Тарихтың бетін парақтасаң, есімін алтын әріппен жазған қыздарды жиі кездестіреміз. Солардың шырқау шыңында Тұмар ханшайым тұр емес пе? Қыран мінез қыздардың бойынан қандай да бір ұшқынды байқай қалсақ, Тұмардың ұрпағы, өжет, қайсар деп жақсылыққа теңеп жатамыз. Иә, бұл біздің бойымызға біткен асыл қасиетіміздің бірі. Жақсылыққа жорып, кімді болса да адалдыққа тәрбиелейтін әдетіміз.
Одан бері шығыстың қос шынары атанған Мәншүк пен Әлияны қалай ұмытасың? Қарсы келген дұшпанды жайратып салып, Отан үшін қаймықпай күрескен қыздардың ерлігі ел аузынан түскен емес. Түспейтіні де анық. Солай болып қала да береді. Әлімсақтан батырлықтың ақ найзасын шаншыған қос батыр ел үмітін абыроймен ақтап, өздерінің жауынгер, болаттай берік, алмас қылыштай өткір елдің ұрпағы екенін қан майданда дәлелдеді. Одан бері тәуелсіздік жолында құрбан болған Ләззат пен Сабираның ерлігін ешкім де ұмытқан емес. Қар жастанып, мұз төсенген қос қыздың жаққан алауы әлі өшкен жоқ. Мұзға жаққан алауды сол кездегі солақай саясаттың екпіні қанша үрлесе де өшіре алмады. Керісінше, одан ары лаулатып алды. Сондағы тұтанған қызыл жалын бүгінгі жастардың бойтұмарына айналды. Қызуына жылынып қуат алған жас ұрпақ әпкелері салған қасқа жолмен жүріп келеді. Алшаң басып, бейбіт күннің беделін асырып, берекесімен ел мәртебесін асқақтатуда.
Өткен тарихты неге қозғады десеңіз, нақты әңгімеге көшейін. Өткенді еске алмай, болашаққа қарау мүмкін емес. Ендеше кешегі Тұмардан қалған қайсарлық қайта алаулады. Мұхит асып, ел үмітін арқалап аттанған үш қызымыз қиындыққа қайыспай қарсы тұрып, қола жүлдені елге әкелді.
Мен атаған арулар майдан даласында ерлік жасаған болса, енді айтайын деп отырған үш қыз бейбітшілік майданында айдарынан жел ескен қыран қыздар. Ол Рио Олимпиадасынан толайым табыспен оралған балуан Эльмира Сыздықова, ауыр атлет Жазира Жаппарқұл және боксшы Дариға Шәкімова. Ең бірінші Жазирадан бастайық. Зіл батпанды басына көтеріп, жанкүйерге қарап езу тартып жымиғаны ел есінен кетпес көрініске айналды. Ауыртпалықты білдірмейтін, қиналғанды көрсетпейтін, көз жасын қарсыласқа байқатпайтын өр мінез тек біздің қарындастардың ғана қолынан келеді. Алтынға қолы жетпеді дегені болмаса, күміспен күптелген Жазираның ерлігі кімге болса да үлгі. Олай дейтінім, ол Олимпиада ойындарында жүлде салған тұңғыш қазақ. Бұған дейін қазақ қыздарының арасынан Олимпиадада жүлде алған Алаш қызы болған жоқ. Сіресіп қатып қалған сеңді бүгін Жазира бұзды. Сол мұз тауды басына көтеріп тастағанда сіресіп тұрған сеңнің күл-талқаны шыққандай болды. Көз алдымызда жарқырап күн шыққандай, тарылып барып, тыныс алғандай күй кештік. Қос қолын көтерген Жазираны көргенде, міне, Алаштың таңы атты дедік. Төбеміз көкке бір елі жетпей қалды. Бөркімізді аспанға атып, қуанып келеміз. Бұған дейін де сан мәрте әлем алдында елдің туын жықпаған болатын. Ал бұл жолғы сайыстың бәсі бөлек, мәртебесі жоғары. Қайтсем алтын аламын деген өжеттігі кімге болса да үлгі еді. Әттеген-айы, саф алтынды қолға түсіре алмадық. Бірақ, өкінетін ештеңе жоқ. Күмісінің салмағы да біз үшін алтынмен пара-пар. Зіл батпанға қатынасы қатаң болғанымен былайғы күнде жадырап жүретін Жазира еліне деген сүйіспеншілігін тамаша дәлелдеді. «Қазақтың күміс қызы едім, алтын қызы атансам деген ойым іске аспады», – деп езуіне күлкі үйірген Жазираның бойынан ұлттық рух пен намысты байқадық. Тіпті «Мен тек қазақ тілінде ғана сөйлеймін», – дегенінің өзі ұлтына деген сүйіспеншілігі емес пе? Ендеше, Қазақтың күміс қызын қалай мақтасақ та лайықты.
Жазираның жарқын жолын жалғаған Эльмираның ерлігі де ауыз толтырып айтарлықтай. Бозкілемге жаңа шыққан алғадай қыз сасып қалды ма, қарсыласына есе жіберіп алғанда сан соғып қалдық, өкініш жүрегімізді тіліп өтті. Бірақ ол жанарымен жер шұқымады. Қайраттанып, Жаратқаннан тағы бір мүмкіндікті сұрағандай езуі жыбырлап, кілемнен түсіп кетті. Абырой болғанда Эльмираның сұрағаны болды. Жұбаныш белдесуі келді. Бұл жолы Эльмира тіптен бөлек. Сұсты, қайратты, қарсыласының жігерін құм ететіндей күш-қуатты бойына жиып шыққандай. Төрешінің белгісі берілген бетте арыстандай айбат шегіп, қарсыласының жағасына жармасты. Алысты, қалайда жеңемін деп тер төкті. Қарсыласын қос қолдап белден қапсыра құшақтап, бозкілемге атып ұрды. Осылайша керекті ұпайды еншісіне жазды. Бізге де керегі сол еді. Енді жаймен жүріп, уақытты созса болғаны деп отырдық. Жоқ, Эльмира қайта ұмтылды, біріншіде кеткен есені сенен қайтарам деді ме, бұл жолы аяққа өтті. Құрыш білек қарулы қыздың қолына түскен қарсыласы қашып құтыла алмады. Мықтап тұрып тұзақтады, ары-бері ырғап, бозкілемге құлатып алды. Асауға салған тұсаудай қолдары айқасып жатыр. Қылбырау салып бұрағандай айналып кеп бергені көз алдымызда. Бес айналып, он ұпайды қанжығасына байлады. Төреші де ысқырық шалып, жеңісті Эльмираның қолына ұстаты. Міне, жігер, міне, намыс, міне, шеберлік. Енді бір кедергіден қарғысаң қола жүлде қолда тұр деп біз де жанұшырдық. Айтқандай-ақ соңғы шешуші кездесуге тағы шықты. Бұл жолғы қарсыласы оңай емес, әлемде жүлде салған қыз. Бірақ оның атағынан қорыққан Эльмираны біз байқамадық. Жай отындай жарқ етіп, жұлдыздай жарқырады. Алайда қарсыласы икемге келетін емес. Қанша әдіс жасаса да құлайтын түрі жоқ. Бойында намыс оты лаулаған Алаш қызы қойсын ба, бар күшін бойына жинап, мойыннан ұстап бірақ-ақ лақтырды. Жамбасқа оңтайлы келген қарсыласының аяғын көктен келтірді. Лақтырып қана қоймай, астына басып жатып алды. Біз де уақыт санап, жанұшырып барамыз. Қапталда бапкері Қайрат Сағадиев жанын шүберекке түйіп отыр. Уақыт, уақыт деп айғайға басты. Төреші де асығатын емес, асықпай келіп, жотасымен жатқан балуанның жауырынына көз тастады. Бозкілемге жабысып қалғанын анық көріп, таза жеңіс деген белгімен бес саусағын аспанға атты. «Сүйінші, Алаш қызы Олимпиаданың қола жүлдесіне қол жеткізді», – деген комментатордың дауысы саңқ ете қалды. Бұл біздің көптен күткен жеңісіміз еді. Эльмира қолына Көк байрақты ұстап алып, Рионың кілемін айнала жүгірді. Желбіретті әлемге, Рионың аспанына Қазақ атын алтын әріппен жазды. Жұптасқан қос қызымыз ел намысын биіктетті.
Ал үшінші күні шаршы алаңға шыққан Дариғаның ерлігін қалай айтса да болады. Қолына былғары қолғап киіп, жұдырықтасқан ұлдардың өнеріне көзіміз үйреніп кеткені белгілі. Ал қыз баланың жұдырық сілтегені қалай болады деген ой да жоқ емес. Иә, бұған дейін Олимп шыңына Қазақ елінің бір қызы жеңіс туын шаншыған еді. Бірақ, елдің қызы болғанымен Дариғадай есімі бөлек жан емес. Тұңғыш болып жазылатын есім енді туғандай. Сонымен шаршы алаңға шыққан Дариға кубалық қызбен жұдырықтасатын болды. Бұған дейін бір қарсыласын жолынан ығыстырған Дариға жүлдеге жақын қалды. Шіркін, осыны жеңсе, алтынға таласамыз. Ұтылсақ қола жүлде қоржында. Бұған дейін бокста қазақ қыздарынан ел қоржынын еселеген ешкім жоқ. Сондықтан болар, Дариғаға деген сенім минут сайын еселеніп келеді. Ал басталды. Нағыз шайқас, жан алып, жан берісіп жатыр. Дариға да қорғана жүріп, соққысын дарытуда. Қарсыласы бойшаң, әлемді үш мәрте бағындырған атағы тағы бар. Әбден ысылған әккі спортшы. Біздің қыз да оңай шағылатын жаңғақ емес. Ретін тауып, ашық қалған тұсты көздейді. Өзіне де бір-екі соққы өтіп кетті. Оған қайсарланған Дариға қарсы шабуылға көшті. Бірінші раундта қасына жолатпағанымен төрешілер жеңісті Куба қызына берді. Екінші раундта тіптен шиыршық атты. Қос бүйірден екі соққы жасап, тұмсықты бір-екі сүйкеп өтті. Жарадың деп біз отырдық. Барған сайын күшін үдетіп, атойлап келеді. Куба қызы қазақ қызының ауыр соққысының дәмін татып қалды. Қаймығып қалды деуге келмейді. Талайды көрген боксшы қорғануға көшті. Тасқамалды бұзу Дариғаға оңай соқпады. Ашық тұсты дәлдеп соғып тағы да еншісіне ұпай жазды. Ақыры екінші раунд та бітті. Төреші таразы басын бізге бұрды. Есеп тең.
Енді шешуші кезең, қос қызда жан қалмады. Әркім өз әлінше соққы жұмсап, жеңіске ұмтылды. Біздің қыз да қалысар емес. Алғашқы раундтағыдай емес, үшіншіде тіптен қайраттанып кеткендей. Шелектеп тер төгіп, соңғы минутқа дейін шайқасты тоқтатпады. Әттеген-ай, дәлдік жетіспеді. Жеңіс Куба қызының уысында кетті.
Бірақ, өкінетін ештеңе жоқ. Шаршы алаңда шар болаттай шыңдалып, Рио төрінде қолаға қол созған тұңғыш қазақ қызы Дариға Шәкімова деген атаққа қол жеткізді. Бұл елдің қуанышы, үміті, сенімі ақталды деген сөз. Қоланы уысына түсірген Дариғаның бұл жеңісімді Тәуелсіздіктің 25 жылдығына арнаймын дегені жанды жадыратты. Мәңгілік Елдің ұланы екенін ол осылайша Рио төрінде жаңғыртты. Қазақтың туы мұхиттың ар жағынан үш мәрте көтерілсе, күміс пен қолаға қол жеткізген қыздарымыздың ерлігі Мәңгілік Елдің тарихы, мызғымас құндылығы болып қала беретіні сөзсіз.
Ришад ТҰРҒАНБАЕВ