Елбасымыз Нұрсұлтан Назарбаевтың «Дағдарыстар өтеді, кетеді. Ел тәуелсіздігі, ұлт мұраты, ұрпақ болашағы сияқты ұлы құндылықтар ғана ғұмырлық», – деп атап өткеніндей, қастерлі ұғымдарды санадан сырт қалдырған емеспіз. Соған орай, жас жеткіншектердің заман талабына сай білім мен тәрбие алуына ұдайы жағдай жасалуда. Оған дәлел, Іле ауданына қарасты Боралдай ауылдық округінде 600 орынды жаңа мектептің ашылуы.
Аталмыш игі шараға облыс әкімінің бірінші орынбасары Лаззат Тұрлашов қатысты. Елбасымыздың «Мәңгілік Ел» идеясы аясында бой көтерген білім ордасының ашылуымен құттықтап, облыс бюджетінің үштен бірі осы білім саласына бөлініп жатқанын атап өтті.
– Алып шаһардың іргесінде орналасқаннан қоныстанушылар көп болады, оқушылар саны арта береді. Үш ауысымды жүйені жою үшін де заман талабына сай мектеп қажет. Енді, міне, боралдайлық оқушылар іші-сырты бірдей келіскен, кең де жарық, жақсы жабдықталған сыныптарда білім алады. Бұл – олардың ертеңгі күнге деген сенімін нығайтып, егемен еліміздің өз Отанын сүйетін азаматы болып қалыптасуына мүмкіндік береді, – деді облыс әкімінің бірінші орынбасары Лаззат Тұрлашов.
Айтулы мерекеге аталмыш елді мекеннің тұрғындары жиналып, бұл қуаныштың тәуелсіздік жемісі екендігін атап өтті. Ақсақалдар алқасының төрағасы Амангелді Үдербаев ауыл тұрғындары атынан сөз сөйлеп алғыс білдірді.
Құрылыс жұмыстарын сәтті аяқтаған мердігер компания «СКБ Констрэкшен» жауапкершілігі шектеулі серіктестігінің директоры Ержан Сарқұлов мектеп директоры Гүлзира Ижановаға білім ұясының кілтін табыстады. Сондай-ақ, салтанатты кештің маңызды сәтін күткен қалың көпшіліктің алдында Лаззат Махатұлы жаңа білім ордасының лентасын қиды. Шашу шашылып, қонақтар әсем де көркем безендірілген екі қабатты ақшаңқай ғимаратты аралап шықты.
Жалпы, мектеп құрылысына 1 млрд. 508 мың теңге көлемінде қаражат жұмсалған. Жауапты компания бір жыл ішінде өз жұмысын сәтті аяқтап, жаңа оқу жылы қарсаңында тапсырып отыр. Мектепте физика, химия, информатика, лингафонды-мультимедиалық бастауыш сынып бөлмелері, кітапхана, спорт, акт залы, асхана, темір, ағаш өңдеу және тігін шеберханалары да бар. Биылғы оқу жылында екі ауысымды жүйемен 800 бала білім алмақ. Бірінші жыл болғандықтан әзірше 9 сыныптық болып отыр. Мектеп табалдырығын жаңа аттаған бірінші сыныптар саны – 6. Сондай-ақ, 58 ұстаз білім береді. Жалпы, Іле ауданында биыл үш ауысымды мектептерді жою мақсатында екі білім шаңырағы бой көтерді. Бұл ауыл тұрғындары үшін зор қуаныш.
Мақпал МЫСА
Іле ауданы.