Оқи отырыңыз
Мамыр және маусым айларында таудан еріген қар суы сай-саланы аралап, Сарыөзек пен Көкталға қатынайтын автокөлік жолын жауып қалып жатады. Сонымен қатар, Алматы – Қорғас жолындағы Шарын өзенінің арнасы кеңімес үшін «Қазақавтожол» ЖШС мекемесі арнайы бөгет жасап, өзендердің жағдайын қалыпқа келтіру жұмысын жүргізді.
Облыс бойынша «Қазақавтожол» ЖШС мекемесінде 9 жол бөлімі бар. Оларға Сарыөзек пен Көкталға қатынайтын автокөлік жолдарының жұмысшылары өздеріне тиесілі 95-178 шақырым аралығындағы жұмысын бастап кетті. Жұмысқа экскаватор, бульдозер және үш КамАЗ жұмылдырылған.
«Қазақавтожол» ЖШС облыстық филиалы 90 ДЭУ бөлімінің басшысы Нұрлан Алипов: «Мұнда Алтынемел, Қойбын асуы бар таулы аймақ болған соң еріген қардың салдарынан жол жиегін су шайып, көлік жүруі қиынға соғады. Осыған орай төтенше жағдайдың алдын алу мақсатында қарқынды жұмысты бастап кеттік. Әдеттегідей жыл сайын сәуір айында білек сыбана осы жұмысқа кірісеміз. Былтыр топырақпен бөгет жасағанбыз, алайда таудан еріген қар суы шайып кетті. Биыл бөгетті таспен қалаудамыз. Енді қар суы қарапайым халыққа қиындық туғызбайды деген ойдамыз», – деді.
Осыдан кейін республикалық маңызы бар Алматы – Қорғас автожолының 215 шақырымындағы жөнделіп жатқан жұмысты бақылап қайттық. Жұмыс қызу үстінде. Әркім өз ісімен айналысып, тыным табар емес. Бірі экскаватормен арықты тереңдетіп арнаны қайта қалпына келтірсе, екіншісі, бульдозермен бөгет жасауда. Мұнда Шарын өзенінің арнасын тазалау, судың ағысын реттейтін бөгетті қалыпқа келтіру жұмыстары жүргізіліп жатыр. 12 наурыздан бастау алған шараға 1 бульдозер, 1 грейлер, 3 жүк көлігі және КамАЗ жұмылдырылған. Жұмыс барысында «Қазақавтожол» ЖШС облыстық филиалы 17 жол пайдалану бөлімінің басшысы Ербол Нұрсейітов өзеннің ластануының басты себебіне тоқталып, толықтай тарқатып берді. Ол:
– Су халық күл-қоқыстарын өзен бойына тастау салдарынан арнасын бұзуда. Бір жағынан тасқын да себеп. Қазір, міне, өзеннің арнасын қалыпқа келтіру жұмысы жүргізілуде. Сонымен қатар, КамАЗ көліктерімен күл-қоқыстарды тазалап шығарудамыз. Жалпы жұмыс аумағы 450 шаршы шақырымды қамтиды. Бұйырса 10 күнде жұмысты толықтай бітіреміз. Өзеннің табиғи байлығын жоғалтпай сақтап, жолдағы өзен арнасын ретке келтіру – біздің міндет, – деді. Панфилов ауданы жолаушылар көлігі автомобиль жолдарының бас маманы Маулет Тажиев: Сарыөзек – Көктал республикалық жолының 145-151 шақырымында үш селге қауіпті көпір орналасқан. Бүгінде «Қазақавтожол» ЖШС мекемесі көптеген жұмыс атқаруда», – дей келе жұмысшыларға алғысын білдірді.
Өзеннің басынан тасталған қоқыс жиналып, көпірлердің астына тұрып қалған. Соның салдарынан өзен суларының арнасы бұрылады. Сондықтан өзендерді тазалау жұмысы жыл сайын тұрақты түрде жүргізілуі қажет. Су жолды жауып қалмасын десек, өзен-көлдерімізді таза ұстап, жұмыла жұмыс істейік.
Айдар ҚАЛИЕВ
Панфилов ауданы
