Жетісу облысында қоғамдық белсенділікті арттыру және салауатты өмір салтын насихаттау бағытында маңызды спорттық шара ұйымдастырылды, – деп хабарлайды 7-su.kz ақпараттық порталы.
Текелі қаласында маңызды саяси науқан – алдағы Құрылтай сайлауын қолдау мақсатында 2,5 шақырымдық жаппай жүгіру жарысы өтті. Қаланың ең көрікті әрі ұзын көшелерінің бірі саналатын Д.Қонаев даңғылы бойында ұйымдастырылған ауқымды шараға жастар, қала белсенділері, тәжірибелі спортшылар мен қаланың саналы тұрғындары қатысты. Белсенділер PIT STOP маңындағы теміржол өткелінен бастау алып, қаланың шолу алаңына дейін қашықтықты сәтті еңсеріп, мәре сызығын аттады.
Спорттық шара барысында жиналғандар бірлік пен ұйымшылдық танытып, бұқаралық спортты дамытудың маңызын көрсетті. Сонымен қатар қатысушылар жұртшылықты алдағы маңызды сайлауға белсене қатысып, өздерінің азаматтық ұстанымын білдіруге шақырды. Мұндай бастамалар өңірдегі тұрғындарды дене шынықтырумен тұрақты түрде айналысуға ынталандырып қана қоймай, қоғамның өзара ынтымақтастығын нығайтуға үлкен үлес қосады.
Мемлекет тарапынан бұқаралық спортты қолдауға бағытталған осындай іс-шаралар өз нәтижесін беріп, өскелең ұрпақтың денсаулығын жақсартуға жол ашуда. Әрбір азамат салауатты өмір салтын ұстанып, елдің қоғамдық-саяси өміріне бей-жай қарамауы тиіс.
