Қазақстанда құқық қорғау органдарының жұмыс тәсілі түбегейлі өгеріп, қылмыс салдарымен күресуден оның алдын алуға басымдық беріліп жатыр, – деп хабарлайды 7-su.kz ақпараттық порталы.
Елімізде жүргізіліп жатқан ауқымды құқықтық реформа аясында басты міндет тек жасалған қылмысқа ден қою емес, қауіп-қатерді алдын ала анықтауға бағытталды. Бұл туралы Бас прокурор Берік Асылов мәлімдеді. Жаңа жүйе арқылы құқық бұзушылықтың себептері жойылып, азаматтардың құқықтарын нақты қорғау қамтамасыз етіледі. Осы мақсатта арнайы Қылмыстық қатерлер мен қоғамдық қауіпсіздік тәуекелдерін болжау орталығы құрылған. Орталық мамандары тәулік бойы криминогендік ахуалды талдап, осал аймақтарды анықтайды және заң бұзушылықтардың алдын алу бойынша нақты шаралар әзірлейді. Сонымен қатар шетелдік контентке де мониторинг жүргізіледі.
360-тан астам қауіпті локация анықталды
Ішкі істер министрлігі және өңір әкімдіктерімен бірлескен жұмыс нәтижесінде жасанды интеллект пен ұшқышсыз технологиялар қолданылып, азаматтарға қылмыстық қол сұғу ықтималдығы жоғары 360-тан астам қауіпті локация белгіленді. Бұл жерлерде полиция патрульдеуі күшейтіліп, 4 мыңға жуық жаңа жарықтандыру нүктесі мен 3,5 мыңнан астам бейнебақылау камерасы орнатылды.
Профилактикалық шаралар өзінің оң нәтижесін көрсетті. Бірінші жартыжылдық қорытындысы бойынша елдегі қылмыс деңгейі 11%-ға төмендегені байқалады. Атап айтқанда, адам өлімі, қарақшылық, тонау, қорқытып алушылық, ұрлық және көшеде жасалатын қылмыстар саны айтарлықтай азайды.
Интернет-алаяқтық пен есірткі қылмысына қарсы соққы
Бас прокуратура заңсыз есірткі айналымы мен интернет-алаяқтыққа қарсы күрес қорытындыларын жариялады. «Кибернадзор» жүйесі есірткіні насихаттау белгілері бар 10 мың материалды, оның ішінде 6 мыңнан астам есірткі дүкенін бұғаттады.
Кешенді іс-қимыл нәтижесінде 464 мыңнан астам дропперлік шот бұғатталып, есірткіден түскен 2,6 млрд теңгеден астам заңсыз кіріске тыйым салынды.
Сонымен қатар соңғы жылдары алғаш рет интернет-алаяқтықтың өсу үрдісін тоқтатуға мүмкіндік туды. Оның көрсеткіші 9%-ға төмендеді. «Қазақтелеком» АҚ-мен бірлескен жұмыс нәтижесінде 1 млн-нан астам күдікті қоңырау тоқтатылып, шетелде орналасқан 12 алаяқтық колл-орталықтың қызметі әшкереленді.
21 млн теңге сақталып қалды
Астанада прокуратура бастамасымен «Қазақтелеком» базасында құрылған Антиколл-орталық 76 жастағы әйелдің алаяқтарға 21 млн теңге бермек болған әрекетінің жолын кесті. Ал Ұлттық банктің Антифрод-орталығы арқылы 2,9 млрд теңгеден астам сомаға алаяқтық транзакциялар бұғатталды.
Конституциядағы «Заң мен тәртіп» қағидатын қамтамасыз ету – басты басымдық. Сіз өз аймағыңызда қауіпсіздік ережелері сақталып жатқанын байқадыңыз ба? Тәртіп пен тыныштықты сақтауға бірге үлес қосайық.
