Қазақстанда цифрлық медицина саласы қарыштап дамып, ауруханалардағы қағазбастылық айтарлықтай азайып келеді. Дәрігерге жазылу және өзге де онлайн қызметтер арқылы денсаулық сақтау мамандарының жұмыс жүктемесі 30-40%-ға жеңілдеді, – деп хабарлайды 7-su.kz ақпараттық порталы.
Денсаулық сақтау жүйесін цифрлық трансформациялау азаматтардың уақытын үнемдеп, қызмет сапасын арттыруға бағытталған маңызды қадам саналады. Қазіргі уақытта бірыңғай цифрлық кеңістікке 21,3 мыңнан астам медициналық ұйым, 275 мың қызметкер және 141 мың медициналық техника туралы деректер біріктірілген. Ақпараттық жүйелерді бір-бірімен байланыстыру арқылы мәліметтерді қолмен жазу немесе компьютерге қайта-қайта енгізу қажеттілігі жойылды. Нәтижесінде ақ халаттылардың қағаз толтыруға кететін уақыты үнемделіп, науқасқа көбірек көңіл бөлуіне мүмкіндік туды.
Бүгінде саладағы мемлекеттік қызметтердің 88%-ы электронды форматқа ауысқан. Өткен кезеңде көрсетілген 215 млн қызметтің 190,8 млн-ы смартфон немесе компьютер арқылы жүзеге асты. Оған қоса, азаматтарға 8,5 млн электрондық медициналық анықтама беріліп, 5,6 млн адам емханаға бармай-ақ, дәрігер қабылдауына виртуалды түрде жазылған.
Ана мен бала денсаулығын қадағалау да жаңа деңгейге көтерілді. Цифрлық мониторинг жүйесі арқылы 11 млн азаматтың, оның ішінде 7 млн бала және 4,3 млн әйелдің жағдайы жіті назарда тұр. Сонымен қатар 3,6 млн пациент динамикалық, яғни тұрақты бақылауға алынған.
Сандық технологиялар тек ыңғайлылық қана емес, сондай-ақ қаржылық ашықтықты да қамтамасыз етіп отыр. Мәселен, дәрі-дәрмектерді арнайы кодпен таңбалау жүйесі заңсыз айналымда жүрген 21 мыңнан астам препаратты анықтауға көмектесті. Осы әдіс арқылы әрбір дәрінің қоймадан науқастың қолына жеткенге дейінгі қозғалысын тікелей бақылауға болады. Демек, тегін берілуі тиіс дәрілерді заңсыз есептен шығарып, сатып жіберуге жол берілмейді.
Оған қоса, бақылау жүйесінің көмегімен 10,6 млрд теңгеге негізсіз, яғни іс жүзінде көрсетілмеген медициналық қызметтердің алдын алу мүмкін болды. Қазіргі таңда 1 950 ұйымда «Face ID», яғни адамның бет-әлпетін тану технологиясы жұмыс істейді. Емханалардағы қабылдаулардың 73%-ы дәл осы биометриялық сәйкестендіру немесе электрондық құжаттар арқылы өтеді. Жаңашылдық біреудің орнына басқа адамның қаралуына немесе жалған тіркеулер жасауға толықтай тыйым салады.
Күнделікті өмірде тұрғындар «eGov Mobile» немесе өзге де арнайы медициналық қосымшаларды пайдалану арқылы өз денсаулығын басқаруды толық қолға ала алады. Зертханалық талдау нәтижелерін немесе рецепт қағаздарын алу үшін бұрынғыдай ұзын-сонар кезекте тұрудың қажеті жоқ, барлық мәлімет жеке кабинетке автоматты түрде түседі. Мұндай ашық экожүйе халық пен дәрігер арасындағы сенімді нығайтып, қоғамдағы сыбайлас жемқорлық тәуекелдерін айтарлықтай төмендетеді.
Цифрландырудың келесі кезеңінде тағы 1,9 мыңнан астам мекемені Бірыңғай мемлекеттік медициналық ақпараттық жүйеге қосу жоспарланған. Алдағы уақытта дәрігерлерге арналған ортақ жұмыс интерфейсі жасалып, оларға жасанды интеллект негізіндегі виртуалды көмекші енгізу көзделген.
