Сыр ашпайды сенің құла түздерің,
Сыр ашпайды тау-тастағы іздерің.
Сенің бүкіл болмысыңның тағдырын,
Домбыраңның пернесінен іздедім.
Іздедім де, сәттерімде түңілген,
Тастап кеткен аңызыңа жүгінгем.
Жүгінгем де, қайта туғам, тірілгем,
Тарихыңды жазудамын бүгін мен,
Бабаларым, сенің ана тіліңмен.
Алдаспан ақын Мұқағалидың айтқаны айна-қатесіз келген күн болды. Сыр ашпай жатқан құла түзден, сыр бүгіп жатқан тау-тастағы ізден бір кездері талауға түскен тағдырымызды танып, жүз жыл бұрын қазақ ұлтының қасіретіне куә болған даланың арада ғасыр өткенде ерлік пен елдіктің, даналық пен дарқандықтың қасиетті мекеніне айналғанын көріп қайттық.
Ел ішінде «Он алтының ойраны» атанып, ақ патшаның «Июнь жарлығы» шыққанға дейін иісі қазақтың берекесі мен бірлігінің арқауы болып, Қарқара жәрмеңкесі болған өңірде ұлт-азаттық көтерілісінің 100 жылдығы кең көлемде аталып өтті. Ел тәуелсіздігінің 25 жылдығы аясында өшкенімізді қайта жағып, өткенімізді жаңаша таныту мақсатында Райымбек ауданындағы әйгілі Қарқара жайлауында «Тарихқа тағзым» атты рухани-мәдени мереке өтті.
Ел мәдениетінің өркендеп, халық салт-дәстүрінің, әдет-ғұрпының асқақтауы ең алдымен отаншылдық рухтағы, патриоттық үлгідегі тәрбиеге тікелей байланысты. Оған басты ұстын – ел мен жердің тарихы. Тарихының тереңдігін ұғынған халықтың алар асуы – биік, шығар шыңы – мұзарт.
Шындығында бүгінгі тәуелсіздіктің бастауы 1916 жылы патшалық режимге қарсы тұрып: «Бала өлгенше, шал өлсін», – деген жалғыз ауыз жалынды сөздің құдіретімен оқтаулы мылтыққа жалаң қолмен қарсы шыққан Ұзақ, Жәмеңке, Тұрлықожа, Әубәкір, Жаңабай, Серікбай сынды ақсақалдар мен асқақ рухты ел ағаларының боз биенің қанына бармақ батырып, анттасуынан басталады. Атадан балаға жалғасып, үзілмей жеткен серттің дүмпуі кең-байтақ қазақ даласын шарпығаны белгілі. Торғайдағы Амангелді Имановтың, Үшқоңырдағы Бекболат Әшекеевтің артына ел ертіп, қабырғадан қысқан патшалық саясатқа қасқайып қарсы тұруы Қарқара көтерілісінің заңды жалғасы еді. Оның соңы үлкенді-кішілі қаншама толқу мен ереуілге ұласты десеңізші?! Бүгінде бірін білсек, бірін білмейміз. Ел аузындағы әңгімелерде ғана айтылып, атасы мен бабасының ерлігіне елеңдеген құймақұлақ қарттардың ләмінен естіліп қалады, анда-санда. Алайда бабалар бойындағы еркіндікке деген ерлік пен өрліктің жалыны мен жасыны жанарды қарықтырған найзағайдай намыстың ұшқыны 1986 жылы желтоқсанда жастардың бойынан көрініс тапты.
Бұл қой үстінде бозторғай жұмыртқалаған бейбіт заманды аңсаған, армандаған қазақ халқының кеңестік идеологиядан бас тартуы, еркіндікке қол созуы еді. Жаратқан Алла нәсіп етіп, еліміз Қазақстан Республикасы деген заңды атауын иеленіп, өз алдына дербес мемлекет болып шыға келді. Бүгінде күллі әлем таныған еліміз өткеніне көз салып, тарихтың ақтаңдақ тұстарын қайта қарауға кірісті. Қарқара жайлауын дүбірлеткен ұлан-асыр той соның дәлелі.
Рухымызды асқақтатып, көңілімізді аспандатқан дүбірлі мереке Райымбек ауданының орталығы Кеген ауылында ұлт-азаттық көтерілісінің құрбандарына арналған «Тарихқа тағзым» атты монументалды ескерткіштің ашылу салтанатымен басталды.
Ертеректе қазақ қаза тапқан жанның басына жіңішке қарағайдан сайғақ қойып, марқұмның мәңгілік мекенін белгілейтін. Бұл ертеден жалғасқан үрдіс. Кірпіштен салынған күмбезді мазардың кейіннен енгені белгілі. Дәл Нарынқолға апаратын күре жолдың Қарқараға бұрылар тұсына орнатылған еңселі ескерткіш сол көне үрдісті жаңартқандай, жаңғыртқандай әсер етті. Биік стелланы қоршай орналасқан кереге іспетті тас қабырғадағы композициялық көріністің әрқайсысы осы дала төсін мекендеген жұрттың тарихынан хабар беретіндей. Патшалық режимнің тұсында жаз жайлауды, қыс қыстауды, күздеу мен көктеуді мекен еткен халқымыздың мамыражай тірлігін сипаттаған бірінші кереге ақ патша әскерінің озбырлығын, оспадарсыз қылығын сөз қылған алғашқы әңгімелерді бейнелейді. Одан кейін Бірінші дүниежүзілік соғысқа қылшылдаған жас жігіттерді қара жұмысқа алу үшін шыққан әйгілі «Июнь жарлығына» наразылық танытқан халықтың жанайқайы, яғни ер-азаматты қолына қару берместен от пен оқтың ортасына салмақ болған басқыншылардың өктемдігіне қарсылық жал-құйрығы төгілген боз биенің бауыздау қанына қол батырып анттасумен жалғасса, одан кейінгі керегедей жайылған кескіндемеде қарулы солдаттардың шапқынына түскен елдің көрінісі – қираған шаңырақ, сынған бесік, шытынаған қазан, бей-берекет құлаған мәйіт күйінде берілген. Биіктігі 5 метрге тең тас бағанды қоршай орналасқан барельеф тақтаға қарулы әскермен қақтығыс ошағы, көтерілістен кейінгі бейбіт халықтың қуғындалуы, босқыншылыққа тап болған елдің ақ патша солдатының қаруынан ығысқан күйі шекарадан өтерде қытай әскеріне талануы көрсетілген. Соңғы керегеде бүгінгі бейбіт өмірге қол жеткізген, Мәңгілік Елге бет алған тәуелсіз мемлекеттің жұрт қуанар тіршілігі суреттелген. Бір қарағанда, қарапайым ғана биік тұғырды қоршай орнатылған ескерткіштей көрінетін монументалды кешеннің көтерген жүгі ауыр, айтар ойы терең. Осы орайда тарихымыздан ойып тұрып орын алған қасіретті жылдың қасиетін арттырған ескерткіштің авторын айта кетпесек әбестік болар. Жас ұрпақтың өткенін біліп, көңіліне іліп, ертеңіне деген сенімін ерлік пен намыстың шарболатында қайрау мақсатында тұрғызылған ескерткіш аспантаудың перзенті, сол өңірдің талантты ұлдарының бірі КСРО Архитекторлар, ҚР Сәулетшілер одағының мүшесі, архитектура кандидаты Жамбыл Кекіловтің төл туындысы. «Қарқара – Ереуіл» қоғамдық қорының демеушілігімен орнатылған кешеннің ресми ашылу салтанатында Алаштың Асанәлісі атанған КСРО Халық әртісі, мемлекеттік сыйлықтың лауреаты Асанәлі Әшімов, Халық әртісі, профессор Есмұқан Обаев, Халық әртісі Алтынбек Қоразбаев сынды көптеген қоғам және мемлекет қайраткерлері қатысқан шарада облыс әкімінің орынбасары Бақтияр Өнербаев алғашқы сөзді бастап берді. Тойға деген қызығушылықтан гөрі тарихқа деген құрметі ерекше бірнеше мыңдаған елді мерейлі мерекесімен құттықтап, облыс басшысы Амандық Баталовтың таулы өңірге деген ыстық ықыласын жеткізген Бақтияр Әлтайұлы өңірімізде бой көтерген ескерткіштерге мән бере сөзін жалғастырды:
– Жер жаннаты Жетісу өлкесінде жалпы саны 2 мың 338 ескерткіш бар. Оның төртеуі бүкіләлемдік мәдени мұра тізіміне енсе, сегізінің республикалық маңызы бар. Қалғаны жергілікті тарихтан сыр шертетін нысандар. Сонымен қатар, Тәуелсіздіктің 25 жылдығы аясында Қазақстан мен Түркия арасындағы жоғарғы мәдени байланыстың, өзара ынтымақтастықтың жарқын үлгісі ретінде маусым айында Анкара қаласында Сүйінбай Аронұлының бюстін ресми түрде аштық, – деп «Тарихқа тағзым» мемориалды кешенінің маңыздылығына тоқталды. – Елдік, отансүйгіштік сезімдер ең алдымен туған жеріңді сүюден, туған топырағыңа тағзым етуден, құрметтеуден, өскелең ұрпаққа рухани қолдау көрсетуден бастау алады. Елбасы Нұрсұлтан Назарбаев: «Әрбір отбасы, әрбір ауыл, әрбір еңбеккер елінің өскенін, өнгенін, оның әлеуметтік жағынан қорғалуын сезінуі керек», – деген еді. Осы ретте «Туған жерге тағзым» атты акцияның шеңберінде жетісулық нағыз патриот жандардың демеушілігімен аймағымызда көптеген әлеуметтік нысандар салынып, пайдалануға берілді, тұрмысы төмен отбасыларға және мүмкіндігі шектеулі жандарға қайырымдылық көмек көрсетілді. Сол игі істердің жалғасы болған «Қарқара – Ереуіл» қорының бастамасымен салынған бұл тарихи ескерткіш тәуелсіздікті аңсаған бабаларымыздың рухына құрмет деп білемін. «Қолы ашықтың – жолы ашық», – дейді дана халқымыз. Жанболат Әкебайұлы бастаған азаматтар Жетісудың ғана емес, бүкіл қазақтың қамқоршылары. Сіздердің бұл бастамаларыңыз жастарға үлгі-өнеге. Ата-бабаларымыз жас өренді елін, жерін сүюге үндеп, ұлттық салт-дәстүрмен сусындатуды мақсат еткен. Сол рухани үндеу бүгінгі күнге жеткізді. Осыдан 100 жыл бұрын болған Ереуілтөбедегі оқиғаны ұмытпай, тәуелсіздігіміздің тұғырлы болуын паш ететін бұл ескерткіш баршамыз тәу ететін киелі орынға айналады деп сенемін.
Таулы өлкеде өтетін мұндай тарихи жиындардың төрінен ылғи да орын алып жүрген ел мақтанышы Асанәлі Әшімов орамды ойын ортаға салды. Театр өнерінің тарланы, сол аймақтың төл перзенті Есмұқан Обаев та тас тұғырдың сәндік үшін тұрғызылмағанын айта келіп, тарихымызды түгендеп, бабаларымызға құрмет көрсететін мәні зор орын екенін де жеткізді. «Қарқара-Ереуіл» қорының басшысы Жанболат Жөргембаев та атқарылған жұмыс жайлы ақтарыла сөз сөйледі. Сонымен бірге жиналған дүйім жұртқа ауданның Құрметті азаматы Совет Оразаев ақсақал бата беріп, еңбек ардагеріне лайықты құрмет көрсетіліп, иығына шапан жапты. Бұдан соң алыс-жақыннан жиналған көпшілік Қарқара жайлауын бетке алып, Ереуіл төбеге Құран бағыштауға аттанды.
ҚҰРБАНДАР РУХЫНА ҚҰРАН БАҒЫШТАЛДЫ
Мұхтар Әуезовтің «Қилы заман» повесіне арқау болған әйгілі Қарқара көтерілісін есте қалдыру мақсатында еліміздің талай марқасқа азаматтары еңбек сіңірді. Соның бірі – Алаштың аяулы перзенті Ораз Жандосов. 1926 жылы Ораз Жандосов, Ыдырыс Көшкінов, Әубәкір Жүнісовтердің бастамасымен қазақ драма театрының іргетасын қалаған Серке Қожамқұлов, Қалибек Қуанышбаев, Қанабек Байсейітов, Елубай Өмірзақов, Қапан Бадыров, Күләш Байсейітова, Әміре Қашаубаев, Иса Байзақов сынды азаматтар қарулы әскердің қолынан шейіт болған аталарымыз бен аналарымызға, нақақтан қырылған бала-шағаға арнап тас үйіп, оны «Ереуілтөбе» деп атайды. Алайда кеңестік идеологияның кесірінен ел мен жердің азаттығы үшін жан қиған жандарға арналған Ереуілтөбе мүлде ұмытылып қала береді. Ақтардың қысымынан соң қызылдардың қиянатын көрген халық 1929-1931 жылдардағы ұжымдастыру мен кәмпескені, 1932-1934 жылдардағы ашаршылықты, 1937-1938 жылдардағы сталиндік-голощекиндік қуғын-сүргінді, 1941-1945 жылдардағы Екінші дүниежүзілік соғысты, 1945-1954 жылдардағы соғыс зардаптарын жою науқанын, 1954 жылы басталған тың жерлерді игеру ісін бастан өткеріп, өткеніне, тарихына ой жүгіртуге жүрексінгені рас. Қарқараның 10 жылдығына орай елді ұйымдастырған Ораз Жандосов, Ыдырыс Көшкінов, Әубәкір Жүнісов қуғындалды, итжеккенге айдалды, атылды. Алайда халықтың зердесіндегі қанқұйлы оқиғаны ұмыттыру мүмкін емес еді. Арада 70 жыл өткен соң ғана өлгеніміз тіріліп, өшкеніміз жанғандай болды, яғни, 1986 жылы Ереуілтөбе ескерткіші жергілікті азаматтардың қолға алуымен қайта жаңғыртылды. 2006 жылы көтерілістің 90 жылдығына орай ескерткіш аумағы абаттандырылып, қоршау орнатылды, шырша отырғызылып, көріктендірілді. Бүгінде кең- байтақ Қарқара жайлауының қақ ортасынан менмұндалап көрінетін киелі мекен көпшіліктің тәу ететін орнына айналған. Себебі, жан-жақтан ағылған көпшілікті патша әскерінің Фон Берг, Иванов есімді жазалаушы жендеттері кездескен жерінде сұраусыз атып отырған. Бір шеті Қырғызстанмен шектесетін Қарқара жазығында 1110 қазақты атып, асып, шауып, өртеп өлтіргендерін мақтанышпен жазғандардың жазасын Жаратқан Алла берсін, бүгінде гүл көмкерген өңір осыдан 100 жыл бұрын қан кешкені ақиқат. Қанды қырғыннан бой тасалап, өз жанымен әуре болған дәрменсіз халық артта қаншама мәйіттің көмусіз қалғанын білді? Жазалаушы отрядтар үш күннің ішінде қыбырлаған қазақты аяусыз өлтіріп, аяғы ауыр әйелдердің ішін жарды. Еркек кіндіктіні сөзге келтірмей атқан жауыздар еңбектеген сәбилерді мылтығының ұшына шаншыды, әйел атаулыны зорлап, бүлдіршін қыздарды ат артына салдырды. Сай-сала, ойпат-жырасы қанға толған жайлаудың қара топырағы ғана шейіт болғандардың сүйегін жасырып, бойына сіңіріп алды. Содан бері талай су ақты, талай жан бақилық болды. Сонда да болса өскелең ұрпақтың санасын жазықсыз халықтың жанарында кеткен мұң қабыздай берді. Содан бері марқұмдарға Құран бағыштау, дұға арнау дәстүрге айналды.
Ереуілтөбенің басына орнатылған балбалтастың жанында Райымбек ауданының имамы қасиетті Құран аяттарын оқып, дұға жасады. Сонымен бірге жиналған жұрт дәл ескерткіштің қасынан ашылған дала төріндегі мұражайға кіріп, тарихи жәдігерлерді тамашалады. Осы арада сөз алған әл-Фараби атындағы ҚазҰУ журналистика факультетінің деканы Сағатбек Медеубекұлы Ереуілтөбенің тарихына тоқталып өтті. Одан соң Ерлан Жүніс, Жұматай Әміреев, Думан Бәзілжанұлы сынды жазба ақындар өлең оқып, көпшіліктің көңілін жалынды жырмен серпілтті.
Қасиетіңнен айналайын, Қарқара
Қара топырағын алқызыл, жасыл, сары, көкшіл түсті гүлдер көмкерген Қарқара жайлауына тігілген ақшаңқан киіз үйлер алыстан көз тартады. Оған қарай ағылған көлік пен жұртшылықтың санында есеп жоқ. Жергілікті полиция қызметінің деректеріне қарағанда келген автотранспорт саны сегіз мыңнан асып-жығылады. Басы Қарқара жайлауына келіп тірелген көліктің соңы аудан орталығынан әлі де шығып бітпей жатқанын естіп, дүбірлі тойға деген елдің ықыласын аңғардық. Қырық мыңнан астам халық Қарқара төсін қайыстырғандай әсер етті. Ұзын-ырғасы жүзге жетіп жығылатын, ақшаңқан киіз үйлер орналасқан маңға бет алған халық «темір тұлпарларын» орналастырған соң, ерте дәуірлердегі ымырасыз тіршілікті сипаттап, шаңырағынан қонақжай көңіл аңқылдаған қазақ ауылдарына қарай жол сілтеген көк түсті қақпадан ене берді. Жағалай тігілген киіз үйлердің жасауы келісіп, шат-шадыман өмірді айғақтайтындай. Дәл ортадағы сахнаны қоршай орналасқан көпшілік Алтынбек Қоразбаев секілді өнер қайраткерінің, Бауыржан Бабажанұлы сынды ақынның, Қазақстан Жазушылар одағы басқарма төрағасының орынбасары Жанарбек Әшімжанның, «Қарқара-Ереуіл» қорының басшысы Жанболат Жөргембаев сияқты ел азаматының жүрекжарды тілектерін тыңдады. Дүбірлі тойға жиналған үлкен-кішіге облыс әкімі Амандық Баталовтың сәлемін тағы бір мәрте жеткізген орынбасары Бақтияр Өнербаев:
– Біздің қол жеткізген табысымыздың бәрі – тәуелсіздігіміздің және мемлекеттің жаңа саяси бағытының арқасы. Биыл ғасырлар бойғы арман болған ел тәуелсіздігіне 25 жыл, – деп Жетісу өңірінде атқарылып жатқан мәдени шараларға тоқталып өтті. – Тәуелсіздік – бабалар қанымен суарылып, асыл арманмен қанаттанған ең қасиетті ұғым. Тәуелсіздігіміздің қайнар көзі – қазақ халқының сан ғасырлар бойғы күресінде, азаттыққа ұмтылған қайсарлығында жатыр. Тәуелсіздіктің мерейлі тойымен бірге биыл 1916 жылғы ұлт-азаттық көтерілістің 100 жылдығы да аталып өтілуде. Ата-бабамыз ғасырлар бойы армандап өткен тәуелсіз ел болу мәртебесін көру – бүгінгі ұрпаққа бұйырған зор бақыт. «Бақ бағалағанның басында тұрады» – дейді дана халқымыз. Тәуелсіздігімізді тұғырлы, мемлекетімізді ғұмырлы ету – біздің ортақ парызымыз.
Бақтияр Әлтайұлының айтуынша, бұл мерекеге орай облыс әкімінің өкімімен Кеген Мәдениет үйі мен Ереуіл ауылындағы мектеп ғимаратына жөндеу жұмыстары жүргізіліп, атшабар алаңына спорттық мұнара орнатылған. Сондай-ақ, Ереуіл ауылының ауызсу жүйесі, Ереуілтөбе ескерткіші, ауылдың орталық көшелері жөндеуден өткізілді. Осының бәрі ел игілігі үшін екендігін жеткізген облыс әкімінің орынбасары Бақтияр Өнербаев, 1916 жылғы ұлт-азаттық көтерілісінің 100 жылдығына арналған мәдени іс-шаралар Қарасаз ауылында өткен облыстық көркемсөз оқу шеберлерінің байқауымен басталғанын, одан соң Талдықорғанда қылқалам шеберлерінің байқау-көрмесі, республикалық жыршылар байқауы өткенін атап өтті. Ал, алдағы қыркүйек айында Алматы қаласында өтетін ғылыми-практикалық конференция Қарқара көтерілісін ғылыми тұрғыдан пайымдауға мүмкіндік береді.
Дүбірлі тойға жиналған көпшілікті Қазақстан Жазушылар одағы басқарма төрағасының орынбасары Жанарбек Әшімжанның сөйлеген сөзі дүр сілкіндірді. Ұлы Даланы мекендеген Абылай хан, Үйсін Райымбек, Қаракерей Қабанбай, Қанжығалы Бөгенбай, Шапырашты Наурызбай, Ер Қарасай сынды батыр бабаларымыздың Алтай мен Атыраудың, Арқа мен Алатаудың, Сыр мен Шудың арасында азаттық үшін арпалыс өткізгеніне тоқталған қарымды қаламгер осыдан 100 жыл бұрынғы оқиғаларға тоқталды.
– Патшалық Ресейдің 1916 жылы Бірінші дүниежүзілік соғысты желеу етіп, әділетсіз һәм ретсіз жасалған әскери бағыттағы іс-қимылдарына қарсы көтеріліс Қазақстан мен Орта Азияны түгелдей қамтыды. Сол бір сұрқай шақтарда бұратана атанса да басын бұғауға бермей, мойындарына бұршақ салып болашақ ұрпақ үшін күреске шыққан өңір – Жетісу аймағы! – деген Жанарбек Садыханұлы Қарқара көтерілісіне түрткі болған патша жандайшаптарының халыққа шектірген азабына тоқталып, Батыс пен Шығысты тоқайластырған, Жібек жолы бойындағы ірі сауда орталығы болған сол жерде бейбіт елді қанқасап қырғынға ұшыратқанын, Алаш қайраткері Мұхамеджан Тынышпаев Қарқара қасіретінен ұзын-ырғасы 35 мың адам құрбан болғанын мысалға келтіргенін, Ілияс Жансүгіров, Міржақып Дулатов секілді Алаш қайраткерлері ашына айтқанын тілге тиек етті. – Ел Тәуелсіздігінің 25 жылдығында қолымызды кеудемізге қойып тұрып, іштей тәубе келтіріп, өткен тарихымызды ой елегінен өткізіп, мемлекет басшысы Нұрсұлтан Назарбаевтың «Тәуелсіздік идеясын» жас ұрпақтың санасында сәт сайын жаңғыртып отыру әрқайсысымыздың міндет-борышымыз. Азаттығымызға ширек ғасыр. Бейнелеп айтсаң дәуір үшін бес атанға жүк болар тарих, тұжырып айтсаң тарих үшін түк те емес. Өз алдымызға жеке отау құрып, бабалар аманатына қол жеткізіп, шекарамыздың бәрін айқындап, жаңа тұрпатты Тәуелсіз мемлекет құрылды. Құндылықтар мен қоғамдық жүйе түбірімен өзгерді. Жайын ауыздай жалаңдап жаһандану дәуірі келді. 25 жылдың ішінде Қазақстан ғаламдық дамудың бірнеше сатысынан өтті. Тәуелсіз Қазақстан өзінің жаңа Елордасын белгіледі. «Орағың өткір болса, қарың талмайды, Отаның берік болса, жауың алмайды», – дейді халық даналығы. Алыс-жақын шетелдерде болып жатқан қарулы қақтығыстар, көрші-қолаңдарда орын алып жатқан сәтсіз саяси шешімдер, туысқан елдердің шекараларын толық белгілей алмай, бір-біріне қарсы қарулы іс-қимылға көшуі, Қасиетті Құран түскен жерлерде мылтық ұңғысынан түтін сейілмей тұрғаны санамызға сан түрлі сауал жүктейді.
Қазақ топырағында қаншама ұлт пен ұлыстар өмір сүріп келеді. Баршамыз «Тәуелсіздік идеясы» аясында мемлекет құрушы ұлттың қас-қабағына қарай отырып, осы елдің болашағына қызмет етуге міндеттіміз. Біз үшін қастерлі де қасиетті ұғым – Тәуелсіздік! Бабаларымыз осы азаттық үшін қан төкті, бүгінгі ұрпақ соның қадіріне жете білуі тиіс.
Жанарбек ақын бұдан соң бабалар ерлігінің 100 жылдығына орай көптеген шаралардың атқарылуына ықпал жасаған облыс әкімі Амандық Баталовқа ақын-жазушылардың атынан алғыс білдіріп, өңір жетекшісінің қолдауымен «Ан-Арыс» баспасынан Қарқара көтерілісіне арналған 7 томдық кітаптың шыққандығын құлаққағыс етті. Онда Мұхтар Әуезовтің «Қилы заман» повесі, ел ағасы Сейдәлім Тәнекеевтің «1916. Қарқара-Албан көтерілісі» атты зерттеу еңбегі, көрнекті қаламгер Бексұлтан Нұржекеевтің «Әй, дүние-ай» атты жаңа романы, тарихи құжаттар топтамасы, сол замандағы ақындардың жыр-дастандары енгізілген.
Ауқымды сахнаның аумағына жиналған көпшілік бұдан соң облыстық Сүйінбай атындағы филармония әртістерінің және де арнайы барған көптеген өнер иелерінің концертін тамашалап, мерекелік көңіл-күймен қауышты.
Жүйрікте де жүйрік бар...
Ас пен тойдың сәні бәйге мен көкпар. «Той десе, қу бас домалапты», – дейтін қазақ баласының ат ойындарына деген ықыласы ерекше. Қарқара өзенінің аңғарындағы кең жазыққа орналасқан атшабарға жиналған көпшіліктің қарасы мол. Теңіздің толқынындай тулаған көпшілік биік қабақтан алдымен теңге ілу, қыз қуу, көкпар секілді жігіттің жігіті сыналар, көрген жанның қанын қыздырар тартыстарға куә болды. Одан соң қалың көрермен «Құнан бәйгеге» қатысқан шын жүйріктердің болашағынан үміт күттірер аяқ алысын тамашалады. Қошқар болар қозыны маңдайынан танитын халқымыз жүйрік шығар құлынды желіден-ақ біледі. Сондықтан да бәсекелі жүйріктер алға ұмтылып, желмен жарысқа түскенде бәйге алатындары өз-өзінен белгілі бола бастады. Құнан бәйгеде бірінші орынды талассыз алған Алакөл ауданы, Үшарал қаласының жүйрігіне мінген шабандоз Диас Жұмаш «Лада гранта» автокөлігін иеленсе, Көксу ауданы, Балпық би кентінен келген Құрманбек Болатханұлы екінші орынның 200 мың теңгесін, Райымбек ауданы Саты ауылының шабандозы Ермек Үркімбаев үшінші орынның 150 мың теңгесін еншіледі. Одан бөлек, төртінші орынға тігілген 100 мың теңгені Жамбыл ауданы, Көкбастау ауылынан келген Ильшат Баймұқанов, бесінші орынға тігілген 50 мың теңгені Ескелді ауданы, Жалғызағаш ауылынан келген Нұржан Аманжолов иеленді.
Қазақ жылқының ішінде жорғаны ерекше құрметтеген. Жүрісіне қарай «су төгілмес», «жол жорға», «қой жорға» деп атаған ерен жорғаларды алыс қашықтыққа бекерден-бекер жібермеген. Тіпті, ертедегі күйшілер «Қара жорға» атты күй шығарып, буындары былқылдаған бишілер арнайы биге айналдырған. Осының бәрі жорғаға деген халықтың ықыласы. Қарқара жайлауына жиналған көпшілікте жорға жарысын тапжылмай отырып тамашалап, шын жүйріктің жүрісін жақсылыққа балады. Төрт аяғын тең басқан жүрісті жылқылардың арасында 5 жүйрікке жүлде тағайындағандар бірінші орынға тігілген «Лада гранта» автокөлігін көршілес Қырғыз елінен келген Таңатбек Мейрамқұлұлының қанжығасына байлады. Одан кейін екінші орынды Астана қаласының жорғасы еншілеп, Перевпиев есімді шабандозы 200 мың теңгенің жүлдесін еншіледі. Үшінші орынға тігілген 150 мың теңгені Райымбек ауданы, Қарқара ауылының тұрғыны Мейрамбек Ниязов, төртінші орынның 100 мың теңгесі мен бесінші орынның 50 мың теңгесін Райымбек ауданы, Бөлексаз ауылының қос жорғасына мінген Мирас Бектұрсын мен Нұрхан Бектұрсын иеленді.
Таулы жердің табиғаты ерекше. Жарқырап тұрған күн аяқастынан нілдей бұзылып, бұршақты жауын құя салады. Дәл 16 шақырымдық «Топ бәйге» басталғанда көпшілікті әбігерге салған дауылды боран бәйге өтіп жатқан жерге ентелеп жетіп қалған еді. Әп-сәтте дауылдатып келіп, сіркіреп өте шықты. Айналаны бір сергітіп алған табиғи құбылыс өткен соң бұлттан шыққан күнге шыжғырылған көпшілік орнынан тапжылмай топ бәйгені тамашалады. Сіркіреп құйған жаңбыр кезінде талмай шапқан жүйріктердің ішінен оза шыққан төрт шабандозға бәйге берілді. Сөйтіп, 1-орынды Жамбыл облысы, Қордай ауданынан келген Ақжол Жұматай жеңіл автокөлік иеленсе, екінші орынға тігілген 200 мың теңгені Жамбыл ауданы, Беріктас ауылынан Ержігіт Төлегенов, үшінші орынға тігілген 150 мың теңгені Жамбыл ауданы, Беріктас ауылынан Асхат Омаров, төртінші орынға тігілген 100 мың теңгені Жамбыл облысы, Қордай ауданы, Қарасу ауылынан келген Елдар Айтбаев еншіледі.
Ұзақтығы 25 шақырымдық кіші аламаннан бірінші келіп, көпшіліктің мерейін асырған Жамбыл облысы, Қордай ауданы, Қарасу ауылының тұрғыны Ақпар Өсербаев «Уаз Патриот» көлігін еншілесе, сонау Маңғыстау облысы, Ақтау қаласынан келген Бағдәулет Меңдібаев екінші орынға тігілген 300 мың теңгені, Алакөл ауданы, Үшарал қаласынан келген Диас Жұмаш үшінші орынға тігілген 150 мың теңгені, Қарасай ауданы, Үшқоңыр ауылынан келген Дәурен Абылай төртінші орынға тігілген 100 мың теңгені, Райымбек ауданы, Қарқара ауылының тұрғыны Бауыржан Ашықов бесінші орынға тігілген 50 мың теңгені иеленді. Бұдан соң көпшілік 43 шақырымдық ұлы аламанды демін ішіне тарта отырып тамашалады. «Жүйрікте де жүйрік бар, қазанаты бір бөлек...» деген халық даналығы мың мәрте рас екендігін Алакөл ауданы, Үшарал қаласынан келген жүйрік дәлелдеді. Ә дегеннен өзгелерден оқ бойы озып шыққан ерен жүйрік 15 айналымда шабысынан танбай, мәреге дейін тынбай шапты. Тіпті, оза шапсам деген дәмелі жылқыларды жарты шақырым артқа тастаған шабандоз Диас Жұмаш жол талғамайтын «Уаз Патриот» автокөлігін талассыз иеленді. Одан кейінгі екінші орынға табан тіреген Жамбыл ауданы, Аққайнар ауылының шабандозы Азат Мұқажанов 300 мың теңгені еншілесе, үшінші орын Райымбек ауданы, Қарасаз ауылына бұйырды. Үшінші орынға тігілген 250 мың теңгені Айдос Сүлейменов иеленсе, төртінші орынның 200 мың теңгесін Райымбек ауданы, Қарқара ауылының тұрғыны Тұрар Әмірғазы еншіледі. Бесінші орынға тігілген 150 мың теңгені Ақсу ауданынан келген Данияр Абдуллаев, алтыншы орынға тігілген 100 мың теңгені Жамбыл ауданы, Амангелді ауылынан келген Олжас Әбдіхамит, жетінші орынға тігілген 50 мың теңгені Саят Әбдіманап иеленді.
Шілде айының соңында Қарқара жайлауын дүбірлеткен ұлан-асыр тойға осылай нүкте қойылды. Көпшілік ақшаңқан киіз үйлердің иелері ұсынған ақ, адал астан дәм татып, бабалар рухына құрмет көрсетті. Әрбір шаңырақта қасиетті Құран оқылып, азаттық жолында бақилық болған жандардың рухына дұға бағышталды. Бір кем дүние десек, асыра сілтегеніміз болмас, азаттықтың арайлы ақ таңының бастауы болған Қарқара көтерілісінің 100 жылдығына орай тарихи шындықпен ұштастыра шығарсақ деген киноның дайын сценарийі жазулы күйінде қалып қойды. «Жомарттың қолын жоқ байлады ма», әлде демеушілер жағы кемшін болды ма, қаражат тапшылығына байланысты көрермен жүрегіне жол тауып, отандық киноның құнды мұрасы болатын бір фильм шықпай қалды. Азаттық жолында құрбан болған бабалар мен боздақтарды жоқтап, түгендеу бүгінгі тоймен тоқтап қалмас, алдағы уақытта Алашым деген азаматтар барда өткеніміз өшпейтіні анық. Ал көңілде қалған кино туралы ұсыныс мемлекет деңгейінде қаралып, көңілге түрлі ой салған бір кем дүниенің орнын толтырар деген сенімдеміз.
Мәди Алжанбай,
Райымбек ауданы.