Көшенің тазалығы, ауланың ұқыптылығы мен табиғатқа деген жанашырлық тұрғындардың мәдениеті мен жауапкершілігін айқындайды. Осы ұстанымды берік қалыптастыруды көздейтін «Таза Қазақстан» экологиялық бағдарламасы аясында Қаратал ауданында кезекті рейдтік іс-шара ұйымдастырылды.
Арнайы құрылған мобильді топ Үштөбе қаласы мен Бастөбе ауылында абаттандыру талаптарының сақталуына бақылау жүргізді. Тексеру барысында қоғамдық орындардың санитариялық жай-күйі, заңсыз қоқыс үйінділерінің пайда болуы, құрылыс қалдықтарының белгіленбеген аумақтарға төгілуі секілді мәселелер назарға алынды.
Мониторинг нәтижесінде қоршаған ортаның тазалығына кері әсерін тигізетін заңбұзушылықтарға жол берген жеке және заңды тұлғалар анықталды. Оларға Қазақстан Республикасының қолданыстағы заңнамасы талаптары кеңінен түсіндіріліп, табиғатты қорғау мен абаттандыру қағидаларын сақтау жөнінде ескертулер жасалды. Ал белгіленген талаптарды орындамаған азаматтар мен ұйымдарға әкімшілік ықпал ету шаралары қолданылып, заң талаптарына сәйкес айыппұл салынды.
Мұндай бақылау шараларының басты мақсаты – тұрғындардың экологиялық мәдениетін қалыптастыру, туған өлкенің тазалығына деген жауапкершілікті арттыру. Себебі табиғаттың көркеюі әр азаматтың күнделікті іс-әрекетінен басталады.
«Таза Қазақстан» бағдарламасы аясында ұйымдастырылып жатқан мұндай рейдтер елді мекендердің санитарлық ахуалын жақсартуға, заңсыз қоқыс орындарының көбеюіне жол бермеуге және абаттандыру талаптарының сақталуын қамтамасыз етуге бағытталған. Тазалық – ортақ міндет. Сондықтан қоршаған ортаны аялау мен қоғамдық тәртіпті сақтау әр тұрғынның азаматтық парызы.
Санжар СҰЛТАНҒАЗЫ
