Оқи отырыңыз
Қашанда киімге ерекше талғаммен қарайтын қыз-келіншектер үнемі стиліне өзгешелік енгізіп, болмаса қалауын тапсырыспен тіктіруге құмар келеді. Сұлулықтың сырын меңгерген кәсіби мамандар мұндай сәнқойлармен жұмыс істеу шабытты еселендіретіндігін жасырмайды.
Себебі, талғампаздардың көңілінен шығатын ерекше үлгіні әзірлеу үлкен күш-жігерді талап етеді. Осындайда «Сұлулық әлемді құтқарады» деген тәмсілдің шындыққа жанасатындығын сан мәрте мойындаған Жангүл Жазылбекова алдына келген тапсырыс иесін ажарлы етуден ләззат алады. Оның айтуынша, тігін мен қолөнер бұйымдарын (суреттегегі) жасауға деген қызығушылық қызына аяғы ауыр кезде ерекше артып, ол құмарлық өзінің сән орталығын ашуына дейін жетелеген. Сәнді киім тігуші шебер Берік Ысмайыловта екі жылдан астам уақыт қызмет еткен Жангүлдің бүгінде өзі де ұстаз ретінде тігін мен қолөнер бұйымдарын жасауға бейімділігі бар жанға кеңесін беріп, дұрыс-бұрысын үйрете алатындай-ақ тәжірибесі бар.
Қазір ол «Айдана» деп аталатын сән орталығында ұлттық болмысқа сай, қыз-келіншектердің бойындағы нәзіктікті айшықтай түсетін қоғамдық орында да күнделікті қымсынбай киетін түрлі нақыштағы киім тігеді. Айта кетейік, тек бұл ғана емес, сондай-ақ, мұнда әдемі шаш үлгісін жасау қызметі де ұсынылып, тіктірген көйлекке сәйкес келетін әшекей бұйымдар да табылады. Облыс орталығында ұлттық үлгіні насихаттайтын мұндай тігін шеберханаларының көптеп ашылуы ұлтжандылық сезімді арттырып, әдеміліктен бөлек, халқымыздың ою-өрнектерін кең қолданысқа енгізіп жатыр.
Бұл шеберханадан арнайы тапсырыспен той көйлегін тіктірген Іңкәр Мұқашева бүгінде ұлттық нақыштағы оюлы кеңсе формасының дайын болуын күтіп жүр.
– Нәзік жандылар қандай ортада, қандай жағдайда болсын бір-бірінен ерекшеленіп тұрғаны жөн. Әдемі көріну үлкен еңбекті, ыждағаттылықты талап ететіндігін ескерсек, сауда үйіндегі біріне-бірі ұқсас келетін киімдерден гөрі көп жағдайда тапсырыспен тіктіргенді ұнатамын. Өз қиялым мен қалауымдағы үлгіні үстіме ілгенде біздің елдің «алтын қолдыларының» жұмысына риза боламын. Әлемдік брендке айналатын ұлттық элементтерден тұратын киім үлгісін шығару қазақстандықтардың да қолынан келетіндігіне сенімім арта түседі.
Рас, сәнді көрініп, ұлттық киім үлгісін насихаттау үшін қазақша көйлек киіп, мерекедегідей жүру міндетті емес. Қаракөздеріміздің ұсынған идеяларын қолданысқа енгізуге жәрдемдессек болғаны. Алайда, біз өзімізден гөрі өзгенікіне құмартып тұруға әуес келеміз. Жас қыздар тек шетел компанияларының киімдері мен бұйымдарын тұтынуға және оны жарнамалауға жақын. Шетелдің актерлеріне ұқсағысы келетін олар ұлттық нақыш аңқып тұратын киім үлгісіне аса қызығушылық таныта қоймайтындығы да шындық. Бірақ біз өз еліміздің өнімін тұтынып қана қоймай, кең көлемде насихаттасақ оларды сатып алушылардың қатары артып, бағасы да төмендей түсер еді.
Бір бұйымның өзіне барын салып, жауапкершілікті сезіне отырып дайындауды ұнататын Жангүл сұлулық бағытындағы түрлі курстарға барып шеберлігін арттырып жүр. Жуықта өз ынтасымен дұрыс боянудың тәсілін үйрететін сабаққа қатысып тәлім алған ол өз түсінігіндегі сұлулықтың сырын ашты.
– Оның сыры – ең бірінші, әрине, нәзік көрінуде. Содан соң ішкі жан дүниең мен сыртқы келбетінің үйлесім табуында. Жай ғана шай құюдың өзінде-ақ сұлу көрінуге болады. Қалай дейсіз ғой? Қарапайым ғана тәсіл, үйде жүрмін екен демей, әдемі оюлы сырғаңызды тағып, орамалыңызды тартып сыпайылықпен шай ұсыну да – сұлулықтың бір нышаны. Тіпті, дастарқанға бауырсақ, кәмпитті шаша салмай, керісінше, оларды ерекшелеп тізіп қойсаңыз сұлулыққа деген құмарлығыңыз бен жоғары талғамыңызды келген қонақтар бірден аңғаратындығы сөзсіз. Мен өзім тігетін киім үлгісіндегі көйлек пен белдемшелердің етегі барынша ұзын болғандығын қалаймын. Өйткені, етек-жеңі жабық келіншекті сұлу емес деп ешкім айта алмайды, – дейді жас тігінші.
Тойға, көпшілік қауым жиналатын ортаға барғанда үнемі стилімен ерекшелініп тұратын кейіпкеріміз өзіне келген әрбір жанды әдемі де, көрікті етіп шығарғанша жаны жай таппайды. Жұмысқа деген адалдығынан болар, шабыты артқанда екі, кейде, тіпті, бір күнде сырға, білезік сынды бұйымдарды әзірлеп тастауға бар.
Ұлт жанашыры деп көп жағдайда елге танылған тұлғаларды тілге тиек етіп жатамыз. Олардың бірі мінберде тұрып бұқара халық құптайтын ұсыныс жасап, ел игілігі үшін қызмет етсе, енді бірі өзінің шағын ғана шеберханасында әлемді бағындыратындай үлгіні ұсынуға барын салуда. Тағы бірі жеке кәсібін ашып, елдің экономикалық дамуына үлес қосып жүр. Ендеше, экономика, саясат, әлеумет, ауылшаруашылық саласында, тіпті, сән үлгісінде де ұлтжандылық, отансүйгіштік сезімдерді түрлі жолмен паш етуге болатынын ескерейік, қай салада да қазақ халқының ата-баба дәстүрі ешқашан ұмыт қалмақ емес. Оны тек жаңғыртып, заман талабына сай етіп ұсыну жолын меңгере білсек жеткілікті. Жангүлдің де алға қойған мақсаттарының бірі осы.
