Оқи отырыңыз
Талғар ауданы тұрғындары үшін аса маңызды мәселенің бірі – электр жарығымен үзіліссіз қамтамасыз ету. Ал жаңа ықшамаудандарда қоныстанып жатқан халық пен ауыл тұрғындарын жарықпен қамтуда бұған дейін бірқатар келеңсіздіктің туындағанын жоққа шығаруға болмайды. Осы тығырықтан шығуда 2019 жылдың мамыр айында Алматы облысы әкімдігі мен «Алатау жарық» компаниясының арасында келісімшарт жасалған. Соған орай аудандық коммуналдық шаруашылық мекемесінің құзырындағы трансформаторлы қосалқы стансы мен электр желілерін АЖК-ның сенімгерлік басқаруына өткізу бекітілген.
- Қазір Талғарда 66 қосалқы стансы бар. Биылғы жылдың басынан бері 38-ін қабылдап, яғни, 4200 абонентке дербес есепшотын ашып бердік. Енді шамамен 1800 абонент қалды. Соның нәтижесінде тариф құны да төмендеп отыр. Бұрын әр киловатқа 28 теңгеден төлеп келгендер қазіргі таңда монополияға қарсы күрес комитеті белгілеген тариф бойынша 19 теңге көлемінде төлейді. Бұл тұрғындар үшін өте тиімді. Яғни, электр жарығын тұтынушылардың 70 пайызы қолайлы тарифке көшті. Бүгінде Жаңалық, Жалғамыс, Тұздыбастау, Кіші Байсерке, Төңкеріс, Гүлдала ауылының жаңа ықшамаудандары түгелге дерлік «АЖК»-ға өтті. Осы күні «Айғаным» ықшамауданында жұмыстар жалғасын табуда. Электр энергиясындағы қымбатшылықты жою жолында аудан әкімі Қайдар Әлиханұлымен бірлесіп, халықты үзіліссіз жарықпен қамту және бірыңғай тарифпен төлеу жұмыстары атқарылуда. Ең бірінші, әлеуметтік осал топтағы отбасылар ескерілуде, – дейді «Алатау жарық» компаниясы Талғар электр торабы мекемесінің директоры Мұхтар Темірбеков.
Осы жұмысты жақсарту бойынша инвесторлар тартылуда. Ескі электр желілерінің бағандарын ауыстырып, орнына темірбетонды бағандар орнату жұмыстары арнайы бағдарлама шеңберінде жүзеге асуда. Нәтижесінде 10 кв-тық 138 баған және 0,4 кв-тық 117 баған жаңартылған. Ауданды жарықтандырудың сапасын арттыруды көздеген «Алатау жарық» компаниясы үнемі ізденіс үстінде. Сонау 80-жылдардан келе жатқан ескі қондырғыларды заманауи электр құрылғыларына ауыстырып, жарықтандыруды жақсартуға үлес қосуда. Осыдан үш жыл бұрын Талғар қаласын жарықпен қамтамасыз ететін қосалқы стансы күрделі жөндеуден өткен. Нәтижесінде Талғар қаласында жарықтан жетіспеушілік жоқ. Мұндай жұмыстар ауылдық округтерде жалғасын табуда.
Халықты электр жарығымен қамтамасыз ету саласында еңбек ететін мамандардың жұмысы қауіп-қатерге толы болатыны белгілі. Сондықтан қауіпсіздікті сақтау – басты міндет. Осы күні аталған мекемеде инженерлік-техникалық құрам мен электромонтерлер бар, жалпы саны 194 адам қызмет етеді. Олардың ішінде өз ісіне адалдық танытып, табаны күректей 30 жылға жуық еңбек етіп келе жатқан азаматтар есімін ерекше атау абзал. Атап айтсақ, инженер-техниктер Жанұзақ Бейсенов, Нұртай Әлиев, Әлікен Удиманов, Жолболды Жаманкөзов, Бақытжан Қозыбақов, диспетчерлер Михаил Васильев, Мұхит Албан, басқа да жауапты мамандар есімі ілтипатпен аталады.
"ЖЕТІСУ-АҚПАРАТ"
