Алдағы Құрылтай сайлауы кезінде азаматтардың өз құқықтарын толық пайдалануына жағдай жасау мақсатында маңызды шара қолға алынды. Тұрғылықты жері бойынша тіркеуі жоқ отандастарымыз үшін дауыс беру күні арнайы бір күндік тіркеу рәсімі қолжетімді болады, – деп хабарлайды 7-su.kz ақпарттық порталы.
«Азаматтарға арналған үкімет» мемлекеттік корпорациясы ел аумағындағы маңызды саяси науқан кезінде 10 мыңнан аса сайлау учаскесі жұмыс істейтінін мәлім етті. Соның ішінде арнайы таңдалған 221 учаскеде Халыққа қызмет көрсету орталығының мамандары азаматтарды бір күнге тіркеуге рәсімдейді. Бұл шешім тіркеуі жоқ немесе басқа өңірде тіркелген тұлғалардың дауыс беру құқығын жүзеге асыруына жол ашады. Мұндай қадам халықтың саяси белсенділігін арттырып, сайлау процесінің ашықтығы мен қолжетімділігін қамтамасыз етеді.
Аталмыш тіркеу тек сайлауға қатысу мақсатында бір күнге ғана жарамды. Келесі күні бұл тіркеу автоматты түрде жойылады. Егер сайлау учаскесі мектеп, колледж, университет немесе басқа да әлеуметтік нысанда орналасса, азамат сол мекеменің мекенжайы бойынша тіркеледі. ХҚКО қызметкерлері сайлау учаскелерінде таңертеңгі сағат 7:00-ден кешкі 20:00-ге дейін үздіксіз қызмет көрсетеді. Тұрғылықты жері бойынша тұрақты тіркеуі бар азаматтар әдеттегідей өздеріне тиесілі учаскеде дауыс береді.
Аталмыш бастама азаматтардың сайлауға қатысу көрсеткішін жақсартып, мемлекеттік маңызы бар науқанға әрбір тұрғынның үлес қосуына мүмкіндік береді. Цифрлық технологиялардың дамуы мен мемлекеттік қызметтердің икемділігі халыққа көрсетілетін көмектің сапасын арттыруда. Сайлау учаскелерінің толық тізімі мен өз учаскеңізді Орталық сайлау комиссиясының ресми сайтынан онлайн түрде тексеріп алуға болады.
