тілді жетік меңгеруі тиіс. Мемлекет басшысы үш тілді еркін меңгерудің маңыздылығына ерекше тоқталды. Яғни, Қазақстанның болашағы үш тілді еркін меңгеруде екендігін қадап айтты. «Қазақ тілі ғұмырлы болсын десек, оны қазіргі заманға лайықтау қажет», – деді Президент. Бұл бағытта да, яғни, тілді (мемлекеттік, орыс, ағылшын) меңгеруге облысымызда барлық жағдай жасалған әрі тегін оқытылады.
Сондай-ақ, бүгінгі Еуропада да көп тілді меңгерушілік жалпыға ортақ норма болып саналады. Бірнеше тілде еркін сөйлей, жаза білетін қазақстандықтар өз елінде де, шетелдерде де бәсекеге қабілетті тұлғаға айналады. Елбасының Жолдауда айтқан қазақ тілінің маңыздылығын арттыру жайындағы тапсырмасы алдағы атқарылар ісімізді жандандыруға оң ықпалын тигізбек. Нұрсұлтан Назарбаев терминдерді қазақ тіліне аудару барысында кездесетін мәселелерге де тоқталды. Мемлекет басшысы соңғы жылдары әлемде қалыптасқан 7 мың терминнің қазақ тіліндегі аудармасы күлкі туғызатынын айтып, терминология тұрғысынан қазақ тілін халықаралық деңгейге жақындату қажет екенін жеткізді. Ал латын графикасына көшу аталмыш мәселені реттеуге мүмкіндік беретініне сенім білдірді.
Жолдауда жалпы қоғамымыздың ілгерілеуі жайлы тұщымды тұжырым жасалды. Алдағы мақсат – маңызды мәселелер бойынша нақты шараларды қолға алу.
Олай болса, Елбасының «Төртінші өнеркәсіптік революция жағдайындағы дамудың жаңа мүмкіндіктері» атты мақаласындағы ұсыныстар, айтылған ойлар өмірімізге жаңаша серпін беретін батыл қадам екені сөзсіз.
Айдар БАШБАЕВ,
облыстық тілдерді дамыту басқармасының басшысы
