Талдықорған қаласы Мансап орталығы филиалында әлеуметтік кәсіпкерлермен маңызды кездесу ұйымдастырылды. Жиынның негізгі мақсаты – 2027 жылға жоспарланған субсидияланатын жұмыс орындарын ұйымдастыру тәртібі мен оған қойылатын талаптарды түсіндіру, сондай-ақ еңбек нарығындағы өзекті мәселелерді талқылау.
Жиынға «Жетісу облысының жұмыспен қамтуды үйлестіру және әлеуметтік бағдарламалар басқармасы» мемлекеттік мекемесінің «Жетісу облыстық Еңбек мобильділігі орталығы» коммуналдық мемлекеттік мекемесі директорының орынбасары Камшат Жантекеева және Талдықорған қаласы Мансап орталығының директоры Азамат Болатұлы қатысты.
Кездесу барысында субсидияланатын жұмыс орындарын құру тәртібі, жұмыс берушілердің жауапкершілігі, қатысушыларға қойылатын талаптар, жұмыс орындарының сақталуын қамтамасыз ету және бюджет қаражатын тиімді пайдалану мәселелері түсіндірілді. Сонымен қатар жастар практикасы, қоғамдық жұмыстар, әлеуметтік жұмыс орындары және «Күміс жас» жобасы аясында ұсынылатын мүмкіндіктер жөнінде толық ақпарат берілді.
Өз сөзінде Камшат Жантекеева өңірдегі жұмыспен қамту бағдарламаларын сапалы жүзеге асырудың маңыздылығына тоқталды. Оның айтуынша, жұмыс берушілер мемлекеттік қолдау шараларын тиімді пайдаланып, тұрғындарды тұрақты жұмыспен қамтуға өз үлесін қосуы қажет. Ал Талдықорған қаласы Мансап орталығының директоры Азамат Балтабеков әлеуметтік кәсіпкерлерді халықты жұмыспен қамтуға бағытталған мемлекеттік бастамаларға белсенді қатысуға шақырды.
Жиында пилоттық режимде енгізіліп жатқан жаңашылдықтардың бірі – жұмыссыздық мәртебесін беру тәртібіндегі өзгерістер де таныстырылды. Мамандардың түсіндіруінше, бұған дейін жұмыссыздық мәртебесі 3 жұмыс күні ішінде берілсе, енді бұл рәсім 13 күндік кезең арқылы айқындалатын болады. Өзгеріс азаматтарды тұрақты жұмыс орындарына орналастыру мүмкіндіктерін арттыруға және еңбек нарығындағы нақты жағдайды анықтауға бағытталған.
Кездесу соңында кәсіпкерлер өздерін толғандырған сауалдарын қойып, мамандардан нақты жауаптар мен қажетті түсіндірмелер алды. Ашық форматта өткен жиын жұмыс берушілердің мемлекеттік бағдарламалар жөніндегі ақпараттануын арттырып, тәжірибе алмасуына мүмкіндік берді. Мұндай кездесулер жұмыспен қамту шараларының тиімділігін арттырып, жаңа жұмыс орындарын құруға және азаматтардың әлеуметтік әл-ауқатын жақсартуға ықпал етеді. Талдықорған қаласы Мансап орталығы алдағы уақытта да жұмыс берушілермен өзара байланысты нығайтып, мемлекеттік бағдарламалардың сапалы жүзеге асырылуына қолдау көрсетпек.
Әлия ИМАНЖАНОВА,
Талдықорған қаласы Мансап орталығы филиалы
жұмыспен қамту бөлімінің сектор басшысы
