Қазақстан Республикасы Президентінің мемлекеттік басқару жүйесін жетілдіру жөніндегі бастамаларын іске асыру аясында Қазақстан Республикасы Мемлекеттік қызмет істері агенттігінің Жетісу облысы бойынша департаменті сыбайлас жемқорлықтың алдын алу бағытындағы жүйелі жұмыстарды жалғастыруда.
Осы ретте Департаменттің Сыбайлас жемқорлықтың алдын алу басқармасы қызметінің негізгі бағыттарының бірі мемлекеттік және квазимемлекеттік сектор ұйымдарының қызметіндегі сыбайлас жемқорлық тәуекелдерін анықтау және олардың алдын алу мақсатында сыртқы талдау жұмыстарын жүргізу болып табылады.
Аталған негізде, ағымдағы жылдың ақпан-маусым айлары аралығында Жетісу облысы бойынша Сот сараптамалары институтының қызметіне сыбайлас жемқорлық тәуекелдеріне сыртқы талдау жүргізілген болатын. Талдау жұмыстары Агенттіктің тапсырмасы негізінде жүзеге асырылып, оның нәтижелері бойынша Институт қызметіндегі ұйымдастырушылық, кадрлық, қаржылық және бақылау тетіктеріне қатысты бірқатар тәуекелдер анықталды.
Атап айтқанда, талдау барысында мүдделер қақтығысының туындауына алғышарттар жасайтын жағдайлар, көтермелеу төлемдері мен үстемеақыларды тағайындау рәсімдеріндегі жекелеген кемшіліктер, еңбек заңнамасы мен ішкі рәсімдердің сақталуын бақылауды күшейтуді талап ететін мәселелер анықталды.
Сонымен қатар, сот-сараптамалық қызметті ұйымдастыру барысында құжаттаманы рәсімдеу сапасын арттыру, ішкі бақылау тетіктерін жетілдіру, қызметтік рәсімдердің ашықтығын қамтамасыз ету және процестерді цифрландыру бағытында қосымша шаралар қабылдау қажеттілігі белгіленді.
Талдау қорытындысында сот сараптамасы объектілерін қабылдау, бейнетіркеу құралдарын қолдану тәжірибесін кеңейту, комплаенс-бақылауды дамыту, кадрлық тәуекелдерді төмендету және қаржылық рәсімдердің айқындығын қамтамасыз ету бойынша нақты ұсынымдар әзірленді.
Жалпы алғанда, талдау нәтижелері бойынша 11 тәуекелді жағдай анықталып, оларды жоюға бағытталған 13 ұсыным енгізілді.
Қазіргі уақытта ұсынымдарды іске асыру жөніндегі бірлескен іс-шаралар жоспары әзірленіп, олардың орындалуы Департаменттің тұрақты бақылауында болады.
Жүргізілген жұмыс мемлекеттік органдар мен квазимемлекеттік сектор қызметінің ашықтығын арттыруға, сыбайлас жемқорлық тәуекелдерін төмендетуге және қоғамның мемлекеттік институттарға деген сенімін нығайтуға бағытталған.
