ҒИБРАТТЫ ҒҰМЫР
Туған жердің саумал самалымен тыныстап, асқар таулардың мұсатыр мұзына мейірлене қарап, сол мұздақтардан жылыстап шыққан мөлдір суға жүз шайып, емін-еркін арқаны кеңге салғанға не жетсін?! Кең даланың қасиетті пұшпағына табан тіреп тұрып өткен өмірге, ел дегенде ерен күшпен іс тындыруға ұмтылып, қасиетті Отанның текті тегершігіне айналуды мақсат тұтқан сонау жылдарға ойша сапар шегу де бір ғанибет екен-ау! Қарап отырса, сексеннің сеңгіріне шыққан осынау аяулы сәтке дейін талай мехнатты бастан кешіп, сан батпанды арқалапты. Екі ғасыр айрығындағы ұлы оқиғаларды көз алдынан өткеріп, Қазақстан Республикасының Тәуелсіздігін салтанатпен жариялағанына жұдырықтай жүрегін атқақтата қуаныпты. Енді, міне, азат елдің аспанында күн күлгеніне ширек ғасырдан асып, Ұлы Дала елінің өркениет көшінен табылғанына және бір риза болып, саналы ғұмырының жігері тасқан, қуаты артқан сәттерінде еңбегінің өтеуін көріп, жон арқа мен маңдай тердің текке кетпегеніне іштей қуанатындай...
Мәңгілік Ел боламыз деп белді бекем буып, сан ғасырғы тарихымызды түгендеп, алмастың жүзінде, найзаның ұшында жарқылдаған рухымызды бір, бір емес-ау, мың түлеткен бүгінгі шақта ел ардақтысы Аманғазы ШЕГІРОВ осындай парасатты пайым жасаса керек! Дәл осылай қанағат көңілмен, қуаныш лебімен арқаны кеңге салып өткен кезеңге сана жетелетуге, ойша сапар шегуге толықтай құқылы. Өйткені ол туған елдің түтінінің түзу ұшып, тұрмысының жандануына, ел еңсесінің тік келіп, рухының бекем, Отанының тәуелсіз де ғұмырлы болуы үшін аянбай тер төккен Алаштың атпал азаматтарының бірі.
Өмір өткелдерінен өнегемен өту үлкен жауапкершілік пен ауыр міндет жүктемек. Тарау-тарау тарих толқынында текті жұрттың мұңы мен мұқтажын арқалап, қара нардай қайыспай көтеріп келе жатқан азаматтар арамызда баршылық. Сондай атпал азаматтардың бірі осыдан тура сексен жыл бұрын шырайлы шығыстың шоқтығын биіктеткен Ақшатауда өмір есігін ашқан Аманғазы Шегіров деп ерекше атап өтуге негіз бар.
Алматы облысының және Талдықорған қаласының Құрметті азаматы, «Құрмет» орденінің иегері Аманғазы Ахметқалиұлы жасынан еңбек көрігін қыздырып, жұрт үшін тер төккен тектілердің бірі. Соғыстан кейінгі қиындықтың кермек дәмін ерте татқандардың бірегейі. Энергетика саласында қарапайым жұмысшыдан ел басқару ісіне дейінгі еңбек басқыштарын табандылықпен басып өтіп, болаттай шыңдалған ол бүгінде бейнетінің зейнетін көріп отырған ұлт перзенті.
Ел алғысын арқалаған Аманғазы Шегіровтің бүгінгі дара тұлға, жарқын бейне, асқақ тұғырына өмірінің соқтықпалы-соқпақты жолдары негіз болған. Оның бал дәурен балалық шағы зұлмат дабылын қақтыра басталған Ұлы Отан соғысымен тұспа-тұс келген. Сондықтан да бұғанасы бекімеген бала Аманғазы «Бәрі де майдан үшін» деп аталатын тылдағы қызыл шоқтай лапылдаған еңбектің бел ортасында тәрбиеленді. Құс миын қайнатар аптапта жонарқадан тер саулап, тән қарыған аязда буы бұрқырай жұмыс жасағандардың ішінде Аманғазы да майдан үшін жастық жігерін сарп етті.
Бір дәуірдің үстемдігі сол кезеңде туғандардың сегізкөзін сырқыратып, тілерсегін орақпен осқандай жүрісінен жаңылдыратынын қарт тарихтың өзі куәландырады. Сондай кезеңде еңбек даласында ержетуге тура келген Аманғазыға жазықсыз жала мен қуғын-сүргіннің салқыны қатты батқан. Алайда шынашақтай шағынан шарболаттай шыңдалуға, қайралуға бейіл келіп, төзімділікті тірек тұтқан ол күнұзаққа ауыр еңбекпен өмірін өткізген ересектер арасында тез ержетті. Кіндік қаны тама салып сақалы ақ селеудей болған қарияның ыстық құшағына кіріп, кимешекті әже әлдиімен тербеліп өскен ол Ақшатаудың үш сыныптық мектебін ойдағыдай аяқтап, сауат ашты.
Тігерге тұяқ қалдырмаған саясаттың салқынына ұшыраған қазақ отбасылары қынадай қырылған қасіретті кезең кеше ғана өте шыққандай. Соғыстан кейін қарақан басының амандығы үшін жанындағы серігіне жалған жала жабатын қанды науқан басталды. Сол шақта Аманғазыны мынау сақи жалғанға шыр еткізіп әкелген әкесі мен шешесі осындай әділетсіздіктің құрбанына айнала жаздаған. Екінші дүниежүзілік соғыстың қарсаңында әскери борышын өтеуге аттанған абзал әке фин майданында тобығынан қан кешіп, 1944 жылы бір қолынан айырылып елге оралады. Ахметқалидың отбасы тұрмыс тауқыметінің зардабын тартады. Еңбекке жарамсыз асқар таудай әкенің жағдайы жас Аманғазыға үлкен жауапкершілік жүктейді. Содан бастап шыдам мен төзімді қажет ететін даланың ауыр жұмыстарына ерте кірісіп, өгізбен жер жыртады. Анасы Сахан мен әкесі Ахметқалиға қолғабыс жасаймын деп егістік басында тұқым септі. Сол тұста ауылда қатты жұт болып, мал біткенді жусатып салғаны бар. Ауа райы қытымыр келер шығыстың қаһарлы қысы мыңғырған малды бұрқасында адастырып, талмап жейтін талшық таптырмай әбден жұтатып жібереді. Табиғаттың теріс мінезінің салдарынан қып-қызыл шығынға ұшыраса да сыныққа сылтау таппаған қатал билік Ахметқалиды он бес жылға итжеккенге айдайды. «Халық жауы» атанған жазықсыз әкенің қилы тағдыры Аманғазының жүрегіне у құйғандай болады. Шиеттей төрт бала анасының аузына қарап қалады. Алайда халықтың зары мен мұңына құлақ аспай, билігін шектен шығарған Сталин өмірден озып, ел іші тыныштыққа кенелген кезде Аманғазының әкесі дін аман туған жеріне жыл құсындай қайтып оралады. Жапқан жала, жаққан күйеден арылады. Бұл күнде жүректе қалған бармақтай ізді, күш-жігерді сарп еткен жемісті еңбектерге алмастырған Аманғазы Шегіров сол кездер жайлы былай деп толғанады: «Әкей істі болып кеткен соң нағашымның үйінде тұрып, оқып жүрген мен мектеп-интернатқа барып орналастым. Тамақ әзір, жағдай тәуір. Жетінші сыныпты бітіріп шықтым. Жаңа оқу жылы басталғанда мені «халық жауының» баласы деп шығарып жіберді. Қартайған ата-ене, үш ұл, бір кестетігердің қамымен жүрген шешейге хабар бердім. Тал қармағандай тірлікке басқан шешем жетектеп отырып Аягөздегі ағайын-туысты жағалады, бірақ ешқайсысы да қол ұшын бермеді. Кейбіреуі ашығын айтып, бірі сырғақтады дерсің... Содан кейін «ер мойнында қыл арқан шірімес» деген бабалардың жігерлі сөзін ақиқатқа айналдырып, Ойсылқара төлін бақтым. «Сабақты ине сәтімен» дегендей, мектеп директоры майдангер, контузияға ұшыраған адам еді. Мені оқушылар тізіміне тіркеп қойды да емтиханға жіберіп тұрды. Сол ұстазымның арқасында қатарымнан қалмай, түйе бағып жүріп мектепті «Күміс мадальмен» тамамдадым. Әкей аман-есен оралған соң елдің де, жамағайынның да көзқарасы өзгеріп шыға келді. Тіпті туыстың қатары көбейді... Мұның бәрі сонау күннің естеліктері».
Күрсініспен өткен күннің бәрі жылдар алмасқанда өміріңнің толғана отырып термелей жеткізер ең нұрлы естеліктері болуы да мүмкін. Оны ардақты жанның жүрек толғанысынан айқын аңғарғандай болдық. Орта мектепті күміс медальға үздік аяқтаған әрі асыл арманына айналған мамандыққа тезірек қол жеткізгісі келген Аманғазы Ташкент қаласындағы Орта Азия политехникалық институтының энергетика факультетіне оқуға түседі. Студенттік қызықты өмір, жастық шақтың естен кетпес сан тарау соқпағы енді басталады. Ал, мамандық таңдауға түрткі болған оқиға жайлы Аманғазы Шегіров бір естелігінде: «Аягөзде мектепте оқып жүрген кезім. Балалық дарқан көңілмен жүріп қай мамандықтың басын ұстаймын деп ойланған да емеспін. Бірде тұрғындардың арасында Аягөзге энергопойызы келіпті деген әңгіме шығып, кеңінен тарап кетті. Майшамның жарығымен сабақ оқып, сығырайған оттың сәулесімен күнін әзер көріп жүрген халыққа электр жарығы таңсық болды. Тіпті сынып жетекшіміз марқұм Сейітқазы Жөкебаев экскурсияға барайық деп бізді сонда бастап барды. Кіріп барсақ, іші жап-жарық, жан-жақта лампочкалар жарқырай көзге ұрады. Құдды ертегі әлеміне енгендей күйге бөленгеніміз бар. Жарқыраған электр энергиясы, отарба ішіндегі электр генераторы мені қатты қызықтырды. Осы кезден бастап менің аңсарым энергетикаға ауды. Содан кейін біз тұратын қала жаппай электр тогымен қамтамасыз етілді», – деп толғаныпты. Өзі айшықтағандай, ойламаған жерден болған сол оқиға жас талапкердің жүрегіне нұр ұялатып, кейін мамандығының майталманы атанарына әсер етеді деп сол кезде ешкім ойламаған да болар-ау...
Жастық шақтың жайлауы кең ғой, шіркін! Көңілдің көк дөненін ойнатып тауға да шығып, шағаласы шулаған айдында желкен көтерем десең де сен үшін әрбір істің сөкеттігі жоқ. Алайда саф алтынның ерітіндісіндей сырғып өтер жастық шақты текке жіберіп алатындардың қатары тым көп көрінетіні бар. Дегенмен де Аманғазы ондайдан аулақ. Ол студент шағынан тыным тауып отырған емес. Институт қабырғасында тарих, саясиэкономия сияқты пәндерді өзбекше, математика, химия пәндерін орысша тапсырып, өзінен бір жыл бұрын оқыған Өзбекстанның бұрынғы президенті Ислам Каримовтермен лабораториялық сабақтарда бірге жүрді. Өмір мектебіне қанаты қатаймай жатып түсіп, сұрапыл жылдардың суығына тоңып, әкесі мен анасына қаршадайынан қол ұшын берген жігіт студент кезінде-ақ іс-тәжірибеден өтіп, кәсіби біліктілігін шыңдайды. Сөйтіп жүріп 1961 жылы институтты жақсы бітіріп шыққан.
Өзбекстандағы үлкен-үлкен энергетикалық орындарда тәжірибеден өтіп ысылған Аманғазы жолдамамен Қоқан қаласындағы Жылу электрстансысына барады. Диплом қолда, жұмыс жолда деп желпініп жеткен қазақтың жас жігітіне сол кездегі бұйырған қызмет – «кочегар». Бұл шартты атауы, былайғыда газ және мазутпен, аппараттың батырмаларын басып жұмыс істейсің. Арынды азаматты осындай жұмысқа жеккен стансы директоры: «Ештеңе етпейді, кейін маған алғысыңды айтасың», – дейді.
Расымен де энергетика саласының ең төменгі сатысы саналар бұл қызметтің Аманғазыға бергені мол. Өйткені мамандығының майталманы болу үшін ортадан қойып кетпей, ең төменгі сатыдан бастап өрлеуі тиіс-ті. Бұл – энергетиканың басты шарты! Он бес күн оқып, ендігі он бес күнде жұмыс істеп жүріп, алты ай өткенде Аманғазы ауысым бастығы болу үшін емтихан тапсырған. Сынақтан сүрінбей өткен ол қарамағындағы 36-40 адамға басшылық етіп, бір жылдан соң зауыттың, бір жарым жылдан соң қаланың Құрмет тақтасына суреті ілінеді. Жалындаған жиырма төрт жасында партияға мүшелікке өтеді. Алайда қалалық партия комитетінің бірінші хатшысының: «Қалалық комсомол комитетінің екінші хатшысы болып кел» деген тілегін құп көрмей, «өзбекше білмеймін ғой» деп сырғақтата жауап береді. Мұның астарында елге қайтып, туған жерде тыныстап, өскен ортаны өркендетсем деген ұлы аңсар жатқан-ды.
Қоқан қаласында аттай төрт жыл жемісті еңбек еткен Аманғазы 1965 жылы Мәскеуге Энергетика министрлігіне өтініш жазып, Қазақстанға қайтуды сұрайды. «Өзге жерде сұлтан болғанша, өз жұртының ұлтаны» деп танылу азамат үшін арлы іс. Осындай оймен туған жердің түтінін түзу ұшырып, энергетика саласына сүбелі үлесін қосуды мақсат тұтқан оған Жамбыл, Екібастұз, Текелі қалаларының бірін таңдауға тура келеді. Көктен тілегені жерден табылғандай болған Аманғазы бірден жердің жұмақ мекеніне көңілі ауып, Текеліге ауысым бастығы болып келеді. Жыл өткенде аға инженер болса, ендігіде жыл толмай жатып Энергия комбинатының бөлім бастығының орынбасарлығына көтеріледі. Одан кейін сол кездегі Текелі қалалық партия комитетінің бірінші хатшысы Қажыкен Сәдуақасовтың ұсынысымен салынып жатқан Ақсу қант зауытына бас инженер болып барса, бір жылдан соң директор болып сайланады.
Қоғам тынысын сезініп, ел игілігі жолында белсенділік танытып, тындырымды ісімен алға жылжыған еңбекқор, жауапкершілігі мол жан Талдықорған қалалық және облыстық партия комитетінің нұсқаушысы, бөлім бастығы сынды жауапты жұмыстарды атқарады. Жеті жыл Талдықорған шаһарының әкімі қызметін абыроймен өткереді. Бұл жайлы атпал азамат: «Ол уақытта қала өндіріс орнының көптігімен танымал еді. Зауыт-фабрика, темір-бетон, жылына 2-2,5 мың дана өнім шығаратын қорғасынды және сілтілік аккумулятор зауыты. Мұнда екі жабық цех болды, оған тіпті атқару комитетінің төрағасы кіре алмайтын. Қазір ұшып жатқан ғарыш корабльдерінің батареялары осы Талдықорғанда жасалатын. Онда он-он бес тексеруден өткендер ғана жұмыс жасайтын, көпшілік мұндай зауыттан хабарсыз да болатын», – деп бір естелігінде ғажап шаһарда басшылық жасаған жылдарын ерекше атап өтіпті.
Аманғазы Шегіров басқарған жылдарда әсем шаһар өзінің сәулетіне сән қосты. Оған көпшілік куә. Талдықорған қаласының әкімі лауазымды қызметін абыроймен атқарған азамат Қазақстан Республикасы Жоғарғы Кеңесінің ХІІ шақырылымының депутаты болып сайланған-ды.
«Қаланың өркендеуіне, елдің әлеуметтік-экономикалық жағдайын жақсартуға мемлекет барынша қамқорлық жасап келеді. Бүгінде Талдықорған қаласы тотыдай түрленіп, жылдан-жылға гүлдене түсуде. Таңертең тұрсаң бір өзгерісті байқайсың. Бұған қалайша жүрегің елжіремейді?! Алайда, кешегі кезеңнен бері жөндеу көрмеген мектептер, ойқыш-ұйқыш жол, шелектеп тасылатын ауызсу сынды көптеген дүниелер де көңілді кіреукелемей қоймайды. Санамалайтын болсаң санына жетпес мұқтаждық қазақылықтың қайнар бұлағы, ұлттың қан тамыры саналатын ауылдарымызда әлі де жетерлік. Ол жаққа да ерекше қамқорлық қажет», – деп бүгінгі күнге парасаттылықпен пайым жасап, жүрегін тулатқан Талдықорғанның сұлулығына сүйсініп, кейбір кемшіліктерге де мән беріп отыратын Аманғазы Шегіров ерен еңбегінің өтемін көрген жан. Оны елдің ақеділ алғысынан, азаматтың аты аталған жердегі жетісулық жұрттың қошеметінен-ақ пайымдауға негіз бар. Ардагердің сан жылғы еңбегінің өтемі ретінде Алматы облысы және Талдықорған қаласының Құрметті азаматы атақтарын, «Құрмет» орденінің иегері марапатын да алға тартуға болады. «Еңбектегі ерлігі үшін», «Еңбек ардагері», «Қазақстан Республикасы Тәуелсіздігіне 10 жыл», «Украинаны фашистерден азат етудің 60 жылдығы», «Қазақстан Конституциясына 10 жыл», «Қазақстан Республикасы Тәуелсіздігіне 20 жыл», «1941-1945 ж.ж. Ұлы Отан соғысы Жеңісіне 70 жыл», «Қазақстан Конституциясына 20 жыл» мерейтойлық медальдарын да ерен еңбектің майталманына берілген лайықты баға, шынайы құрмет деп білген абзал.
Біраз уақыт бұрын басылым беттерінің бірінде жарияланған сұхбатында ел азаматы: «Мен өте бақытты адаммын. Таңдаған мамандығымды меңгердім. Істеген қызметтерім адал да абыройлы болды. Зайыбым Ғибадатпен сонау студенттік шақтың сәулелі кездерінен бастап, нақты айтсам, 1961 жылдан ынтымақты, берекелі, үйлесімді ғұмыр кешіп келемін. Ұл-қыз өсіріп, оларды қанаттандырдық. Олардан балдан тәтті немере сүйіп отырған жайым бар. Жетісу жері түгел танып, құрметтейді», – депті. Өзі атап өткендей, Аманғазы Ахметқалиұлы бақытты жан. Оның маңдайына жаратушы ие бес елі бақ дарытып, бойына ел басқару ісін абыроймен өткерер төзімділік, шеберлік, іскерлік қасиеттері мен адалдық, зор жауапкершілік сыйлапты. Ұлын ұландай тәрбиелеп ұяға, қызын қаршығадай баулып қияға қондырған асқар таудай әке бүгін солардан немере сүйіп отыр.
Ақшатаудан арман күлігіне мініп аттанған ол бүгінде жұмақ мекен саналар Талдықорғанға түпкілікті қоныс тепті. Ол осынау ғибратты ғұмырында ел үшін еңбек етіп, әйгілі Ақсу қант зауытының алғашқы өнімін шығаруға атсалысқанына, алып қала Алматы мен Өскеменді байланыстырып жатқан Қараталдың жаңа көпірін салдыруға көмек қолын созып, Президентке тікелей баяндап іргетасын қаласқанына сан мәрте шүкіршілік етеді. Біз де осынау тұлғасы асқар таудай биік жанның өнегелі өміріне зер сала отырып, осындай азаматтардың барына шын риза боламыз. Сөз соңында сексеннің сеңгіріне шыққан қайсар жанға қазақтың от кеуделі ақыны Жамбыл Жабаевтың жасына жетіп, азат елдің жетістіктеріне қуанып аман-есен жүре беруіне тілекші екенімізді жеткізгіміз келеді.
Гүлжиян СҮЛЕЙМЕНОВА,
«Құрмет» орденінің иегері,
Алматы облысының Құрметті азаматы