Оқи отырыңыз
Әл-Фараби атындағы Қазақ ұлттық университетінде «Сананың ашықтығы» атты Қазақстан халқы Ассамблеясы ұйымдастырған ІІІ халықаралық медиа форум өтті. Екі күнге созылған алқалы жиында бірқатар өзекті мәселелер сөз болды.
Атап айтқанда, қоғамды рухани жаңғырту мен сананың ашықтығын қалыптастыру, ұлттық бірегейлікті нығайтудағы бұқаралық ақпарат құралдарының рөлі, кәсіби этика жайы, сонымен қатар, көпэтносты қоғамда масс-медиа мәдениетін дамыту мәселелері жан-жақты талқыланды.
Форумның алғашқы күнінде Қымбат Досжан, Қанат Әуесбай, Нартай Аралбайұлы, Қымбат Қангелдина, Ерлан Игісінов сынды танымал отандық тележурналистер шеберлік сабақтарын өткізіп, қоғамды рухани жаңғыртудағы тілшілердің рөлі туралы өз ойларын ортаға салды.
Ал форумның екінші күні TEDx форматындағы халықаралық конференцияға ұласты. Аталған шараға ҚХА Төрағасының орынбасары, хатшылық меңгерушісі Дархан Мыңбай, ҚР Ақпарат және коммуникациялар вице-министрі Алан Әжібаев, ҚР Парламентінің депутаттары, Германия, Латвия, Ресей, Өзбекстан елдерінен келген сарапшылар мен отандық медиа саласының білгірлері, сондай-ақ этномәдени бірлестіктердің, республикалық және аймақтық БАҚ өкілдері, журналистика факультетінің студенттері қатысты.
Жиынды «Хабар» телеарнасы директорының орынбасары Ерлан Игісінов ашып, жүргізіп отырды. Форумның кіріспе сөзінде Дархан Мыңбай бұл басқосудың маңызды тұстарына тоқталды.
– Осындай медиа форум алаңдары білікті маман даярлауда және болашақ журналистерімізді қалыптастыруда, ұлтаралық, этносаралық мәселелердің шешілуіне септігін тигізетін зор мүмкіндік, – деді Дархан Қамзабекұлы.
Бұдан кейін сөз алған ҚР Ақпарат және коммуникациялар вице-министрі Алан Әжібаев аталған іс-шара еліміздің әлеуметтік және қоғамдық-саяси өміріндегі елеулі оқиға екенін айта келіп, форумға қатысушыларға сәттілік тіледі. Әл-Фараби атындағы ҚазҰУ ректоры Ғалымқайыр Мұтанов осындай игілікті іске атсалысу университет үшін үлкен мәртебе екенін сөз етті.
Алғашқы болып медиа форум мінберіне көтерілген «Қазақстандық медиа альянс» республикалық қоғамдық бірлестігінің жетекшісі Арманжан Байтасов «Кәсіпқой қауымдастықтар және олардың медиа ортадағы ұстанымы» атты тақырыпта баяндама жасаса, бүкілресейлік мемлекеттік телерадио компаниясының саяси шолушысы Кирилл Привалов қазіргі заманғы журналистиканың әлемдік үрдістері жайында ой өрбітті. Сонымен бірге, «Қазақ мәдениетін әлемде ілгерілету – мемлекет пен БАҚ рөлі» деген тақырыпта Германиядан келген әлеуметтік психология саласының халықаралық сарапшысы Константин Шамбер сөз қозғады.
Қазақ ұлттық өнер институтының доценті, «Ikerim.kz» сайтының негізін қалаушы Айгүл Мүкей «Масс-медиа саласында тұлғаның қалыптасуы» жөніндегі баяндамасын тыңдаушылардың назарына ұсынды. Сондай-ақ, шара аясында латвиялық журналист Владимир Решетов, Өзбекстаннан келген «Норма» экономикалық-құқықтық газетінің арнаулы тілшісі Гульнора Абдуназарова, қазақстандық блогер Өркен Кенжебек түрлі тақырыптар бойынша өз ойларын ортаға салды. Әрі осы барыста баяндамашылар форумға қатысушылардың қойған сауалдарына тұшымды жауаптар қайтарды.
– Шығармашылық адамдармен журналистердің жіті араласып, пікір алмасып, ой бөлісуінің маңызы зор. Соның нәтижесінде ұлтаралық бірлік, түсіністік пен татулық одан сайын өркен жаяды. Бүгінгі медиа форумның барысында осы жайларға ерекше мән берілгені бәрімізді қуандырды, – деді «Өлке тынысы» ЖШС директоры Мейрам Жанәділов аталған шарадан алған әсерін бізбен бөлісіп.
Форум соңында Қазақстан халқы Ассамблеясының журналистер арасында жыл сайын өткізетін «Шаңырақ» байқауының жеңімпаздары марапатталды.
Болат МӘЖИТ
