Ғылым, білім және мәдениетаралық ынтымақтастық – қазіргі жаһандану жағдайында қоғамның тұрақты дамуын қамтамасыз ететін маңызды тетіктің бірі. Бұл үш бағыт бір-бірімен тығыз байланысты және халықтар арасындағы өзара түсіністікті, ғылыми дамуды, білім алмасуды және мәдени құндылықтарды сақтауды қамтамасыз етеді.
Биылғы 10-17 мамыр аралығында әл-Фараби атындағы Қазақ ұлттық университетінің философия кафедрасының профессоры, философия ғылымдарының докторы Зейінәбіл Айдарбеков Қытай Халық Республикасының Чжэнчжоу қаласындағы Чжэнчжоу университетіне ресми іссапармен барып, гоесаясатқа байланысты бірқатар лекция оқыды.
Жібек жолы университеттері мен консалтингтік компаниялар қауымдастығының төрағасы Нұржан Байтеміров осы сапар барысында екі ел арасындағы байланысты орната білді. Нәтижесінде философия және саясаттану факультеті оның ішінде философия кафедрасымен бірігіп Қытай мен Орталық Азия елдері арасындағы ғылым, білім беру және мәдениетаралық коммуникация саласындағы гуманитарлық ынтымақтастықты тереңдетуге, халықаралық академиялық диалог пен тәжірибе алмасуды дамытуға бағытталған «Орталық Азия – Қытай» халықаралық жазғы академиялық мектебін бірлесіп өткізу жөніндегі келісімге қол қойылды.
Келісім негізінде Чжэнчжоу университетінің шетел тілдері және халықаралық қатынастар институты мен әл-Фараби атындағы ҚазҰУ-дің философия кафедрасы және Біліктілікті арттыру және қосымша білім беру институты бірлесіп «Жібек жолы» ғылыми және педагогикалық біліктілікті арттыру бойынша халықаралық жазғы мектебі атты брендтік жобаны іске қосты.
Жобаның негізгі мақсаты – Қытай, Орталық Азия елдері және Ресей жоғары оқу орындарының профессор-оқытушылар құрамы арасында кәсіби және ғылыми тәжірибе алмасуды кеңейту, заманауи білім беру технологияларын талқылау, ғылыми-зерттеу мәдениетін жетілдіру және жоғары білім беру саласындағы халықаралық ынтымақтастықты жаңа деңгейге көтеру.
25 шілде мен 3 тамыз аралығында Қытай Халық Республикасындағы Чжэнчжоу университетінің кампусында өткен жазғы мектептің алғашқы сессиясында қатысушылар үшін ғылыми-зерттеу әдістемесі және академиялық жазылым, цифрлық педагогика және жасанды интеллектіні білім беру үдерісінде қолдану, мәдениетаралық коммуникация және аудиторияны басқару, халықаралық ғылыми ынтымақтастық жобаларын әзірлеу, сондай-ақ мәдени алмасу мен жоғары оқу орындары арасындағы ынтымақтастық мәселелеріне арналған дәрістер, семинарлар және практикалық сабақтар ұйымдастырылды.
Қазақстан, Өзбекстан, Қырғызстан, Тәжік-стан, Түрікменстан, Ресей және Қытайдан профессор-оқытушылар құрамы мен зерттеушілер қатысқан халықаралық жазғы мектеп жұмысына 26 профессор, оқытушы және докторанттар белсенді атсалысты. Қазақстан тарапынан іс-шараға әл-Фараби атындағы ҚазҰУ философия кафедрасының профессоры, философия ғылымдарының докторы Зейінәбіл Айдарбеков, қауымдастырылған профессор Пірімбек Сүлейменов, педагогика ғылымдарының кандидаты, профессор Перизат Елубаева, философия кафедрасының докторанты Ақмарал Досжанова, қытайтану кафедрасының докторанты Фариза Сәрсембаева, Қиыр Шығыс кафедрасының докторанты Шынар Сейітнұр, сондай-ақ басқа да университеттің профессор-оқытушылары қатысты.
Жобаның басты ерекшелігі – Қытай, Орталық Азия елдері және Ресейдің профессор-оқытушылар құрамының жоғары деңгейдегі белсенділігі мен кәсіби қызығушылығы еді. Түрлі дәрістер оқыған Вашингтон университетінің профессоры Wei Chuxiong, Ресей Президенті жанындағы Халық шаруашылығы және мемлекеттік қызмет академиясы, халықаралық ынтымақтастық кафедрасының меңгерушісі, философия ғылымдарының докторы Семед Семедов кезекпен шеберлік сабағын өткізді. Дәрістер мен пікірталастарға белсенді қатысқан тыңдаушылар өздерінің ғылыми-зерттеу тәжірибелерімен, педагогикалық әдістемелерімен және жоғары білім беру саласындағы озық үлгілерімен бөлісті.
«Жібек жолы» халықаралық жазғы мектебі – тек кәсіби біліктілікті арттыру алаңы ғана емес, сонымен қатар Қытай, Орталық Азия және Ресейдің ғылыми-білім беру кеңістіктерін жақындастыратын маңызды халықаралық академиялық платформа. Жобаның жүйелі түрде жыл сайын өткізілуі алдағы уақытта бірлескен ғылыми зерттеулерді, халықаралық жобаларды, академиялық ұтқырлықты және университеттер арасындағы жаңа ынтымақтастық бағыттарын дамытуға кең мүмкіндік береді.
Мәрия МАЙЛЫҚҰТОВА,
әл-Фараби атындағы ҚазҰУ философия және саясаттану факультеті дінтану және
мәдениеттану кафедрасының
аға оқытушысы
