Талдықорған қаласының «Атамекен» мейрамханасында “Тәуелсіздік балы” өтті. Облыстық Жастар саясаты мәселелері басқармасының ұйымдастыруымен осымен үшінші мәрте қылықты қыздар мен ұлықты ұлдар мың бұрала биледі.
Егемендігіміздің 25 жылдығына орай ұйымдастырылған балдың өзіндік ерекшеліктері болды. Шараға арнайы ат басын бұрған облыс әкімінің орынбасары Бақтияр Өнербаев жастардың шығармашылығына табыс тілеп, келешекте де өнерлерімен тамсандырып жүре берулеріне жол ашық екендігін айтты. Жиналған қонақтар алдында 70 жұп өнерлерін ортаға салды. Қала жастарының қаймағы іспеттес белсенді ұл-қыздар үш түрлі би билеп, баршамызды таң-тамаша қалдырды. Кеште эстрада жұлдызы Мақпал Исабекова құйқылжыта ән салып, жырдан шашу шашты.
Денис Московскийдің жетекшілігімен қатысушылар айтулы балға 4 ай бойы дайындалған. Осылайша олар баршамызды өнер айдынында тербетіп, қызығушылығымызды шыңдап, рухани демалып қайтуымызға себепші болды. Балға қатысқан Ілияс Жансүгіров атындағы Жетісу мемлекеттік университетінің студенті Думан Кеңшілік: «Тәуелсіздік балына қатысқаныма өте қуаныштымын. Жаңа достар таптым. Адамдармен тіл табысуды үйрендік. 4 ай бойы билеп қана қойған жоқпын, облыстық Жастар саясаты мәселелері басқармасының ұйымдастыруымен әртүрлі шараларға қатысып бақ сынастық», – деп алған әсерімен бөлісті.
Мәулен Әнербай