Әркімнің өзіне ғана тән кішкентай ғана мемлекеті болатыны заңдылық. Оған жүздеген, мыңдаған адамның көмегі қажет емес. Сондықтан да, отбасы – шағын мемлекет деп айтып
жүруіміз текке емес. Ол, әрине, оңайшылықпен құрылмайтыны кім-кімге болса да белгілі. Бірақ ең бірінші адам жүрегінде соған деген таза ниет, ақ пейіл, ыстық махаббат болуы шарт. Осындай ып-ыстық, тап-таза, тұп-тұнық сезіммен, сыйластықпен шаңырақ көтерген жастардың үйі бүгінде баланың былдырына, ойыншықтың сылдырына толы. Ауыз толтырып, көпшілікке үлгі етуге тұрарлықтай отбасына қызықпайтын адам кемде кем шығар, сірә?! Олай болса, ұрпақ тәрбиелеуде ұлттық құндылықтың жібін күні бүгінге дейін үзбеудің жолын көздеген, отбасындағы әкенің рөлін, беделін үнемі жоғары қойып, ананың табанында жаннат барын тәй-тәй басқан балаларына күндіз-түні айтудан шаршамаған, әр баласын еліне адал да әділ қызмет ететіндей тәрбиелеп келе жатқан Талдықорған қаласы әкімінің орынбасары Марлен Көлбаевтың шаңырағы турасында өрбіген әңгімеге құлақ салайық.
ҮНСІЗ ТІЛДЕСТІК
Мемлекеттік қызметкер дегенде бәріміздің ойымызға бірден шікірейіп киініп алған, тек қана мемлекеттік қызметкердің ғана атқаратын ісі жөнінде әңгіме өрбітетін адам деп ойлайтынымыз анық. Ол қанша мемлекеттік қызметкер болса да оның табиғаты, болмысы, жаратылысы басқа екенін тек сөйлесу, танысу барысында көз жеткіземіз. Ондай ой айтуымызға біздің кейіпкер себепкер.
ЖАСТЫҚ ШАҚТА ОЙНА ДА КҮЛ ЖАЛЫНДА. Осы сөзді алдыңғы буын ағалар да соңғы буын інілер де естіп өсті. Естісі ойнаудың да, күлудің де өзіндік шеңберінен аспады. Есері ойнап жүріп от басты. Марлен Қапашұлының да жастық шақтағы күндері өз алдына үлкен әңгіме. Тіпті, оларды жинақтаса бір әдемі өрілген көркем туынды болары анық.
Әлқисса, Жетісу экономикалық институтына құжат тапсыруға барғанда көпшіліктің сөзіне құлақ асып, асқан жауапкершілікпен өз ісін атқарып отырған жас қыз құжаттарды қабылдайды. Бір көргеннен ол қызға ғашық болмаса да өне бойын бір сезім шарпып өтуі де тегін емес еді. Араға аз ғана уақыт салып, оқуға ілінген студенттердің кешкі басқосуында жалындаған жанарға тағы да сол қыз ілінеді. Алғашқы биді де осы арада билейді. Қос ғашықтай тілсіз тілдескен қыз бен жігіт осыдан бастап жақын араласа бастайды. Биязы, үлкеннің бетіне тіке қарап сөз айтпайтын, тәрбиелі, текті әулеттен шыққан Сауле Марлен ағамыздың анасымен аттас болуы да өмірдің үлкен сыйы шығар!?
Қос жүректен шыққан сыйластық пен сезім бір арнаға тоғысып, көкейде жылдар бойы сары майдай сақталған арман-тілектер орындала бастайды. Талдықорған қаласына іргелес жатқан Шымыр ауылының сұлуы арнасынан күндіз күміс, түнде алтын аққан Қараталдың қайсар жігітінің дүрсілдеген жүрегіне өзінің есімін алтын әріппен жазады. Асқар таудай әке балдай тәтті балаларының анасымен, сүйіп қосылған өмірлік жарымен танысқанын, бірге өткізген уақытын әдемі естелікпен есіне алады.
АНАҒА, АНАҒА,
ТАҒЫ ДА АНАҒА
АНА. Құдіретті де қастерлі сөз. Тас емшегін жібітіп, түн ұйқысын тоқсан тоғыз рет бөліп, сенің болашағың үшін жан ұшыра уайым жейтін асыл адамның қадіріне жетіп жүргеніміз шамалы. Мені күні бүгінге дейін қынжылтатын дүниелер көп. Мен отбасын құруға қатты асықтым. Себебі, анам ұзақ жылдар бойы ауырған еді. Ол кісіге немеренің қолынан су ішкізсем деп армандап едім. Екі ай ғана уақыт жетпеді. Амал қанша? Ажалға қарсы келе алмаймыз. Мен анама өмірімде бір-ақ рет туған күніне гүл беріп көріппін. Бір-ақ рет көйлек алып беріппін. Ал ол кісі маған одан он, жүз, мың есе жақсылық жасады ғой. Бүгінде анасын соғып, балағаттап, жылатып, тіпті, қарттар үйінің босағасына апарып өткізіп, «әй» деп дауыс көтеретін, тіпті, қол жұмсайтын ер азаматтар қаптап келеді. Мен ондай пасық, надан адамдарды ер азамат қатарына қоса алмаймын. Олар қылмыстан да зор күнә жасап жатқандарынан мүлде бейхабар. Ата-анаға деген құрметті біз үнемі бәрінен жоғары қоюымыз керек. Жақсылықты АНАҒА, АНАҒА, АНАҒА содан кейін ӘКЕГЕ жасау керектігін де Пайғамбарымыз (с.ғ.с) өсиет еткен. Ойланайық. Ата-ананың қадіріне көзі тірісінде жетейік. Кейін өкініш өмір бойы өзегімізді өртемейтіндей әрекет жасауымыз қажет.
Бұл жүрегін анасына суырып бере салуға дайын, АНА деген сөздің қадірі мен қасиетін терең түсінген, әлемді тербететін асыл жанның бала үшін жасаған жақсылығын өмірінің соңына дейін қайтара да алмайтынын жастайынан ұғынған Марлен Көлбаевтың сөзі. Иә, асқар таудай әкенің жөні бір басқа. Ал АНА туралы жыр мүлде бөлек. Марлен ағамыз таңды таңға ұрып, күздің сарғайған жапырағындай анасына деген сағынышын айтқанда көздің жасына ерік беріп, дем алмастан тек АНА тақырыбында жалықпай, талмай әңгіме өрбітуге ойы да, санасы да, жүректен шығатын сөзі де жеткілікті азамат. Осыдан қарап-ақ жанының тазалығын, ниетінің ақтығын, пейілінің кеңдігін байқауға болады. Ал оны өмірге алып келген бақытты ананың есімін бүгінде қараталдықтардың еңкейген қариясы мен еңбектеген баласын бері қойғанда арысы еліміздің маңдайына біткен жұлдыздар да жақсы біледі. Себебі оның артында қалған ұрпақтары есімін елге танытты. Осыдан адам ұрпағымен мың жасайтынын білуге болады.
Анасының туған күніне, арнап жыл сайын өткізілетін еске алу кешін көпшілік асыға күтеді. Ол туралы ағамыз бен оның бауырларымен жолыға қалған кісілер айтады. Атақты кино және театр майталманы Қаныбек Байсейітовтың атына берілген алақандай ауылға көктемнің лебі сезілсе Көлбаевтар әулеті сол ауылға жол тартады. Асқаралы әкесі жол бастаса, бауыр еті бауырлары қоштап, бала-шағалары ізін жалғастырады. Тек ойсыраған орны бос қалған аналары ғана жетіспейді оларға. Сауле ананың шыр етіп дүниеге келген күні яғни, наурыздың төртінші жұлдызында Мәдениет үйінің есігі ауыл тұрғындарына айқара ашылады. Көлбаевтардың «Көп балалы АНА», «Қарт АНА», «Ұстаз АНА», «АНА еңбегіне алғыс», «Туысқан ел АНАСЫНА құрмет», «Ұлағатты келін», «Өнегелі ұрпақ» номинациясы бойынша ауыл аналарына көңіл бөліп, аз да болса өздерінің тарапынан сыйлық жасағандығын көрегендігінің нәтижесі деп білеміз. Міне, ауылдың үлкені мен жасын түгендеп, анасының атына құран бағыштатып, үлкеннен бата алған ұрпақтары сол дәстүрден жаңылған емес. Бұл көпке үлгі боларлықтай іс. Қапаш ата мен Сауле апайдан тараған жігерлі, рухты үш ұлы мен инабатты екі қызы өзара ақылдасып, анасының есіміне құрмет болсын деген мақсатпен отбасылық қағиданы қатаң бекіткен. Мысалы, олар ана есімінің ешқашан да шаң басқан архивте жатып қалмауы үшін былай жасаған.
С – Салима
А – Аружан, Алихан, Ариман, Аятали, Аймерей, Арәділ, Алисұлтан
У – Уалихан, Уасима, Уайс
Л – Лұқман, Линара, Луина
Е – Емірхан, Емран.
Алтын құрсақты ананың атын артында қалған ұл-қыздары осылайша әспеттеп келеді. Бір атадан, анадан туған бес бала аналарының есімінен бір әріптен алып, балаларының есімін сол әріптен бастап қоюды мақсат еткен. Екі қарындасын ұзатарда құдалар мен күйеубалаларымен жолығып, осындай ойлары барын, сол дәстүр бұзылмауын түсіндіріп, ол кісілердің рұқсатын алған. Анаға деген құрметті ерекше тұтатынын байқаған құдалар мен күйеубалалар бір сөзден түсінген, келіскен. «А» әрпінен басталатын жеті баланың әкесі осы Марлен Қапашұлы. Бұл да көпшілікке ой салар дүние екені анық.
Марлен ағамыз балаларының есімін өзі қояды. Ол қайталанбайтын атты қойғанды ұнататынын тағы айтты. Себебі, ертең ең бірінші ата-ана сұралатынын білген отағасы әр баласының есіміне үлкен мәнмен қарайды. Мәселен, Алиханның есімі Алихан Байменовпен байланысты. Ал Ариманды ары таза, жүрегінде иманы бар азамат болса, Аятали қасиетті Құран кәрімнің аяттары мен Пайғамбарымыздың (с.ғ.с) күйеубаласы Алидің есімін қосқан. Биыл бірінші сыныпқа аяқ басқан Аймерейдің де мағынасы зор. Айдай сұлу, мерейлі болсын деп ырымдаған. Өмірде әділдіктің туын көкке көтеруге тырысып, амал етіп жүрген пенденің ақ ниетінің нәтижесінде өмірге келген баласына Арәділ деген ат берген. Қазақта кенже бала шаңырақтың иесі атанатыны бесенеден белгілі. Сол секілді ағамыз кенжесіне Алисұлтан деп азан шақырып ат қойған. Өз сөзінде: «Қара шаңырақ иесі болсын деген ниетпен Алиге сұлтанды қостым. Егер де Жаратушым тағы да менің отбасыма нәресте сыйласа әкелік жауапкершілікті сезіне отырып, ертеңгі күні «неге маған осындай ат қойдыңыздар?» деп айтпайтындай, мағыналы да мәнді есім беруге тырысамын», деген еді. Тілек қабыл болсын демекпіз.
Алдағы уақытта «Анам жайлы әңгіме» атты кітап та көпшілікке ұсынылмақшы. Онда ана мен бала арасындағы махаббаттың ыстық, теңдессіз екені жазылады. АНА деген аяулы адамды сыйлаудың, құрметтеудің, қадірлеудің қаншалықты маңызды екені де осы басылымда айтылмақ. Бұл да анасын бір көрмек түгелі қоңырау шалуға уақыт таппайтындар үшін үлкен сабақ. Міне, Сауледей ана есімі саналы да салиқалы ұрпақтары барда мың жасары анық.
АДАМНЫҢ
БІР ҚЫЗЫҒЫ...
Отбасын қазақы құндылықтармен сусындатып өсіретін әкенің рөлі қашанда жоғары. Орны қашан да төр. Бұл отанасының ақылдылығынан десек артық емес.
Жастайынан көп балалы болуды армандаған жас жігіт бүгінгі таңда ойлаған арманына жетті. Шаңырағында бақытты әке әрбір баласының болашағына қатты алаңдайды. Ертең өкініп қалмайтындай көп дүниені бүгіннен бастағанды жөн санайды. Соның алдын алу мақсатында балаларын да біраз дүниеден тыйған. Ғаламды «телефономанияға» шалдықтырған дерт бұл отбасында жоқ. Себебі баланың ертеңіне алаңдаған ата-ана оларды «смартфоннан» ада қылған. Биыл 11-сынып оқитын Аружан ғана қатарынан қалмай, жаңа үлгідегі телефонды қолдануда. Ал қалғандары тіпті, «маған да алып берші» деп айтудан аулақ. Есесіне өздерінің қабілеттеріне, табиғатына, икеміне қарай спорт түрлерімен айналысады. Әр баласының жетістігіне бөркін аспанға атып қуанған әкенің қуанышы қойнына сыймай кетеді. Ұлы Алихан күрес спортынан жоғары көрсеткішке қол жеткізсе, Аяталиі бір жылдық еңбегінің нәтижесінде каратэден көк белбеуді беліне байлады. Ариманы күй шертуден байқауға қатысып, дипломант атанған. Балаларының жеңісі мен жетістігі қай ата-ананы болсын шексіз қуантады. Қуанышты да жеңісті сәттері көп болсын деп тілекші болыстық.
Жеті баласының бесеуі мектеп қабырғасында білім алуда. Олардың тәрбиесі мен тәртібі, білімі тікелей әкенің де, ананың да жіті қадағалауында. Дегенмен, отбасының қамқоршысы, асыраушысы әке түздің адамы болғандықтан, көбіне бас-көз болатын отанасы. Егер де бала болып, айтқан тілді алмайтын болса кешкісін әкесі қызметтен келісімен әке мен ұл арасында әңгіме өрбитін көрінеді. Сөз түсінер, ақыл ұғар балалар айтылған сөзден ертесінде нәтиже шығаратыны бізді де қуантты. Мектепте ата-аналардың қатысуымен өтетін жиналысқа көбіне анасы жауапты. Күнделікке де қол қоятын сол кісі.
Шаңырақ көтерген кезде тұрақты әрі нақты қызметі де болмаған. Сонда да көп балалы болу арманы мен мақсатының үзіліп қалмауы үшін күндіз-түні еңбек етті. Соңында асыл жары екеуі биік белесті бағындырды. Әр баланың өзінің нәсібі бар дегендей әр байлығының, қазынасының нәсібі өзінде. Марқұм әжесі балдай тәтті немересінің түк басқан денесіне қарап: «Менің балам бай болады», – деп отырады екен. Ойын баласы ол кезде байлықты тек материалдық құндылық деп түсінсе керек. Ал қазір байлығы да, бары да, нары да ол – отбасы, бала-шағасы.
Негізі бала екі жасқа дейін жыласа «Қой. Үніңді өшір» деп айтпау керектігін көпшілік түсіне бермейді. Шырылдаған шарана жылау арқылы Жаратқаннан ата-анасының күнәсі үшін кешірім сұрайды. Бұл үрдіс осы әулеттің қағидасына алтын әріппен жазылып, сақталған. Ал бес жасқа дейін олардың айтқанын істеп, бал балалықтың балдай дәмін таттыруға ықпал ету керектігін де ата-ана жадынан шығарған емес. Шығармайды да. Балалар бес жастан асқан соң әке айтқан темірдей тәртіпке бағынады. Атпал азамат үнемі жарына: «Шаңырақ көтерген жас отбасыға тәбәрік беруді ұмытпа. Оларға біздің жолымызды берсін. Жақсылығымыз арқылы шапағатшы болайық. Халық санын көбейтуге әрбір азамат үлес қоссын. Құрылған әр шаңырақта сәбидің күлкісі естілсе бұл дегеніміз нағыз бақыт. Осыны барлық адам сезінсе деймін», – деп айтқаны да көрегендігінің, жанашырлығының бір айғағы екеніне көз жеткіздік.
Қолы қалт ете қалса отбасына арнайтын әкенің жеке жоспары да бар. Ол айына екі рет киноға отбасымен тұрақты барып тұруды міндеттейді өзіне. Сыртқа серуенге шыққанда көрген кісілер таңырқап: «Мынаның бәрі сенің балаларың ба?», деп айтатын көрінеді. Сонда ана мен әке мақтанып, марқайып «иә» деп бірге жауап береді. Балаларының үлкені соңынан ерген інілері мен сіңлісіне көз қырын салса, кішкентайы балмұздақ алып, жүгіріп, құлап жатады. Соның күлгенінен, жылағаннан өмірге деген құлшынысты сезінетін отағасы әр баласынан жаңа күнге деген сенімді энергия алатынын жеткізді. Сонысына қарай әр баланың жаратылысына, табиғатына, ойына, сезіміне қарай көңіл бөлетінін де жасырмады. Бұл – баланың толыққанды отбасында ер жетуіне, қоғамға керек екенін сезіндіру десек артық болмас.
Жер Ана. Отан Ана. Аяулы Ана. Әкенің қанымен, ананың ақ сүтімен елге, жерге деген махаббаты бір бойына жиналған азаматтың болмысы нағыз ел десе еңіреп, жұрт десе жұмылып жанашырлық танытан адамның әрекеті. Олай деуге себеп тым көп. Соның көшін бастап тұрған - Ана. деген ұлы есімнің ұлылығына жетіп, үнемі ұлықтаудан, айтудан шаршамайтын, талмайтын саликалы ұрпақтың болғаны. Ондай адамның бағыты айөын, бағдары анық болатыны ақиқатынан белгілі. Осы әрекеті арқылы ортасына сыйлы, көпке үлгі болады. Мұндай азаматтар қатары көбейсе деген тілектен басқа айтарымыз жоқ.
Бірер жылдан бері Елбасы дәл бүгінгі күнді, яғни, 8-қыркүйекті елімізде "Отбасы күні" деп жариялады. Осы мерейлі мерекемен қатар келген 7 қыркүйек "Аналар күнінде", сәрсенбінің сәтті күні мақала кейіпкері Марлен Қапашұлының асыл жары Сауле Сейіткерімқызы Мемлекет басшысының Жарлығымен "Алтын алқа" иегері атанды. Бұл сыр-сұхбатымызды ата басылымның атынан берілген сый деп қабылдаңыздар, құрметті мерейлі отбасы.
Еңлік КЕНЕБАЕВА